Governu Timor-Leste

Sekretaria Estadu Polítika Formasaun Profisionál no Empregu (SEPFOPE) hala’o formasaun ba inspetór Traballu sira iha liña ministeriál, kona-ba identifika no investiga kazu traballu infantil no traballu forsadu ne’ebé hahú 28 abril to’o 8 maiu 2014 iha sentru formasaun Senai, Bekora.

Sekretáriu Estadu Polítika Formasaun Profisionál no Empregu, Ilidio Ximenes da Costa, iha abertura ba formasaun hateten katak, formasaun ida ne’e nia konteúdu halai ba iha ne’ebé, dahuluk, ita haree saida mak aprende no tenke liga mós ho kontestu kulturál ne’ebé mak ita iha.

“Tanba ita ko’alia kona-ba traballu infantil ho traballu forsadu ne’e buat boot no haree ba iha ita nian nasaun ne’ebé foin tinan 11 iha buat barak ne’ebé ita presiza mós tau matan”.

Sekretáriu Estadu, hatutan tan katak, identifika no investiga ida ne’e importante, identifika no investiga nian ne’e bele kona-ba ita nia kultura ka lae, tanba iha nasaun balun tinan 20 ka 40 ukun an tiha ona maibé problema ba ida ne’e sei boot tebetebes, agora, espriénsia ne’ebé mak sira iha, oinsá ita mós bele hasoru buat ne’ebé mak sira infrenta.

Diretor Jerál SEPFOPE, Jacinto Barros Gusmão esplika katak, “formasaun ne’e atu identifika no verifika liuliu kona-ba traballu infantil no mós aforsadu, servisu ne’ebé labarik kiik oan sira halo no obriga ema seluk atu halo servisu tanba iha ita nia lei traballu, no konvensaun labarik nian la fó dalan.

Partisipa iha formasaun ne’e, Inspetór Nasionál SEPFOPE, Polísia Komunitária, Polisía imigrasaun, Sosiedade sivil, KSTL, CCITL, Ministério Públiku no Polísia Marítima. Formasaun ne’e hetan apoiu ka suporta hosi United States Department of Labour (USDOL), Ajénsia Brazileira Kooperasaun (ABC) no Organizasaun Internasionál Traballu nian (OIT).