Timor-Leste simu ró patrulla tolu hosi Korea du Sul
Timor-Leste simu ró tolu ne’ebé Governu Korea du Sul fó ba F-FDTL ne’ebé mak entrega hosi Reprezentante Ministru Defeza Repúblika Korea, Majór Jenerál, Jeon Dong Wun no Embaixador Korea iha Timor Leste Seo Kyoung-Suk, iha segunda-feira, loron 26 fulan Setembru 2011, iha Portu Dili.
Primeiru-Ministru Interinu José Luis Guterres, iha nia Intervensaun, bainhira simu Ró Tolu ne’e hateten katak “Tinan-tinan ita-nia Estadu Timor Leste no Povu Lakon rekursu ikan barak tebetebes, tanba de’it peska ilegal. Tanba ne’e mak liu hosi tulun Ró Tolu ne’ebé Governu Korea fó ba Estadu Timor Leste hodi bele Asegura seguransa iha Tasi Timor, Parte Kosta Sul ne’ebé ita partilla ba.
Prezidente Repúblika, José Ramos-Horta iha nia intervensaun husu ba Governu iha Orsamentu Jerál 2012, tau osan hodi bele harii ofisina provizória ida, atu nune’e bele halo Manutensaun ba Ró sira ne’ebé iha Timor-Leste, no ita hein katak Governu hanoin ona planu ida ne’e, atu ita lalika ba halo manutensaun tan iha Surabaya.
Horta reforsa tan katak “Bainhira ita harii ona ofisina, nomós harii portu definitivu ida ne’ebé modernu ba Ró sira ne’e, ita bele garante ona ró sira ne’e, nia durasaun to’o tinan hirak tuir mai”. Tenik nia.
Reprezentante Ministru Defeza Repúblika Korea, Major Jenerál Jeon Dong Wun hato’o obrigadu barak ba Governu Timor-Leste no Sekretáriu Estadu Defeza hodi konvida delegasaun Korea nian atu mai partisipa iha serimónia entrega Ró patrulla Tolu ne’e, no hein katak apoiu sira ne’e bele kontribui ba Estadu Timor-Leste, atu bele proteje rekursu tasi laran nian, liu-liu bele kontribui hodi hametin liután Seguransa Nasionál. Aleinde ne’e Majór Jeon fiar katak Timor-Leste ho Korea sei hala’o relasaun iha área ekonómika, militar, sosiál no kulturál iha futuru sei metin liután.
Ró patrulla tolu ne’ebé halo parte iha komponente navál F-FDTL simu batismu ho naran Kemenassa, Díli no Hera.
Partisipa iha serimónia entrega Ró tolu ne’e mak hanesan, Prezidente Repúblika, José Ramos-Horta, Primeiru-Ministru Interinu, Jose Luis Guterres, Prezidente Tribunal Rekursu, Claudio Ximenes, Prokuradora Jerál Republika, Ana Pessoa Pinto, Majór Jenerál Republika Korea Jeon Dong Wun, Majór Jenerál F-FDTL, Taur Matan Ruak, Brigadeiru Jenerál F-FDTL, Lere Anan Timor, Xefe Estadu Maior, Koronél, Falur Rate Laek, Embaixadór Korea du sul iha Timor Leste, Seo Kyoung-Suk, Adjuntu Komisáriu PNTL, Afonso de Jesus no forsa F-FDTL sira.
