Governu Timor-Leste

Bainhira ita haburas biogás no bio-kombustível, Governu mós oras ne’e besik remata ona programa kona-ba instalasaun sentrál ídrika nian sira, ne’ebé mak hahú ona iha tinan 2009, bainhira harii sentrál Loihunu, ne’ebé mak inaugura iha Juñu liubá husi Primeiru-Ministru. Sentrál ida-ne’e prodús loron ida kilowatt 12, hodi abastese uma-kain 140. Sentrál ídrika seluk mak oras ne’e sei harii hela, iha Ainaru, ho kapasidade produsaun loron ida nian mak kilowatt 28, natón atu abastese uma-kain 250.

Ba Sentrál anin no bee nian (ídrika), Governu prevee atu harii sistema rua ne’e hamutuk (íbridu). “Iha tempu udan monu-rai, bainhira ita hetan bee barak, kapasidade produsaun nian natón atu uza turbina bee nian. Bainhira rai-maran bele uza jeradór gazóliu ka biogás nian, hodi garante sustentabilidade enerjia nian ba komunidade”, esplika Sekretáriu Estadu Polítika Enerjétika, Avelino Coelho.

Ba mikro-ídrika nia objetivu mak atu implementa sistema ida-ne’e nafatin ne’ebé ita hetan iha biogás no bio-kombustível, ka ita dehan, komunidade tenki garante produsaun enerjia nian ne’ebé presiza ba ninia nesesidade lokál sira, no karik bele atu fán enerjia ne’ebé naresin, ba fali rede nasionál eletrisidade nian.

Lei Baze kona-ba Enerjia hirak Renovável nian, ne’ebé mak Sekretaria Estadu Polítika Enerjétika oras ne’e prepara hela, hakarak atu estabelese limiti ida ho produsaun kilowatt 2,000. Avelino Coelho garante katak “sei laiha liña aberta ida ba empreza públika ka privada sira. Enerjia ne’ebé prodús hosi Sentrál Elétrika Komunitária nian sei uza de’it ba konsumu komunidade nian no fán enerjia ne’ebé naresin ba fali rede nasionál”. Objetivu Governu nian mak atu Sentrál komunitária sira bele hetan auto-sufisiénsia iha enerjia no bele hetan reseita enonómika hodi bele tulun populasaun sira iha área remota hodi bele haburas sira nia ekonomia.

Iha Loihunu no Ainaru projetu hirak hanesan ne’e implementa tiha ona. Estadu finansia konstrusaun sentrál sira no garante asisténsia bainhira estabelese kompeténsia hirak ba jestaun nian. Buat hirak ne’e hotu tenki ho partisipasaun ativa komunidade nian. Hafoin remata ona Sentrál Komunitária, mak Sekretaria Estadu Polítika Enerjétika halo akordu ida ho Xefe Suku, nu’udar responsável aas liu iha fatin projetu nian, hodi transfere títulu propriedade sentrál nian ne’e ba fali Suku. Sei harii órgaun jestaun lokál nian ida-ne’ebé mak atu desidi kona-ba see loos mak atu benefisia transferénsia gratis enerjia nian hirak ne’e, ka bainhira mak uma-kain ida-idak bele kontribui ba konsumu enerjia nian.