Konsellu Rádio Komunidade Mauloko-Maubisse simu Tomada de Possé
Sekretáriu Estadu Komunikasaun Sosiál, Nélio Isaac Sarmento, iha loron 7, fulan Juñu, tinan 2014, inaugura edifísiu rádio komunidade Mauloko-Maubisse no fó pose ba konsellu eleitu rádiu nian nain 10, iha Salaun Parokiál Sub-Distritu Maubissé, Distritu Ainaru.
Iha biban ne’e, Sekretáriu Estadu Komunikasaun Sosiál, Nélio Isaac Sarmento haktuir katak, ita hotu hamutuk iha ne’e atu fó sasin ba prosesu ida importante ba ita-nia rai liuliu ba komunidade Maubisse.
“Hakarak hateten katak, hosi Sub-Distrtiu hotu iha nasaun Timor-Leste, úniku Sub-Distritu ida mak iha rádio komunidade, ida ne’e hanesan inisiativa dahuluk ne’ebé hatudu iha rai Maubisse”, Sekretáriu Estadu dehan.
Sekretáriu Estadu hatutan tán katak, bainhira ko’alia kona-ba rádio komunidade, ita ko’alia kona-ba órgaun komunikasaun sosiál ne’ebé atu transforma ita-nia populasaun iha mentalidade hanoin, tanba liu hosi média sira, radio, ita hanorin ona populasaun kona-ba objetivu ne’ebé ita hakarak lori .
“Hanesan jornalista ka tatoli informasaun iha rádio komunidade hatudu ba ita-nia komunidade sira katak, informasaun ne’ebé fó ba ne’e informasaun loloos atu ita-nia komunidade hatene katak, loos duni, ida ne’e mak lao hela iha ita nia rai Maubisse, Sekretáriu Estadu hateten.
Tuir Adjuntu PNTL, Asistente Superintendente, Albino Mouzinho haktuir, iha biban ida ne’e atu motiva estrutura hahú hosi konsellu no jestór rádio ne’e hatudu katak, informasaun saida de’it mak ita iha Maubisse, Distritu Ainaru nian, ita iha konfiansa boot ba ita nia rádio komunidde rasik atu bele halekar informasaun.
“Rádio hanesan meius ida importante bele fó hanoin no monitivasaun ba iha komunidade sira, tanba ita nia komunidade sira presiza tébes informasaun hosi Governu nian no instituisaun hotu-hotu no hanoin tomak Estadu nian, presiza ita rona no asegura rasik iha ita nia Distritu laran”, Adjuntu PNTL, Albino Mouzinho hakuir.
Iha fatin hanesan, Prezidente Konsellu Rádio Komunidade Mauloko-Maubisse, Martino Sequeira informa katak, funsaun Konsellu rádio mak atu tau matan ba lalaok hosi rádio komunidade no konsellu sira, diriji hosi prezidente klibur ne’ebé hili hosi komunidade.
“Ami esperakatak, ho tomada de pose ohin, ami simu ba oin ami koko atu bele buka apoiu ruma hodi dezenvolve rádio komunidade Maubissé Mauloko nia futuru”, Prezidente Konsellu Radio hateten.
Iha estasaun rádiu komunidade hamutuk 14 mak durante ne’e Sekretaria Estadu Komunikasaun Sosiál fó hela apoiu téknika ba sira nia funsionamentu. Antes ne’e mós, Sekretáriu Estadu Komunikasaun Sosiál, inaugura ona edifísiu rádio komunidade no fó pose ba konsellu eleitu rádiu nian no manajer rádiu komunidade sira iha Distritu, Aileu, Ermera, Lautem, Baucau no Ainaro, no atividade ne’e sei kontinua ba Estasaun Radiu Komunidade ne’ebé iha Distritu sira seluk.
