Primeiru-Ministru hala’o vizita serbisu ba Guiné Equatorial
Membru oioin hosi Governu Guiné Equatorial no ninia Primeiru-Ministru, Vicente Ehate Tomi, simu Primeiru-Ministru, Kay Rala Xanana Gusmão, iha aeroportu Malabo nian, iha loron 1 fulan-Juñu.
Vizita serbisu loron haat ne’e nian hatama tiha ona iha ajenda Xefe Governu Timor-Leste nian ne’ebé hala’o daudaun iha nasaun oioin, no sei hala’o durante fulan ida ho balun molok Simeira Xefe Estadu no Governu CPLP nian (Komunidade País Lian Portugés), ne’ebé sei hala’o iha Dili, iha loron 23 fulan-Jullu.
Iha loron-daruak vizita nian, Primeiru-Ministru hetan konvite hodi asiste sorumutuk Grupu Ema Koñesidu sira husi ACP nian (África, Caraíbas no Pacífico), ne’ebé iha ninia sesaun abertura, Prezidente Guiné Equatorial, Teodoro Obiang Nguema Mbasogo maka halo intervensaun.
Hafoin sorumutuk, iha fatin ne’ebé rezerva tiha ona iha Sentru Konferénsia nian hodi hala’o sorumutuk ne’e, Prezidente Guiné Equatorial simu Primeiru-Ministru. Iha enkontru ne’e, Xanana Gusmão entrega karta konvite Prezidente Taur Matan Ruak nian hato’o ba Prezidente Guiné Equatorial, kona-ba Simeira Dili nian, ne’ebé Timor-Leste maka sei asume Prezidénsia Rotativa CPLP nian. Iha enkontru ne’e, na’i ulun rua ne’e ko’alia kona-ba oportunidade kooperasaun nune’e mós valór no prinsípiu sira CPLP nian. Na’i ulun rua ne’e hato’o mós sira nia hanoin ba malu kona-ba planu sira dezenvolvimentu nasaun rua nian, hodi haree ba dezafiu no oportunidade komún sira, liuliu iha setór enerjétiku.
Iha loron 3 fulan-Juñu, Primeiru-Ministru nia omólogu simu nia, la’ós hanesan Xefe Governu, maibé iha knaar ida importante atuhalo artikulasaun interministeriál.
Iha kalan-dahikus vizita serbisu nian, Primeiru-Ministru asiste inaugurasaun fragata ida nian – ne’ebé, ba-dahuluk, Guiné Equatorial maka halo rasik. Serimónia ne’e prezide rasik husi Xefe Estadu no Governu Teodoro Obiang Nguema Mbasogo.
Oras ne’e, Primeiru-Ministru Kay Rala Xanana Gusmão bá fali São Tomé e Príncipe, bá vizita serbisu nian ida ba loron-rua nian (loron 4 no loron 5 fulan-Juñu).
Atu haree fotografia sira kona-ba vizita serbisu ne’e ba Guiné Equatorial, klike iha ne’e.
