Governu Timor-Leste

Primeiru-Ministru no Ministru Defeza no Seguransa, Xanana Gusmão, iha loron 22 fulan Maiu to’o loron 23 fulan Juñu, hahú halo viajen ida, ho objetivu atu hala’o vizita serbisu nian ba paíz sira hanesan Portugal, Guiné Equatorial, São Tomé e Príncipe, Guiné-Bissau np Cabo Verde no vizita ofisiál ida ba Togo.

Hafoin hala’o tiha sorumutuk serbisu nian balu iha Jakarta no Singapura, Primeiru-Ministru to’o iha Lisboa iha loron 25 fulan Maiu.

Iha biban komemorasaun Aniversáriu Restaurasaun Independénsia Timor-Leste nian foin lalais ne’e, iha loron 20 fulan Maiu liubá, bainhira Xanana Gusmão to’o iha Portugal, iha loron ida ne’e kedas nia hasoru malu ho komunidade timoroan sira ne’ebé hela iha paíz ne’e, hodi selebra  aniversáriu dala ida tan, ba loron ida ne’ebé importante tebes ba ita nia nasaun.

Iha Messe de Pedrouços, sira simu Primeiru-Ministru di’ak tebtebes, hodi aprezenta ba komunidade, Embaixadora foun Timor-Leste nian iha Portugal, Maria Paixão da Costa. Mai mos iha biban ida ne’e, Sekretáriu Estadu Desentralizasaun Administrativa, Tomás Cabral, no Embaixador Antonito de Araújo hosi Misaun Timor-Leste nian ba CPLP.

Iha loron 26 fulan Maiu, Primeiru-Ministru no Ministru Defeza no Seguransa hala’o sorumutuk bilaterál ho Ministru Defeza Portugal nian, José Pedro Aguiar-Branco, ho Ministru Estadu Negósiu Estranjeiru Portugal nian, Rui Machete, no ho Ministru Administrasaun Interna Portugal nian, Miguel Macedo. Iha sorumutuk hirak ne’e halo análize iha área hirak oinoin, ne’ebé mak Portugal no Timor-Leste bele hametin sira nia koopersaun bilaterál, hodi fó sai kedas kona-ba vizita Primeiru-Ministru Portugés nian, Pedro Passos Coelho, iha Díli, iha fulan Jullu tinan ne’e.

Sorumutuk hirak ne’e hotu tiha tuir fali ho Sorumutuk da-XV Ministru Defeza sira CPLP nian, iha ne’ebé mai mós Sekretáriu Estadu Ezekutivu CPLP, Murade Isaac Murargy. Aleinde konkordánsia husi Membru sira hotu atu hametin kooperasaun iha kuadru Defeza nian, iha mós konsensu iha felisitasaun ba forsa polítika no sosiál sira Guiné Bissau nian ba eleisaun lejizlativa no prezidensiál ne’ebé sira hala’o ona ho transparente no justa, no ho dame.

Loron datoluk iha Portugal marka ho vizita Xanana Gusmão nian, hamutuk ho Miguel Macedo, ba Unidade Controlo Costeiro Guarda Nacional Repúblicana (GNR) nian. Vizita ida ne’e hala’o iha ámbitu husi reforsu ida ne’ebé prevee kona-ba kooperasaun entre Portugal no Timor-Leste iha setór Vijilánsia Marítima, no oras ne’e nasaun rua ne’e estuda hela kona-ba oinsá maka Portugal bele fó tulun atu kapasita profisionál timoroan sira iha protesaun zona kosteira no riku-soin sira iha tasi-laran sira.

Sei iha mós loron dahikus iha vizita ba Portugal ne’e, Primeiru-Ministru aproveita atu partisipa iha sorumutu estraordináriu iha Komité Konsertasaun Permanente CPLP nian, iha Sede Komunidade ne’e nian, iha ne’ebé nia aprezenta ba reprezentante sira husi Estadu-membru sira evolusaun husi preparativu sira ba Simeira Dili nian, iha fulan Jullu oin mai, ne’ebé Timor-Leste sei kaer knaar Prezidénsia Rotativa CPLP nian.

Husi Portugal, Primeiru-Ministru sei ba to’o iha Lomé, kapitál Togo nian, iha loron 28, ba vizita ofisiál ida no iha ne’ebá maka nia sei partisipa iha sorumutuk g7+ nian, no sei husik hela kapitál ne’e iha loron 1 fulan Juñu nian hodi kontinua vizita servisu nian sira seluk.

Atu hetan asesu ba diskursu kona-ba Sorumutuk da-XV Ministru Defeza sira CPLP nian, klik ne'e.

Atu haree fotos kona-ba vizita-serbisu ne'e, klik ne'e.