Governu Timor-Leste

Governu Timor-Leste, liu hosi Ministru Administrasaun Estatal, Jorge da Conceição Teme ho Governu Austrália ne’ebé reprezenta hosi embaxadór Austrália ba Timor-Leste, Peter Doyle, selebra asina akordu kooperasaun nian iha programa Nasionál Dezenvolvimentu Suku, iha salaun Ministériu Administrasaun Estatal, Caicoli, sexta-feira, loron 9 fulan Maiu 2014.

Iha akordu kooperasaun ne’e, Governu Austrália oferese montante orsamentu hamutuk dólar australianu miliaun 45 atuhodi apoiu Programa Nasional Dezenvolvimentu Suku iha Timor-Leste.

Asina akordu ne’e hanesan kontinuasaun hosi kooperasaun ne’ebé Governu Timor-Leste liu hosi Ministériu Administrasaun Estatál (MAE) estabelese ona ho Governu Australianu nian. Tanba antes ne’e Governu Austrália fó ona apoiu ba MAE, iha ámbitu Programa Dezenvolvimentu Suku nian hahu husi tinan 2011 to’o 2014.

Apoiu sira ne’e mak hanesan, servisu asesoria nian ne’ebé finansia hosi Austrália hodi haforsa sistema koorporativu ne’ebé fó dalan ba PNDS atu aloka subsídiu ba suku,  no fasilita formasaun ba ema 400 resin, nu’udar fasilitadór tékniku, sosial no finanseiru ba PNDS hodi hala’o knaar iha distritu sira.

Jorge da Conceição Teme hatutan tan, apoiu ne’e mós atuhodi kompleta tan montante orsamentu balun ne’ebé Governu Timor-Leste prevé hela ba programa PNDS nian durante tinan 8.

Embaixadór Austrália ba Timor-Leste Peter Doyle hateten Governu Austrália iha komprimisu apoiu programa nasional dezenvolvimentu sukus ba tinan 4 nia laran hodi hadi’a oportunidade ekonómiku ba timor oan liu-liu iha área rurál.