Komunikadus
- 10 outubru 2018Sorumutu Konsellu Ministru loron 10 fulan-outubru tinan 2018Prezidénsia Konsellu Ministrushare tan
VIII Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus nian iha loron 10 fulan-Outubru tinan 2018
Konsellu Ministru reuni iha Palásiu Governu, iha Díli, no analiza tiha aprezentasaun hosi Ministru Transporte no Komunikasaun, José Agustinho da Silva, kona-ba projetu ligasaun liuhosi transporte maritimu ba área tomak kosta norte Timor-Leste nian. Projetu ida-ne’e nuudar rezultadu hosi koperasaun entre Governu Timor no Governu Alemaña, ne’ebé hahú ona iha tinan 2004, hodi dezenvolve transporte maritima no infraestrutura maritimu sira. Komponente prinsipál hosi projetu ne’e maka sei halo kontrusaun ba ró-ahi foun ba pasajeiru hodi halo ligasaun maritima ba kosta norte tomak. Projetu ne’e, ho apoiu hosi Governu Japaun, kontempla mós konstrusaun ba terminal foun ba pasajeiru iha Díli no halo reabilitasaun infraestrura ba terminal Oecusse no Ataúro.
Ministru Estadu Prezidénsia Konsellu Ministru, Agio Pereira, aprezenta tiha proposta, ne’ebé Governu aprova tiha, Dekretu-Lei kona-ba orgánika ba Prezidénsia Konsellu Ministru (PKM), nuudar departamentu sentrál Governu nian ne’ebé ho misaun hodi fó apoiu ba Konsellu Ministru no ba Primeiru Ministru, promove kordenasaun interministeriál hosi Governu, nomós prosedimentu lejizlativu ba Governu. Estrutura foun PKM nian mosu ho kriasaun Ministériu Reforma Lejizlativa no Asuntu Parlamentár hodi fó ba Ministériu refere kompeténsia balu be ulukba nuudar PKM nian. Ida fali maka tan haree ba esperiénsia be liu ona tinan sanulu ho estrutura uluk ne’ebé halo, iha situasaun balu, buka atu simplifika servisu sira tan ne’e, halakon tiha estrutura intermédia ne’ebé konsidera katak ladun importante. Iha sorin seluk, ho estrutura foun ne’e buka atu hakat dookliu, hodi presta servisu foun atu funsionamentu Governu bele di’ak no efikaz liu hodi fó benefísiu ba populasaun nomós hodi hadi’ak liután servisu PKM nian liuliu, bainhira presta servisu ba ministériu seluk tanba PKM, tuir ninia natureza servisu nuudar ministériu instrumental ne’ebé presta servisu ba ministériu seluk.
Konsellu MInistru aprova tiha mós proposta Dekretu-Lei ne’ebé Ministru Reforma Lejizlativa no Asuntu Parlamentár, Fidelis Manuel Leite Magalhães, aprezenta kona-ba lei orgánika hosi Ministériu Reforma no Asuntus Parlamentares, nuudar entidade ne’ebé responsavel ba konsesaun, ezekusaun, kordenasaun no halo avaliasaun ba polítika, be define no aprova ona iha Konsellu Ministru, kona-ba dezenvolvimentu, armonizasaun no konsolidasaun ordenamentu jurídiku, reforma judisiária, asuntu parlamentar sira no komunikasaun sosiál.
Ministru transporte no komunikasaun, aprezenta tiha mós proposta Dekreteu-Lei kona-ba alterasaun dahuluk ba Dekretu-Lei ne’ebé aprova lei baze ba aviasaun sívil. Dekretu-Lei ne’ebé Konsellu Ministru aprova ne’e buka atu klasifikasaun ba aeroportu internasionál ne’e bele realiza liuhosi Rezolusaun Governu, tuir proposta hosi membru Governu responsável ba área transporte.
Konsellu Ministru aprova tiha mós Rezolusaun Governu kona-ba naran ‘’hinode-bashi’’, iha lian japonéz dehan lorosa’e, maka ponte komoro tolu ne’ebé maka kontrusaun ponte ne’e nuudar doasaun hosi Governu no povo Japaun.
Konsellu Ministru aprova tiha mós Rezolusaun Governu kona-ba donativu ba Repúblika Indonézia nuudar respota hodi fó apoiu ba destruisaun ne’ebé provoka hosi rai-nakdoko ho magnitude 7,5 skala ritser no tsunami ne’ebé akontese iha illa Sulawesi, iha loron-28 setenbru 2018. Nune’e, Governu aprova tiha montante 750 mil dollar amerikanu hodi apoia nuudar resposta hodi hatán ba nesesidade ne’ebé provoka tan estragus ne’ebé mosu hosi tsunami.
Membru Governu sira asina tiha Deklarasaun Maubisse faze daruak kona-ba medida lubuk ida ne’ebé buka atu asegura prinsípiu inkluzaun, toleránsia no igualdade jéneru. Medida hirak-ne’e, preveé ona iha Planu Dezenvolvimentu Estratéjiku nasionál no reflete iha Programa VIII Governu Konstitusionál nian, reprezenta asaun governativa ida transversal ba ezekutivu hotu hodi reforsa kapasidade no poder sosioekonómiku feto sira no ema ho defisiensia.
Ikusmai Konsellu Ministru aprova tiha Rezolusaun Governu kona-ba aprovasaun kontratu ba akizisaun interese partisipativu no direitu iha Kampu Greater Sunrise, partisipasaun Timor-Leste nian iha operasaun petrolifera no transferénsia interese partisipativu hirak-ne’e rasik no direitu sira afavór ba Timor Gap, EP ka ninia subsidiária hodi bele hetan no jere sasán hirak-ne’e lori Timor-Leste no en reprezentasaun Estadu Timor-Leste. REMATA - 03 outubru 2018Sorumutuk Konsellu Ministru loron 3 fulan-outubru tinan 2018Prezidénsia Konsellu Ministrushare tan
VIII Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus nian iha loron 3 fulan-Outubru tinan 2018
Konsellu Ministru hala’o sorumutuk iha Palásiu Governu, iha Dili, no analiza aprezentasaun husi Prezidente Autoridade Rejiaun Administrativa Espesiál Oekusi Ambenu (RAEOA) no Zona Espesiál ba Ekonomia Sosiál Merkadu Timor-Leste nian (ZEESM TL), Dr. Marí Bin Amude Alkatiri. Prezidente RAEOA no ZEESM’s, aprezenta ona ba Konsellu Ministrus rezultadu orsamentál sira hahú husi tinan 2015, proposta orsamentál ba tinan 2019 no pontu situasaun ba projetu sira ne’ebé hala’o hela. Hahú kedas tinan 2015 dezenvolve ona projetu 182, iha koordenasaun ho Governu sentrál, ne’ebé inklui konstrusaun aeroportu, luron, ponte no sistema sira irrigasaun nian.
Governu analiza mós aprezentasaun kona-ba “Planu dezenvolvimentu ekonomia ida sustentavel ba eko-turizmu mariñu iha Timor-Leste”. Planu ida-ne’e aprezenta proposta ida hodi transforma Timor-leste, iha tinan haat oin-mai, ba referénsia ida nivel sudeste aziátiku iha turizmu luku-tasi nian no hodi haree baleia sira. Planu dezenvolvimentu ba ekonomia ida sustentavel eko-turizmu mariñu nian iha Timor-Leste ne’e, buka oinsá tulun halo peskiza ne’ebé maka presiza no halo kobertura liuhusi média, hodi hatuur Timor-Leste iha mapa eko-turizmu ba nivel globál. Nune’e mós hakarak tulun atu kria lojístika no infraestrutura ida nesesária hodi protege no konserva vida mariña nian tomak.
Konsellu Ministrus aprova ona proposta Rezolusaun Governu nian, ne’ebé mak aprezenta husi Ministériu Administrasaun Estatál, ba kriasaun Misaun Apoiu ba Prosesu Resenseamentu Eleitorál Guiné-Bisau nian (MAPRE-GB tinan 2018), ba eleisaun oin-mai loron 18 fulan-novembru tinan 2018.
Kriasaun MAPRE-GB tinan 2018 ne’e tuir pedidu atu apoia hodi organiza no realiza resenseamentu eleitorál ne’ebé Guiné-Bisau husu, hodi rekoñese kontributu importante ne’ebé maka misaun timoroan nian rua hodi apoia ba prosesu eleitorál Guiné-Bisau nian, ne’ebé estabelese tiha ona iha tinan 2013 no 2014, hodi bele hala’o eleisaun livre no justu iha país ne’ebá.
MAPRE-GB tinan 2018 sei fó asisténsia téknika no promove asaun sira formasaun no kapasitasaun rekursus umanus husi órgaun administrasaun eleitorál Guiné-Bisaun nian no promove preparasaun teknolójika ba hala’o resenseamentu eleitorál. Rezolusaun Governu nian ne’e, aprova hodi nomeia Tomás do Rosário Cabral ho kargu Xefe MAPRE-GB tinan 2018 no defini limite orsamentu sira ba misaun ne’e.
Governu aprova ona proposta Dekretu Governu, ne’ebé aprezenta husi Ministra Finansas en ezersísiu, Sara Lobo Brites, kona-ba ezekusaun Orsamentu Jerál Estadu nian (OJE) ba tinan 2018. Ho diploma ida-ne’e, aprova ona norma no prosedimentu ezekusaun, monitorizasaun no reporte ne’ebé bele aplika ba OJE no ba Seguransa Sosiál ba tinan 2018 nian, ne’ebé mak importante tebtebes tanba bele halo akompañamentu ida rigorozu no adekuadu ba ezekusaun orsamentál, hanesan instrumentu ne’ebé di’ak liu hodi bele kumpri loloos prinsípiu no liña orientadora sira ne’ebé fiksa ona iha OJE ba tinan 2018.
OJE tinan 2018 nian ne’ebé tama ona iha vigor, fó ona dalan atu ezekusaun orsamentál bele tama fali ba normalidade, no bele hatan ba nesasidade prioritária sira, tulun atu rekupera fali orsamentu ekonómiku, kria kondisaun di’ak hodi hala’o Governu Konstitusionál VIII, no, liuliu, harii daudaun ona baze sira ba ezekusaun programa governasaun nian.
Konsellu Ministrus aprova ona proposta Dekretu-Lei kona-ba Lei Orgánika husi Ministériu Petróleu no Minerál, entidade governamentál ho responsabilidade iha konsesaun, ezekusaun, implementasaun, avaliasaun no akompañamentu polítika ne’ebé defini no aprova ona husi Governu ba área enerjia nian, hanesan mina-rai, gás no rekursus minerais. Ho aprovasaun lei orgánika ne’e, hakarak atu hatuur Ministériu ida-ne’e ho estrutura ida dinámika no efisiente, ne’ebé bele hatan ba ezijénsia téknika sira-ne’ebé mosu beibeik husi atividade hirak-ne’e no, nune’e, sei ezerse orientasaun no kontrolu ida adekuadu, inklui mós matéria kona-ba lisensa ambientál.
Aprova ona mós iha sorumutuk Konsellu Ministrus nian, proposta Dekretu-Lei kona-ba Lei Orgánika Ministériu ba Asuntus Kombatentes Libertasaun Nasionál, hodi hatuur Ministériu ne’e ho estrutura organizasaun no funsionamentu nian ida ne’ebé permite prosekusaun kona-ba ninia atribuisaun hodi hala’o didi’ak ninia knaar, hala’o ninia jestaun servisu sira ho di’ak no rekursus umanus ne’ebé mak iha ona. Ministériu Asuntus Kombatentes Libertasaun Nasionál ninia misaun mak atu kria, ezekuta, koordena no avalia polítika, ne’ebé define no aprova husi Konsellu Ministrus, ba área sira asuntus kombatentes libertasaun nasionál nian, hodi rekoñese no valoriza, tuir hatuur ona iha Konstituisaun Repúblika Demokrátika Timor-Leste, rezisténsia tinan barak Povu Maubere nian hasoru domíniu estranjeiru no responsabilidade Estadu nian hodi garante protesaun espesiál ba ema hotu-hotu ne’ebé partisipa iha rezisténsia tanba okupasaun estranjeira.
Konsellu Ministrus halo ona aprovasaun ba proposta Rezolusaun Governu kona-ba Nomeasaun Membru sira Komité Polítiku Revizaun OJE nian ba tinan 2019, ho objetivu atu haree oinsá bele aloka estratéjia husi reskursu sira atubele atinje kompromisu no objetivu sira ne’ebé hakerek iha dokumentu estratéjiku sira no kumpri ho rigor ba planu sira tinan finanseiru 2019, ba elaborasaun proposta OJE nian ne’ebé maka sei entrega ba Parlamentu Nasionál to’o loron 8 fulan-novembru tinan 2018. Prezidente ba Komité ne’e maka Primeiru-Ministru, Vise-Prezidente maka Ministra Finansas en ezersísiu, hanesan membru sira maka Ministru Estadu Prezidénsia Konsellu Ministrus no Ministru Planeamentu no Investimentu Estratéjiku en ezersísiu, Ministru Negósius Estranjeiru no Kooperasaun, Ministru Obras Públikas, Ministru Agrikultura no Peskas, no nu’udar observadór sira maka Ministru Reforma Lejizlativa no Asuntus Parlamentares no Sekretária Estadu ba Igualdade no Inkluzaun. REMATA - 02 outubru 2018ConocoPhillips no Governu Timor-Leste sei halao akordo kona-ba termus venda husi interese iha Greater SunriseGOVERNU TIMOR-LESTE NO CONOCOPHILLIPShare tan
KOMUNIKADU KONJUNTU
Loron 2, fulan-outubru, tinan 2018
ConocoPhillips no Governu Timor-Leste konkorda termu fa’an nian kona-ba partisipasaun iha kampu Greater Sunrise
Perth/Dili – Governu Timor-Leste no ConocoPhillips (NSYE: COP) hetan ona akordu kona-ba termu fa’an nian ba partisipasaun pursentu 30 ConocoPhillips nian iha Kampu Greater Sunrise.
Primeiru-Ministru Timor-Leste hato’o felisitasaun ba Parte rua tanba hetan ona akordu ne’ebé benefisia parte rua ne’e hotu no sei fó dalan ba Timor-Leste atu kontinua halo diskusaun ho membru sira-seluk husi Joint Venture Greater Sunrise nian kona-ba dezenvolvimentu Rekursu Greater Sunrise iha futuru.
Reprezentante Espesiál Timor-Leste nian, Xanana Gusmão, hateten katak “ ConocoPhillips no parseiru Joint Venture sira-seluk sempre koñese preferénsia Timor-Leste nian atu dezenvolve Greater Sunrise liuhusi kadoras-mina nian ba Beasu iha parte tasi-mane Timor-Leste nian. Timor-leste hein katak bele serbisu hamutuk ho membru Joint Venture nian sira-seluk atu dezenvolve projetu ne’e ho susesu”.
Partisipasaun ConocoPhillips nian ne’ebé sosa husi Governu depende ba aprovasaun kona-ba finansiamentu husi Konsellu Ministrus no husi Parlamentu Nasionál Timor-Leste nian, nune’e mós autorizasaun regulamentár sira no direitu espesiál parseiru sira nian.
Prezidente ConocoPhillips Austrália-Osidente, Chris Wilson, hateten katak desizaun atu fa’an partisipasaun ne’e mosu hafoin abordajen ida husi Governu Timor-Leste.
“Ami respeita preferénsia Governu Timor-Leste nian atu dezenvolve kampu sira Sunrise nian liuhusi instalasaun GNL nian foun ida ne’ebé ninia baze hatuur iha Timor-Leste. Maske ami nia hanoin la hanesan liga ba proposta kona-ba opsaun dezenvolvimentu ekonómiku nian, ami rekoñese importánsia husi Sunrise ba Nasaun Timor-Leste no fiar katak ami-nia partisipasaun ne’ebé ami fa’an ba Governu bele fó dalan hodi la’o ba oin iha ninia vizaun ba dezenvolvimentu Sunrise nian”, hateten Wilson.
“Ami sente orgullu ho ami-nia kontributu importante ba dezenvolvimentu Timor-Leste nian no ami-nia relasaun ho Governu, ne’ebé sei kontinua liuhusi ami-nia partisipasaun no operasaun husi kampu Bayu-Undan nian. Folin fa’an nian ne’ebé negoseia maka besik millaun USD 350 liuliu rekupera fali kustu sira ne’ebé ConocoPhillips hasai ona iha ligasaun ho kampu sira Greater Sunrise nian.”
Tranzasaun kona-ba fa’an kobre partisipasaun husi ConocoPhillips iha Kontratu Partilla Produsaun 03-19 no 03-20 no iha Arrendamentu sira Retensaun nian NT/RL2 no NT/RL4. Tranzasaun ne’e sei remata iha trimestre dahuluk tinan 2019.
Kampu gás nian sira no kondensadu Sunrise no Troubadour, ne’ebé baibain koñesidu nu’udar kampu Greater Sunrise, lokaliza besik kilómetru 150 iha sudeste Timor-Leste nian no kilómetru 450 iha noroeste Darwin, Territóriu Norte nian.
Parseiru atuál sira ba joint venture Sunrise nian maka hanesan Woodside (operadora) ho partisipasaun 33,4%, ConocoPhillips (30%), Shell (26,6%) no Osaka Gas (10%).
Kontaktu ba media
Michael Marren
+61 8 636 32644 (eskritóriu)
+61 477 739 478 (telemóvel)
Michael.A.Marren@conocophillips.com
Jose Lobato (ba media iha lian tétum ka portugés)
+61 8 6363 4001 (eskritóriu)
+61 670 723 085 (telemóvel)
jose.lobato@conocophillips.com
Agio Pereira
+670 77045002
pcm.gov.tl@gmail.com
govtlmedia@gmail.com
www.timor-leste.gov.tl
- 02 outubru 2018Governu hato’o ninia solidariedade ba IndonéziaPrezidénsia Konsellu Ministrushare tan
VIII Governu Konstitusionál
...........................................................................................................................
Komunikadu Imprensa
Governu hato’o ninia solidariedade ba Indonézia
Lori povu Timor-Leste nia naran, Governu hato’o kondolénsia ba família no belun sira husi vítima husi rai nakdoko tutuirmalu ne’ebé atinji pontu aas liu ho tsunami ida iha Palu, iha illa Sulawesi, Indonézia nian, iha loron-sesta, loron 28 fulan-setembru. Governu hato’o mós ninia solidariedade ba Governu no povu Indonézia, ne’ebé maka hasoru dezastre naturál boot ne’e.
Rejiaun Palu mak área ida-ne’ebé besik liu no afetada liu husi rai nakdoko, ho magnitude 7,5 eskala Richter ne’e, no tsunami ne’ebé provoka husi rai-nakdoko ne’ebé makaas.
Rejiaun ne’e hetan estragu maka’as liu tanba rai-nakdoko no tanba tsunami ne’ebé mak akontese tuirmai, no afeta ba ema rihun ba rihun hodi halo ema barak maka lakon sira-nia vida, kanek no balu lakon seidauk hetan. Ekipa sira salvamentu nian kontinua buka nafatin mate-restu sira.
Governu Timor-Leste hahí servisu husi autoridade sira iha asaun atu buka tuir no salva iha kondisaun sira ne’ebé susar tebes. REMATA - 26 setembru 2018Sorumutuk Konsellu Ministrus nian iha loron 26 fulan-setembru tinan 2018Prezidénsia Konsellu Ministrushare tan
VIII Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus nian iha loron 26 fulan-Setembru tinan 2018
Konsellu Ministrus hala’o sorumutuk iha Palásiu Governu, iha Dili, no analiza ona aprezentasaun husi Ministru Estadu Prezidénsia Konsellu Ministrus, Agio Perreira, ne’ebé liga ba pontu situasaun kona-ba negosiasaun atu rezolve kestaun téknika sira ba ratifikasaun Tratadu Tasi Timor nian.
Membru Governu sira diskute kestaun sira ne’ebé relasiona ho orsamentu Estadu nian ba tinan 2019, hafoin, iha semana liubá halo aprovasaun ba limite másimu husi orsamentu ne’e no distribuisaun envelope fiskál liña ministeriál hotu-hotu nian ne’ebé maka horiseik Ministériu Finansas halo ona . Ministra Finansas iha ezersísiu, Sara Lobo Brites, husu ba Ministériu hotu-hotu atu respeita limite másimu ne’ebé hetan ona aprovasaun ne’e bainhira halo planu kona-ba orsamentu Ministériu ida-idak nian.
Konsellu Ministrus debate ona mós kona-ba difikuldade sira ne’ebé mosu tanba rejime duodésimu, liuliu situasaun difisil kona-ba fornesimentu kombustivel ba eletrisidade, tanba orsamentu ba tinan fiskál 2018 nian ne’e sei hein hela promulgasaun husi Prezidente Repúblika, Francisco Guterres Lú Olo.
Ikusliu, Ministru Reforma Lejizlativa no Asuntus Parlamentares, Fidelis Magalhães, aprezenta mós ba Konsellu Ministrus informasaun no rezultadu sira husi Asembleia Jerál BNCTL nian, ne’ebé Estadu maka sai hanesan asionista. Aprezenta ona lukru ne’ebé BNCTL hetan iha tinan 2017 no avalia mós proposta kona-ba kapitalizasaun Banku ne’e nian atu aumenta tan ninia kapitál, atu nune’e BNCTL bele prontu atu hasoru situasaun finanseira saida de’it no bele habelar liután ninia produtu sira, hodi nune’e sai atrativu liután ba populasaun. Iha sorumutuk ne’e, halo mós debate kona-ba proposta atu fó ba BNCTL, sasán imovel Estadu nian hirak ne’ebé maka oras ne’e daudaun Banku utiliza hela, atu sasán sira-ne’e bele sai-hanesan patrimóniu BNCTL nian. REMATA - 21 setembru 2018Sorumutuk Konsellu Ministrus nian iha loron 21 fulan-setembru tinan 2018Aprova onahare tan
1 - Kontinuasaun husi rejime duodésimu durante fulan-setembru;
2 - Limite másimu husi orsamentu ba tinan fiskál 2019 nian;
3 - Autorizasaun ba Ministru Defeza atu asina akordu entre Governu Repúblika Demokrátika Timor-Leste no Governu Japaun
4 - Suplementu remuneratóriu ba funsionáriu sira no ajente sira husi Ministériu Edukasaun, Juventude no Desportu ne’ebé hala’o serbisu iha prosesu preparasaun no implementasaun prova nasionál no ezame nasionál sira
Analiza ona
1 - Akordu atu troka nota entre Governu Repúblika Demokrátika Timor-Leste no Governu Japaun
2 - Relatóriu kona-ba misaun esploratória apoiu nian husi Timor-Leste ba eleisaun iha loron 18 fulan-novembru tinan 2018 oin-mai, iha Repúblika Giné-Bisau - 07 setembru 2018Governu felisita Primeiru-Ministru foun Austrália nianPrezidénsia Konsellu Ministrushare tan
VIII Governu Konstitusionál
...........................................................................................................................
Komunikadu Imprensa
Governu felisita Primeiru-Ministru foun Austrália nian
Governu Timor-Leste hato’o felisitasaun ba Scott John Morrison ba ninia nomeasaun hanesan Primeiru-Ministru Austrália nian no dezeja susesu ne’ebé boot liután iha ninia funsaun nobre sira ne’ebé nia hala’o.
Timor-Leste no Austrália partilla ligasaun istóriku no espesiál ida ne’ebé kesi Povu rua ne’e, hahú husi Funu Mundiál Daruak, no ligasaun ida-ne’e ita sei haforsa ho selebrasaun Aniversáriu Misaun INTERFET nian da-20, ne’ebé maka sei hala’o iha tinan 2019 oinmai.
Nasaun rua ne’e partilla mós interese komún sira ne’ebé favoravel ba pás, estabilidade, seguransa, dezenvolvimentu no progresu, no daudaun ne’e sai ami-nia parseiru ne’ebé boot liu iha esforsu atu konsolida Estadu Direitu Demokrátiku ida, ne’ebé seguru, saudavel, moris-di’ak no reziliente.
Ho susesu ne’ebé ita hetan foin daudaun ne’e iha aprovasaun ba Tratadu kona-ba Ketan Tasik, iha hela faze ratifikasaun nian, ita fó ona ezemplu boot ida ba Mundu no fó fila-fali impulsu atu haforsa ita-nia lasu konfiansa no lasu amizade fraternál nian.
Primeiru-Ministru, Taur Matan Ruak, iha ninia karta felisitasaun nian ne’ebé haruka ba Primeiru-Ministru foun Austrália nian, hatete katak nia iha “esperansa boot atubele, ho apoiu Scott John Morrison nian, hetan rezultadu di’ak sira iha negosiasaun sira ne’ebé la’o hela kona-ba rekursu sira Greater Sunrise nian, atu nune’e bele aumenta liután ninia benefísiu ba populasaun no dezenvolvimentu ekonómiku Timor-Leste nian.
Taur Matan Ruak hatudu mós “ninia hakarak atu kontinua hametin lasu amizade, solidariedade no kooperasaun nian ne’ebé besik ne’ebé kesi metin país rua ne’e”, hodi manifesta “onra no priviléjiu” atubele simu Primeiru-Ministru Austrálianu nian iha Timor-Leste. REMATA - 27 agostu 2018Governu hato’o kondolénsia ba Keith Hayes ninia matePrezidénsia Konsellu Ministrushare tan
VIII Governu Konstitusionál
...........................................................................................................................
Komunikadu Imprensa
Governu hato’o kondolénsia ba Keith Hayes ninia mate
Ho laran todan tebes maka Governu Repúblika Demokrátika Timor-Leste simu notísia kona-ba Sr. Keith Hayes, veteranu autralianu ida no mate-restu husi funu mundiál daruak nian, ninia mate.
Keith Hayes, hafoin hetan kanek iha tiru-malu durante funu mundiál daruak nian iha Timor-Leste, família Timor nian ida maka salva nia, hodi marka inísiu husi amizade boot ida ho ami-nia povu ne’ebé dura iha nia moris tomak.
Keith, aleinde hatudu ninia aten-barani ne’ebé boot tebes nu’udar komandu iha funu laran, bainhira fila ba Austrália nia luta nafatin. Ho empatia ne’ebé kle’an no preokupasaun maka nia apoia ativamente povu Timor, inklui mós iha ita-nia luta ba liberdade no ukun rasik an, nune’e mós ita-nia esforsu atu dezenvolve ita-nia nasaun foun ne’e. Apoiu durante moris tomak ne’e hanesan naroman ida iha relasionamentu entre ita-nia país rua ne’e no hatudu ona mai ita hotu posibilidade solidariedade nian entre ita-nia povu sira. Ami mantein ninia amizade iha ami-nia fuan no ami lamenta australianu ida ne’ebé boot tebes duni ninia mate.
Keith sei hetan fatin importante ida iha ami-nia país nia istória no iha ami-nia relasionamentu ho Austrália. Maske nia ema ida ne’ebé maka haraik an no simples, ninia aten-barani, integridade no determinasaun atu luta ba dignidade ema nian no ba povu timoroan nian ami sei la haluha. Iha momentu triste nian ida-ne’e, ami lamenta ninia mate, maibé ami selebra ninia kontributu.
Governu Repúblika Demokrátika Timor-Leste, lori Povu Timoroan nia naran, haruka kondolénsia ba família Keith no agradesimentu husi nasaun ida ne’ebé hatene rekoñese. REMATA