Governu Timor-Leste

Ministru Estadu no Negósiu Estranjéiru no Kooperasaun , José Luis Guterres iha Loron 9 Jullu 2014,  hala’o sorumutu ho Embaixadór akreditadu hotu-hotu iha Timor-Leste, hodi fahe imformasaun kona-ba preparasaun X Simeira CPLP ne’ebé sei hala’o iha Dili, hahú loron 17 to’o 23 Jullu 2014.

“Tanba ida-ne’e internasionál, país barak mós akompaña. Sira hakarak hatene loloos informasaun kona-ba bainhira mak hala’o eventu ne’e, karik sira-nia ema mai. Sira presiza iha informasaun loloos“, Ministru dehan.

Ministru José Luis Guterres promete, katak, Ministeriu Negósiu Estranjéiru no Kooperasaun disponivél nafatin atu atende informasaun ba korpu diplomátiku akreditadu iha Timor-Leste, kona-ba lala’ok no rezltadu husi Simeira CPLP.

“Ami mós husu ba korpu diplomátiku sira atu informa ba sira nia Governu sira, sobre eventu boot ne’ebé ita sei organiza iha Dili,” Ministru José Luis Guterres hateten.

Timor-Leste mós sei konvida país ASEAN sira, Nova Zelandia no país sira seluk hosi Sudeste Áziatiku Pasifiku.