Governu Timor-Leste

Ministru Negosius Estranjeirus no Kooperasaun, José Luís Guterres, hasoru malu ho Sekretariu Jerál Klibur país Áfrika, Caraíba no Pasífiku (ACP) nian sira, Alhaji Muhammad Mumuni hosi Ghana, iha 19 Maiu. Iha vizita ba dala uluk mai Timor-Leste ne’e, Alhaji Muhammad Mumuni hasoru malu mós ho directór sira iha Ministériu Negosius Estranjeirus no Kooperasaun nian.

“Ha’u mai Timor-Leste iha los loron festa nian. Horseik ha’u ba inaugurasaun estátua hosi Aman Nasaun nian (Nicolau Lobato) no ha’u hakfodak tebes”, dehan Sekretariu Jerál AKP nian. “Timor-Leste halo mundu tomak hateke ba nia. Apoiu ne’ebé mak nia fó ba iha Guiné-Bissau hanesan ezemplu di’ak ida, tanba Paíz ne’e kleur ona hasoru problema barak. Timor-Leste ajuda tiha ona ema Guiné sira sai hosi situsaun ida ne’ebé laiha estabilidade no hahalok ida ne’e merese ita atu louva” nia dehan tan.

José Luís Guterres agradese vizita Sekretariu Jerál AKP nian ida ne’e no fó hanoin fali kona-ba apoiu hirak mai hosi Paíz Afrikanu nian sira durante luta Timor-Leste nian ba ukun-rasik-an, “hanesan tusan ida ne’ebé seidauk selu ba Áfrika”.

Durante ninia vizita mai Timor-Leste, Alhaji Muhammad Mumuni iha ona mos ajenda atu hasoru malu ho Primeiru Ministru Xanana Gusmão, ho Sekretáriu Jerál FRETILIN nian, Mari Alkatiri no ho Prezidente Parlamentu Nasionál, Vicente Guterres.