Ekonomia Mundiál no CPLP
Ministru Finansas sira husi Nasaun CPLP nian sira asiste ona, iha loron 21 fulan Jullu, iha andár da-10 Edifísiu Foun Ministériu Finansas nian, aprezentasaun ida kona-ba Ekonomia no Finansas ne’ebé halibur matenek-na’in sira husi organizasaun mundiál oinoin no reprezentante barak husi nasaun sira seluk ne’ebé la partense ba Komunidade Nasaun Lian Portugés (CPLP).
Sorumutuk ida ne’e, ne’ebé foti tema “Impaktu Globalizasaun nian iha Finansas Públikas CPLP nian”, ninia objetivu maka fó ba responsável ba pasta Finansas husi nasaun sira Komunidade ne’e nian, perspetiva ida kona-ba futuru Ekonomia mundiál, daudaun ne’e mak Timor-Leste kaer knaar Prezidénsia Rotativa Komunidade nian.
Iha loron tomak ne’e nia laran iha aprezentasaun lubuk ida: dahuluk, husi Diretór Rezidente Banku Mundiál nian ba Xina, Bert Hofman, kona-ba “Evolusaun Resente kona-ba Mudansa Situasaun Ekonómika iha Ázia no perspetiva sira ba futuru: Oportunidade no dezafiu sira ba CPLP”; Daruak, husi Diretór Ezekutivu Fundu Monetáriu Internasionál, Paulo Nogueira Batista, kona-ba “Evolusaun Resente kona-ba Mudansa Situasaun Ekonómika iha Amérika Latina no perspetiva sira ba futuru: Oportunidade no dezafiu sira ba CPLP”; Datoluk husi jestór Makroekonomia no Jestaun Fiskál Banku Mundiál nian, Mark Thomas, kona-ba “Evolusaun Resente ba Situasaun Ekonómika iha Áfrika no perspetiva sira ba futuru: Oportunidade no dezafiu sira ba CPLP”. Iha parte loro-kraik nian aprezentasaun dahaat halo husi Asesór Prinsipál Ministériu Finansas Timor-Leste nian, Rui Maria de Araújo, kona-ba “CPLP iha era globalizasaun nian: Jestaun Finansas Públika no oinsá Governu sira bele halo estimativa kona-ba kresimentu ekonómiku”; no, ikusliu aprezentasaun dalimak halo husi Sekretáriu-Jerál g7+, Helder da Costa, kona-ba “CPLP no Krize Finanseira Mundiál: Ensinamentu ne’ebé mak hetan ona, risku no oportunidade sira ba CPLP”.
Bazeia ba aprezentasaun no debate oinoin ne’ebé halo ona iha loron ne’e, maka sei elabora “Rezolusaun ida kona-ba elaborasaun Estudu ida ba Investimentu no Komérsiu”, iha CPLP, nia laran, ne’ebé sei hetan konsiderasaun durante Prezidénsia rotativa Komunidade ne’e nian, husi parte Timor-Leste, iha tinan oin mai.
