Governu Timor-Leste

Prezidénsia Konsellu Ministrus

VIII Governu Konstitusionál

...........................................................................................................................

Komunikadu Imprensa

Sorumutuk Konsellu Ministrus nian iha loron 28 fulan-dezembru tinan 2022

Konsellu Ministrus hala’o sorumutuk iha Palásiu Governu, iha Dili no aprova ona projetu Dekretu-Lei, ne’ebé aprezenta husi Ministru Ensinu Superiór, Siénsia no Kultura, Longuinhos dos Santos, kona-ba Rejime jurídiku klasifikasaun no inventariasaun beins interese kulturál nian, nune’e mós regra sira ne’ebé aplika ba ninia esportasaun no importasaun.

Diploma ida-ne’e ho ninia objetivu atu prezerva, defende no valoriza beins móvel, konjuntu ba beins móvel no imovel sira ne’ebé klasifika ka propoin ona ba klasifikasaun no beins imovel sira ne’ebé tama ona iha zona protesaun nian.

…..

Aprezenta mós hosi Ministru Ensinu Superiór, Siénsia no Kultura, aprova ona projetu Dekretu-Lei ba alterasaun dahuluk ba Dekretu-Lei n. 33/2017, loron 6 fulan-setembru, kona-ba rejime jurídiku patrimóniu kulturál nian.

Diploma ida-ne’e ho ninia objetivu atu introdús melloria iha prosedimentu klasifikasaun patrimoniál nian no halo alterasaun ba norma kona-ba direitu proprietáriu, na’in, titulár ba direitu reál sira seluk kona-ba beins ne’ebé klasifika ka propoin ona ba klasifikasaun.

…..

Halo aprovasaun mós ba projetu Dekretu-Lei, ne’ebé aprezenta husi Ministru Defeza, Filomeno da Paixão de Jesus, kona-ba Regulamentu Medalla Militár no Medalla Komemorativa Defeza no F-FDTL nian.

Diploma ida-ne’e ho ninia objetivu atu kria no regula kondisaun atribuisaun nian ba modalidade medalla militár sira ne’ebé ho intensaun atu fó prémiu ba servisu ho valór aas tebetebes ne’ebé hala’o ba FALITINL – Forsa Defeza Timor-Leste (F-FDTL) no ba Nasaun no mós halo distinsaun ba virtude importante ne’ebé hatudu iha servisu husi militár sira F-FDTL nian. Medalla militár ne’e bele mós atribui ba militár estranjeiru no sivíl nasionál ka estranjeiru, iha situasaun ne’ebé prevee iha Regulamentu ida-ne’e.

Medalla militár ne’e inklui modalidade sira tuirmai ne’e: a) Valór militár; b) Cruz de guerra (Krús funu nian); c) Servisu distintu sira; d) Méritu militár; e) F-FDTL; f) Komportamentu ezemplár; g) Komemorativa kampaña; no h) Komemorativa ba komisaun servisu espesiál sira.

…..

Konsellu Ministrus delibera ona hodi aprova Planu Lejizlativu Governu nian ba tinan 2023, ne’ebé aprezenta husi Ministru Prezidénsia Konsellu Ministrus. Planu lejizlativu ne’e elabora ona bazeia ba proposta ne’ebé submete husi membru Konsellu Ministrus sira no konsiste previzaun intervensaun lejizlativa Governu nian ida no ninia prioridade sira, ne’ebé fahe ba setór sira, ba tinan 2023. Planeamentu lejizlativu nu’udar instrumentu ne’ebé konsagra ona iha Polítika Reforma Lejizlativa nian hodi hadi’a kualidade atividade lejizlativa Governu nian.

Ba tinan 2023, kona-ba dezenvolvimentu kapitál sosiál nian prevee ona intervensaun lejizlativa 31, iha dezenvolvimentu ba infraestrutura prevee ona totál intervensaun lejizlativa 27, iha dezenvolvimentu ekonómiku planu lejizlativu aprezenta intervensaun lejizlativa 33, iha área konsolidasaun governativa prevee ona intervensaun lejizlativa 35 no kona-ba governasaun di’ak no kombate korrupsaun ho kálkulu totál   ba inisiativa lejizlativa hamutuk 79.

…..

Konsellu Ministrus, tuir projetu ne’ebé aprezenta husi Ministru Obras Públikas, Abel Pires da Silva, delibera ona hodi aprova prosedimentu aprovizionamentu ba reabilitasaun no manutensaun estrada Hatubuiliku - Letefoho (KM 11+ 900 to’o KM 30 +307.88), ho valór globál dolar amerikanu millaun 25,5, sei finansia tuir akordu empréstimu ho Banku Mundiál.

…..

Ministru Finansas, Rui Augusto Gomes, halo ona aprezentasaun ida kona-ba inisiativa kriasaun estratéjia ba reforma jestaun finansas públika Timor-Leste tinan 2022-2027 nian.

Estratéjia ida-ne’e ho objetivu atu hametin polítika fiskál, atu mellora disiplina fiskál no estabilidade makroekonómika, hadi’a mobilizasaun rekursu públiku sira ho konsistente tuir prioridade ne’ebé define ona iha PED 2011-2030 nian, promove efisiénsia iha utilizasaun rekursu públiku no hadi’a ezekusaun orsamentál no promove prestasaun kontas liuhusi supervizaun esterna, transparénsia no orsamentasaun.

…..

Vise-Ministru Komérsiu no Indústria, Domingos Lopes Antunes, aprezenta ona ba Konsellu Ministrus opsaun polítika lejizlativa ne’ebé sai hanesan baze ba inisiativa kriasaun rejime jerál ida ba kontrolu metrolójiku legál.

Inisiativa ida-ne’e ho nia objetivu atu regula uzu instrumentu sira medisaun, unidade medida, unidade padraun, métodu medisaun no instrumentu sasukat todan nian.  Objetivu mós atu determina entidade hirak ne’ebé maka kompetente ba kontrolu metrolójiku no ba ninia inspesaun no fiskalizasaun. REMATA