SEPFOPE komemora Loron Traballadór nian
Sekretaria Estadu ba Polítika Formasaun Profisionál no Empregu (SEPFOPE), 30 Abril, hala’o semináriu hodi komemora Loron Traballadór nian ne’ebé monu iha loron 1 Maiu, ho nia tema “Loron 1 Maiu Dignifika Servsiu Nain Hanesan Xave Ba Dezenvolvimentu Nasionál Iha Timor-Leste”.
Objetivu semináriu, dahaluk, halo reflesaun kada tinan ba Governu no intidade sira hotu liu hosi koordenasaun tripatida oinsá atu hamenus dezempregu iha Timor-leste, daruak, promove no fiskaliza saúde no seguransa no ijiéne iha servisu fatin, no datoluk, prevene asidente iha servisu fatin.
Sekretáriu Estadu ba Polítika Formasaun no Empregu, Ilídio Ximenes da Costa, hateten katak, Loron Traballadór ne’e husu ba ita hotuhotu liuliu ba traballadór, empregadór sira katak maski kiik, maibé ita hahú avansa ho lei traballu ne’ebé mak ita iha.
“Husu ba ita hotuhotu, empregadór sira atu ita respeita malu no respeita lei ne’ebé mak iha, no fó servisu ba servisu nain mós tuir buat ne’ebé mak hakerek iha lei atu nunee ita bele lori país ida ne’e ba oin no diak liu tan iha futuro”, Sekretáriu Estadu hateten.
Sekretáriu Estadu hatutan tan katak, ita hahú oinsa mak fó servisu mak liu hosi formasaun maibé setór ne’ebé importante liu atu redús númeru dezempregu la’ós haree ba Governu, setór privadu, agrikultura no turizmu, setór ne’ebé mak importante atu redúz númeru dezempregu no loke kampu traballu.
Prezidente Konfederasaun Sindikatu Timor-Leste (KSTL), Agostinho Soares, informa katak, ba tinan 2014 KSTL komemora Loron Traballador, ba dala 13 ho tema sentrál hodi bele refleta ba realidade moris traballadór iha Timor-leste, traballu dignu dezenvolvimentu sustentavél estadu dignu.
Prezidente KSTL informa tan katak, hosi tema ne’e iha materiál rua importante iha okaziaun ida ne’e dahuluk, ita kuandu ko’alia kona-ba dignifika traballadór no daruak kriasaun de empregu.
Prezidente Kamára Komérsiu Indústria Timor-Leste, (CCI-TL), Júlio Álvaro, haktuir katak, prosesu dezenvolvimentu setór privadu tenke liu hosi kapasitasaun forsa traballu nasionál atu halo empreza sira iha produtividade liu no kapasidade atu oferese postu traballu barak liu tan ho saláriu di’ak liu.
“Atu promove dezenvolvimentu setór privadu nasionál ezisti área prioritáriu 3 ne’ebé tenke promove mak, forsa traballu kualifikada, jestaun, no emprendedorizmu”, Prezidente CCI-TL, Júlio Alfaro dehan.
Prezidente Júlio Alfaro, informa tan katak CCI-TL propoin parseria ho governu atu realiza diagnóstika sosiu ekonómiku nasionál hodi define baze implementasaun, sistema mapeamentu jeográfiku ekonómiku iha rai laran.
“Nunee bele realize mapeamentu produtivu nasionál, sensibilita no orienta investimentu públika no privadu iha prosesu promosaun dezenvolivmentu sosiu ekonómiku sustentavel hodi kria oportunidade atu implementa negósiu foun no postu traballu maun de obra kualifikada ba setór privadu nasionál ba nia dezenvolvimentu, Prezidente Júlio Alfaro hateten.
