Pontu fokál Kooperasaun CPLP nian sira sorumutu iha Dili
Simeira Komunidde País Lian Portugés (CPLP) nian hahú loke ona ho Sorumutu Ordináriu ba da-XXIX Pontu Fokál Kooperasaun nian sira no sei hala’o iha loron 17 no 18 fulan Jullu, iha Salaun Nobre Ministériu Negósius Estranjeirus no Kooperasaun, iha Díli.
Sesaun abertura nian prezide hosi Diretora-Jerál CPLP nian, Georgina Benrós de Mello, hosi Diretór Kooperasaun CPLP nian, Manuel Clarote Lapão, no hosi Pontu Fokál Kooperasaun País ida ne’ebé sei kaer prezidénsia CPLP nian, Albertina McDonlad, hosi Moçambique.
Albertina McDonald, pontu fokál hosi Moçambique, hato’o ona testemuñu ba Lídia Martins, Pontu Fokál Kooperasaun Timor-Leste nian, ne’ebé mak atu kaer Prezidénsia Rotativa CPLP nian iha tinan rua oin mai.
Iha loron dahuluk hosi loron rua ne’e, pontu fokál sira hosi Estadu-membru sira CPLP nian, sei aprezenta proposta oin-oin kona-ba atividade sira, nune’e mós dokumentu hirak atu analiza iha Sorumutu Ordináriu ba da-XIX Konsellu Ministru CPLP nian sira, ne’ebé mak sei hala’o iha loron 22 fulan Jullu.
Hakotu tiha servisu loron rua nian ne’e, loron 18, Manuel Clarote Lapão no Lídia Martins sei loke konferénsia imprensa ida, ne’ebé sei hala’o iha tuku 12.30 iha Salaun Nobre Ministériu Negósius Estranjeirus no Kooperasaun.
