MSS simu vizita hosi Ministériu Paz no Rekonstrusaun Nasaun Nepal nian
Ministériu Solidariedade Sosiál (MSS), liuhosi Vise-Ministru, Jacinto Rigoberto Gomes de Deus, iha loron 27 fulan Maiu 2014, simu vizita hosi Ministériu Paz no Rekonstrusaun Nasaun Nepal nian, ne’ebé reprezenta hosi Secretary Ministry of Peace and Reconstruction, Dhana Bahadur Taman, Joint Secretary, Laxmi Sharan Ghimire no Under Secretary, Kashi Nath Marasini, hodi ko’alia kona-ba prevensaun konflitu.
Vizita ida ne’e hanesan kontinuasaun hosi vizita ida uluk, ne’ebé Ministra Solidariedade Sosiál Timor-Leste nian ba Governu Nepal, liu-liu ba Ministériu Paz no Konstrusaun, ho objetivu atu hametin lasu kooperasaun nian no fahe esperiénsia kona-ba oinsa mak bele rezolve konflitu iha Nasun rua ne’e.
Jacinto Rigoberto Gomes de Deus, hateten, “iha sorumutu delegasaun hosi Ministériu Paz no Rekonstrusaun Nasaun Nepal nian hateten sira akompaña Timor-Leste nian kbi’it atu rezolve ninian problema rasik, mesmu problema bo’ot maibe bele rezolve rasik ho tempu ne’ebé mak badak, tanba ne’e, sira dehan, sai referénsia ida ba sira. Ho vizita ida ne’e, sira hakarak aprende iha Timor-Leste liu-liu hakarak hetan esperiensia hosi Ministériu Solidariedade Sosiál (MSS)”..
Vise-Ministru, esplika tan: “ohin sira mai visita Timor-Leste liu-liu MSS atu rona esperiénsia Ministériu ninian oinsa rezolve problema IDP’s (Internally Displaced Person) no oinsa maka agora dadauk atu asegura estabilidade iha rai laran liu-liu haree ba protesaun no asisténsia ba ema vulnerável sira hanesan parte ida atu redus konflitus. Sira mós atu visita distritus no hasoru direta komunidade sira atu haree oinsa implementasaun programa paz ninian iha komunidade sira no haree komunidade nian konsiénsia no partisipasaun intermus kontribui ba harii paz iha ita nia rai laran, ida ne’e mak sira nia objetivu”.
Iha sorumutu ho delegasaun Governu Nepal nian ne’e partisipa mós hosi Diretór Amândio Amaral Freitas, Diretora Antónia Carmen da Cruz, reprezentante UNDP-Nepal, Xefe Departamentu Agostinho Cosme Belo, Programa Analyst UNDP, Justino da Costa, Xefes Gabinete MSS, Asesor Nasionál no Internasional sira.
