Governu atribui distinsaun no prémiu ba funsionáriu no instituisaun hirak ne’ebé iha prestasaun exesionál
Atu rekoñese no fó onra ba profisionalizmu ne’ebé aas, prestasaun servisu ne’ebe di’ak, kriatividade no inovasaun ne’ebé konsistente, Governu Timor-Leste atribui Distinsaun no Prémiu ba funsioáriu públiku hamutuk na’in 6 ne’ebé iha prestasaun servisu exesionál, iha serimónia ida ne’ebé hala’o iha loron 7 fulan-novembru tinan 2016, iha Ministeriu Negosius Estranjeirus no Kooperasaun, iha Dili.
Funsionariu públiku na’in 6 ne’ebé simu prémiu ne’e iha feto na’in 4 no mane na’in 2 no mai husi Ministériu Saúde, Ministériu Solidariedade Sosiál, Ministériu Justisa no Provedoria Direitus Umanus no Justisa.
Primeiru-Ministru, Rui Maria de Araújo, iha serimónia entrega prémiu hirak ne’e nian, hateten katak liuhusi aprovasaun ba Dekretu Lei kona-ba distinsaun no prémiu Funsaun Públika nian, Governu hakarak reitera katak Funsaun Públika tenke hala’o serbisu ho baze ba méritu. Tanba ne’e, Xefe Ezekutivu husu ba agrasiada no louvadu sira ne’ebe simu premiu atu tane aas valór Funsaun Públika nian sira, sai ezemplu no referénsia ba Funsaun Públika tomak, hahú kedas husi sira-nia ambiente servisu nian rasik.
Rui Maria de Araújo, iha biban ida ne’e, fó elojiu maka’as ba feto sira tanba iha tinan 2016, Órden Méritu nian husi Funsaun Públiku ne’ebe aas liu, feto sira maka hetan barak liu, hodi hatutan katak ne'e hanesan ezemplu moris ne’ebé hatudu kualidade feto Timor-Leste nian. Primeiru-Ministru mós dezeja atu tinan oin bele iha fali agrasiadu no louvada sira seluk.
Husi nia parte, Prezidente Komisaun Funsaun Públika, Faustino Cardoso Gomes, hateten katak Distinsaun no Prémiu husi Funsaun Públika, tuir lei, fó ba instituisaun ezemplár sira iha Estadu RDTL no ba traballadór sira husi Administrasaun Públika ne’ebe hatudu dezempeñu, efisiénsia, efikásia no dedikasaun profisionál ne’ebé aas, aleinde kumprimentu ba devér funsionál ida-idak nian.
Faustino Cardoso, lori Komisaun Funsaun Públika nia naran, kongratula no hato’o apresiasaun ne’ebé aas ba funsionariu públiku hirak ne’ebe hetan prémiu iha tinan ida ne’e, no husu ba sira atu haka’as an liután iha sira-nia dezempeñu profisionál, sai ezemplu ba sira seluk hodi serbi ho di’ak liután povu no Estadu Timor-Leste.
Tuir Dekretu Lei n. 41/2015, Distinsaun no Prémiu iha kategoria rua, individuál no institusionál. Iha kategoria individuál, funsionáriu ne’ebé selesionadu sei hetan Orden Méritu nian husi Funsaun Públika no Louvór no iha kategoria instituisaun nian, sei hetan Diploma Onra nian no Prémiu Institusionál husi Primeiru-Ministru. Premiadu husi Orden Méritu nian husi Funsaun Públika iha mós direitu ba prémiu monetáriu ho montante dolar amerikanu rihun tolu no progresaun estraordinariu ba eskalaun rua dala ida. Premiadu sira ne’e nia naran sei publika mós iha Jornál Repúblika nian.
