Governu Timor-Leste

Sekretaria Estadu ba Apoiu no Promosaun Setór Privadu liu husi Institutu Apoiu ba Dezembolvimentu Emprezariál (IADE), informa ba Ministériu no Sekretariu Estadu hotu, lansa ona, iha fulan Marsu, sistema eletróniku foun hanaran Sistema Informasaun ba Tenderizasaun (SIT).

Sistema ne’ebé realize tanba servisu hamutuk entre entre IADE no Timor Telecom nee, ho nia objetivu atu fasilita dizeminasaun informasaun liuhusi SMS ba emprezáriu sira.

Sekretaria Estadu ba Apoiu no Promosaun Setór Privadu, Veneranda Lemos, halo anunsiu ofisial ba Ministeriu no Sekretaria Estadu kona-ba sistema eletróniku hodi haruka informasaun kona-ba tenderizasaun bens, servisu e kapitál menór no informasaun hirak ne’ebe relasiona ho oportunidade negósiu, liuhusi SMS ba emprezáriu sira iha Timor laran tomak. Empreza 4.200 husi setór negósiu oin-oin hetan ona informasaun husi SIT.

IADE disponivel atu halibur informasaun kona-ba tenderizasaun, pedidu proposta no publikasaun seluk husi kompradór no distribui ba fornesedór potensiál sira, liu husi SMS no e-mail.

“Bainhira haruka ona informasaun refere ba empreza sira no karik sira interese, bele kópia informasaun hirak ne’e iha Sentru Dezenvolvimentu Emprezariál Distritál iha Distritu hotu”, Veneranda hateten.

Atu bele hatene oinsa sistema ne’e funsiona, bele konsulta iha portal eletróniku IADE nian, www.iade.gov.tl. Iha portal refere, utilizadór sira bele hare filmajen ne’ebé esplika kona ba lala’ok SIT.