"Polítika pre-deskonsentrasaun atu promove boa-governasaun"
Ministériu Justisa, Dionisio Babo Soares, hateten, pre-deskonsentrasaun nuudar polítika Estadu nian atu promove boa-governasaun, Ministru hateten lia ne’e, bainhira hamutuk ho Sekretária Estadu Dessentralizasaun Administrativa hala’o konferénsia nasionál ho tema “Hanoin Klean kona-ba Pre-Deskonsentrasaun Administrativa iha setór Justisa, Dezafiu no Opurtunidade” iha Kinta-feira loron 22 fulan Maiu, Sentru Formasaun Jurídiku Kaikoli.
Objetivu husi konferénsia ne’e mak atu rekolla informasaun báziku kona-ba delegasaun servisu distritál no delegasaun kompeténsia ne’ebé distritu sira hein ba estrutura foun no kuadru pesoál sira iha liña sektorais.
Ministru Justisa, Dionísio Babo Soares, iha nia intervensaun, hateten tan katak konstituisaun RDTL iha artigu 5 númeru 1/2014 ko’alia kona-ba prinsípiu desentralizasaun administrasaun, hanesan fatór fundamentál ba organizasaun territoriál estadu nian, konstituisionál ne’e rekoñese katak ho interese lokál ne’ebé di’ak liutan atu kontinua konkretiza ita nia populasaun sira, bainhira ita aplika lei fundamentál sira ne’e ho di’ak.
Dionísio Babo Soares hatutan tan, iha artigu 72 alinea ida, mós hatete katak “podér lokál mak konstruida ba pesoál koletiva iha territória ne’ebé dotada hanesan orgaun reprezentativu povu no estadu nian ho objetivu atu organiza partisipasaun sidadaun fó solusaun ba problema propíu iha sira nia komunidade hodi promove dezenvolvimentu lokál nian ne’ebé la ho prejuízu ba fó partisipasaun Estadu nian”.
Governu konstituisionál V hamosu Dekretu Lei númeru 4/2014,harii estatutu orgániku kona-ba estrutura pre-deskonsentrasaun administrativa, iha sikun 2 mak parte ida hanesan polítika desentralizasaun estadu nian, no parte seluk hanesan mós dalan atu promove boagovernasaun, atu konsentra podér balun ne’ebé sentraliza iha lokál ba iha distritu sira, ho intensaun atu bele fó servisu di’ak liu ba komunidade sira iha distritu, dehan Dionísio Babo Soares.
Sekretária Estadu Fortalesementu Intitusionál hanesan mós oradór, Fransisco Soares, esplika katak ko’alia kona-ba dezenvolvimentu, instituisaun no governasaun laiha ida ketak hanesan mós Timor-Leste ne’ebé la’o ho mundu, hanesan mós dezenvolvimentu iha Timor-Leste la la’o mesak maibé la’o ho hanoin ida hanoin Estadu nian, ne mak ita bolu integrasaun pensamentu, integrasaun sistema no integrasaun iha dezenvolvimentu.
