Governu Timor-Leste

Sekretáriu Estadu Polítika Formasaun Profisionál no Empregu, Ilídio Ximenes da Costa, akompaña hosi Vice-Ministru Justisa, Ivo Valente, loron 30 Abril, hala’o lansamentu kona-ba propaganda uza ekipamentu ba seguransa no saúde iha servisu fatin, iha Tiger Fuel, Dili.

Lansamentu ne’e bazeia ba lei traballu seksaun IV kona-ba seguransa ijiéne no saúde iha servisu fatin no hodi komemora Loron Trabalhador nian.

Sekretaria Estadu ba Polítika Formasaun Profisionál no Empregu (SEFOPE) koloka kartáz iha sidade Dili laran ne’ebé hatudu ekipamentu balun ne’ebé bele uza. Ida ne’e hanesan dalan ida atu apela ba traballadór no mós empregadór sira atubele utiliza ekipamentu hirak ne’e, no ida ne’e sei divulga mós iha distritu sira.

Tuir Vice-Ministru Justisa hatete katak “loron ida ohin marka loron ida importante tebtebes iha faze implementasaun saída mak hateten tiha ona iha lei kona-ba servisu nain nian. Hatudu katak Estadu, Governu fó nia atensaun makaas tebtebes ba servisu nain sira la’ós tanba deit sira servisu nain maibé sira fó sira nia kontribuisaun ba iha dezenvolvimentu estadu ka país ida nian”.

Ilídio Ximenes da Costa esplika katak “lei iha tiha ona, ita hahú ida ne’e ba oin atu halo sosializasaun no liuliu hosi lei ida ne’e mós hakerek buat importante ba ita nia traballadór sira no mós ba empregadór katak servisu nain hanesan xave ba dezenvolvimentu, presiza iha tratamentu ne’ebé mak dignu”.

Sekretáriu Estadu informa mós katak, ho lansamentu ne’e hahú vigór ba oin no tau iha distritu ba distrtiu no para atu hatudu no fanu ita katak salva vida ne’e importante. “Tanba ne’e husu mós ba empregadór no kontratór sira katak tenke fó mós tratamentu di’ak ba servisu nain sira,” apela Sekretáriu Estadu.