Governu Timor-Leste

Ministériu Justisa, ho apoiu husi Programa Nasoins Unidas ba Dezenvolvimentu (PNUD), iha loron 9 fulan-novembru tinan 2023, inaugura instalasaun foun iha Prizaun Gleno, Munisípiu Ermera.

Bloku prizionál ne’ebé foin renova ne’e bazeia ba padraun sira nasionál no internasionál direitus umanus nian, ne’ebé foka liu ba sensibilidade jéneru no iha reziliénsia hasoru moras sira ne’ebé bele da’et.

Instalasaun sira ne’e renova ona iha ámbitu programa “HOPE for Gender Equality” (ESPERANSA ba igualdade jéneru), ne’ebé rezulta husi parseria entre Governu, liuhusi Ministériu Justisa no Ministériu Solidariedade Sosiál, Provedoria Direitus Umanus no Justisa no PNUD.

Projetu ne’e ho objetivu atu hametin sustentabilidade no kapasidade institusionál estadu hodi dezenvolve asesu ba justisa no hadi’a servisu públiku ba grupu dezfavoresidus, liuliu feto no labarik feto sira iha área rurál. Hakarak mós atu hadi’a resposta ba asuntu jéneru iha setór justisa no seguransa, liuliu iha kombate ba violénsia bazeia ba jéneru. Objetivu seluk inklui melloria sensibilidade jéneru no sosiál, aumenta kompeténsia no koñesimentu legál entre profisionál sira iha área direitu, no mós aumentu ba konformidade iha instalasaun prizionál sira ho padraun direitus umanus no prátika di’ak, hodi responde ba prizioneira sira-nia nesesidade espesífika.

Transformasaun bloku prizionál ne’e ho objetivu atu hatan ba dezafius ne’ebé prizioneira sira hasoru iha Prizaun Gleno, inklui limitasaun iha instalasaun sanitária, la iha espasu no kondisaun la adekuadu ba sira ne’ebé maka ho oan, fornese instalasaun ne’ebé di’ak liu no boot liu no ho área espesiál ba feto sira ne’ebé ho oan.

Fornese mós formasaun finanseira no vokasionál, asisténsia jurídika no apoiu abranjente hodi kapasita prizioneira sira, hodi kombate dezafiu no promove ambiente ida ekuitativu no inkluzivu liu.