PNTL gradua tan polísia foun na’in 242
Polísia Nasiionál Timor-Leste (PNTL) halo tan graduasaun ba Ajente Polísia foun na’in 242, iha loron kuarta-feira, 30 Abríl, hafoin tuir formasaun iha Sentru Formasaun Polísia Komoro, Dili, durante tinan ida.
Sekretáriu Estadu Seguransa, Fransisco Guterres, iha nia diskursu hato’o parabéns ba ajente polísia foun sira tanba PNTL nia papél iha povu le’et no iha prosesu dezenvolvimentu nasionál, importante tébes.
“Imi hakat tán pasu inportante iha fáze ida, hodi haforsa setór seguransa liliu iha PNTL. Antes atu sai ajente Polísia, imi liu husi prosesu naruk durante tinan ida. Ne’e hatudu, imi iha ona matenek no kbi’it rasik” nia dehan.
Iha fatin hanesan, Segundu Komandante Jerál PNTL, Komisáriu Afonso de Jesus, husu ba ajente hirak ne’e atu hatudu dixiplina, lealidade no komportamentu di’ak iha servisu fatin no komunidade nia let.
Komandante Sentru Formasaun Polísia, Superentendente Xefé, Júlio Hornai esplika informa, Sentru Formasaun simu kandidatu na’in 245, maibé na’in 3 resigna aan, nune’e hela de’it na’in 242.
Materia formasaun durante tinan ida, bazeia ba kuríkulu formasaun ajente, ne’ebé fahe ba bloku tolu. Hahú husi formasaun báziku fulan 2 iha Rairobo, formasaun eskolár iha Sentru Formasaun fulan 7 no estáziu fulan 2.
Komando PNTL koloka Ajente polísia foun sira ne’e ba Unidade sira, kompostu husi ba Unidade Espesiál Polísia (UEP) na’in 120, Kuartél Jerál (29), Unidade Patrullamentu Fronteira (50), Unidade Polísia Marítima (28), Sentru Formasaun Polísia (5), Servisu Investigasaun Kriminál (4) no Servisu Informasaun Polísia na’in na’in 6.
