Komunikadus
20 jullu 2018Sorumutuk Estraordinária Konsellu Ministrus nian iha loron 20 fulan-jullu tinan 2018Prezidénsia Konsellu Ministrushare tan
VIII Governu Konstitusionál
...........................................................................................................................
Komunikadu Imprensa
Sorumutuk Estraordinária Konsellu Ministrus nian iha loron 20 fulan-jullu tinan 2018
Konsellu Minsitrus hala’o sorumutuk iha Palásiu Governu, iha Dili, no aprova ona proposta, ne’ebé hato’o husi Ministru Reforma Lejizlativa no Asuntus Parlamentares, Fidelis Maglhães, kona-ba Akordu Finansiamentu Inisiál entre Ajénsia Kooperasaun ba Dezenvolvimentu Millennium Challenge Corporation no Repúblika Demokrátika Timor-Leste, ne’ebé atu disponibiliza fundu sira hodi kria ekipa ida ne’ebé sei nu’udar responsavel ba identifikasaun setór ekonómiku sira ne’ebé dezenvolve hela no hatama iha programa Millennium Challenge Compact. Ekipa ne’e sei hala’o servisu iha fulan 18 to’o fulan 24 nia laran hodi halo programa ne’ebé atu hadi’a kreximentu ekonómiku no hamenus kiak iha Timor-Leste, no sei implementa iha tinan 2020 to’o tinan 2025.
Primeiru-Ministru, Taur Matan Ruak, aprezenta proposta, ne’ebé aprova ona husi Konsellu Minsitrus, kona-ba indikasaun Sérgio Hornai nian hanesan kandidatu ba kargu Komisáriu ba Komisaun Anti-Korrupsaun (KAK). Oras ne’e Parlamentu Nasionál sei hili entre Sérgio Hornai no Komisáriu atuál, Adérito Tilman, ne’ebé Governu propoin iha Sorumutuk Konsellu Ministrus iha loron 13 fulan-jullu tinan 2018.
Governu aprova ona proposta kona-ba Tetu Orsamentál (limite másimu orsamentu nian) ba tinan 2018 ne’ebé aprezenta husi Ministra Fiansas iha ezersísiu, Sara Lobo Brites, ho valór millaun dolár amerikanu hamutuk $1.218. Tetu orsamentál ne’ebé aprova ona, konsidera despeza sira ne’ebé iha relasaun ho estrutura governativa, tusan no kompromisu ne’ebé halo ona no orsamentu adisionál ba Fundu Infraestrutura sira.
Konsellu Ministrus aprova ona Programa Governu Konstitusionál VIII nian, hafoin halo análize ba alterasaun ne’ebé ministériu lubun ida propoin. Programa Governu VIII nian hakarak atu reflete aspirasaun sira husi povu timoroan sira no medida prioritária sira ba dezenvolvimentu sustentavel, fó atensaun liu ba Planu Estratéjiku Dezenvolvimentu 2011-2030, hodi kontribui atu transforma Timor-Leste ba nasaun ida ho rendimentu médiu-aas, iha ne’ebé populasaun sira bele moris ho seguransa no saudavel, matenek no dezenvolvidu. Dokumentu ne’e entrega ba Parlamentu Nasionál iha loron 20 fulan-jullu. REMATA
16 jullu 2018Sorumutuk Estraordinária Konsellu Ministrus nian iha loron 16 fulan-jullu tinan 2018Analiza ona:hare tan
1- Planu tékniku estratéjiku kona-ba preparasaun Orsamentu Jerál Estadu nian ba tinan 2018
13 jullu 2018Sorumutuk Estraordinária Konsellu Ministrus nian iha loron 13 fulan-jullu tinan 2018Analiza ona:hare tan
1- Planu tékniku estratéjiku kona-ba preparasaun Orsamentu Jerál Estadu nian ba tinan 2018
Aprova ona:
1 - Dekretu Governu nian ne’ebé relasiona ho alterasaun daruak ba Dekretu n. 1/2018, loron 12 fulan-janeiru kona-ba Ezekusaun Orsamentál iha Rejime Duodésimu
2 - Limite másimu ba dotasaun orsamentál temporária sira ba fulan-jullu tinan 2018
11 jullu 2018Sorumutuk Konsellu Ministrus nian iha loron 11 fulan-jullu tinan 2018Prezidénsia Konsellu Ministrushare tan
VIII Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus nian iha loron 11 fulan-jullu tinan 2018
Governu hala’o sorumutuk iha Palásiu Governu, iha Dili, no aprova ona proposta ne’ebé Primeiru-Ministru, Taur Matan Ruak hato’o, kona-ba hanaruk mandatu Komisáriu Komisaun Anti-Korrupsaun (KAK) nian, Adérito Tilman, tanba haree katak mandatu ida daudaun ne’e sei remata iha loron 15 fulan-jullu oinmai no kompete ba Governu atu propoin ba Parlamentu Nasionál kandidatu ne’ebé Plenáriu atu hili.
Konsellu Ministrus aprova ona Proposta Lei ne’ebé relasiona ho autorizasaun estraordinária atu halo transferénsia ida kona-ba Fundu Mina-rai nian, tanba haree katak saldu restu husi ezekusaun orsamentál tinan fiskál anteriór nian la to’o atu asegura despeza sira ne’ebé maihusi atividade Administrasaun Públika nian no tanba Lei ne’ebé vigora daudaun ne’e la haree didi’ak kona-ba situasaun sira iha ne’ebé despeza públika ezekuta tuir rejime duodésimu suplementár ida. Proposta Lei ne’ebé aprova ona ne’e ninia objetivu maka permite finansiamentu ba atividade Administrasaun Públika nian durante periódu ne’ebé rejime duodésimu suplementár vigora.
Ikusliu, Ministru Negósius Estranjeirus, Dionísio Babo Soares, aprezenta ona proposta, ne’ebé hetan aprovasaun husi Konesllu Ministrus, kona-ba Rezolusaun Governu nian ne’ebé relasiona ho donativu ba Reprezentasaun Permanente Repúblika Árabe Saharaui Demokrátika, hodi reafirma solidariedade no apoiu Timor-Leste nian ba luta autodeterminasaun povu Saharaui nian, REMATA- 26 juñu 2018Administrasaun Ministeriál TranzitóriaPrezidénsia Konsellu Ministrushare tan
VIII Governu Konstitusionál
...........................................................................................................................
Komunikadu Imprensa
Dili, loron 26 fulan-juñu, 2018
Administrasaun Ministeriál Tranzitória
Ho konsiderasaun katak Governu Konstitusionál VIII simu pose iha loron-sesta, 22 fulan-juñu liubá, tanba ne’e importa atu hahú, lalais ona, serbisu sira hirak ne’ebé urjente liu iha ministériu ida-idak;
Ho konsiderasaun mós katak membru Governu foun balu seidauk simu pose, liuliu ministru balu, nune’e iha kazu balu, laiha lideransa institusionál ne’ebé prezisa tebes atu halo “tranzisaun pasta” no atu asume kompromisu sira kona-ba jestaun loro-loron ministériu sira nian;
Ho konsiderasaun katak tuir despaxu ida uluk, señór Ministru Estadu no Ministru Prezidénsia Konsellu Ministru nian maka sai nu’udar responsavel ba koordenasaun kona-ba asuntu sira Ministériu Saúde nian, entre sira seluk, bainhira Ministru Saúde seidauk simu pose;
Ho konsiderasaun mós katak Vise-Ministru Saúde nian na’in rua maka simu ona pose no katak Ministériu ne’e parese preparadu atu hala’o daudaun ona serbisu imediatu sira ho lideransa, tranzitória, husi membru Governu rua ne’e ida.
Nune’e, tuir Konstituisaun Repúblika nian, artigu 117.o, n.1, alínea c), Primeiru-Ministru determina hanesan tuirmai:
Ministériu Saúde, tranzitoriamente, lidera husi Vise-Ministra Saúde, Élia António de Araújo dos Reis Amaral, ne’ebé sei asegura koordenasaun kona-ba atividade ministériu nian hotu-hotu.
Delegasaun kompeténsia ba Vise-Ministra ne’ebé maka identifika ona iha númeru liubá ne’e termina, automatikamente, bainhira Ministru Saúde simu pose ba nia funsaun sira, ka bainhira despaxu ne’e espresamente revoga ona.
Revoga ona, iha parte balu, Despaxu n. 002/PM/VI/2018, ne’ebé maka ko’alia kona-ba koordenasaun tranzitória Ministériu Saúde nian husi Ministru Estadu no Ministru Prezidénsia Konsellu Ministrus nian, Agio Pereira. REMATA 
25 juñu 2018Sorumutuk VIII Governu iha loron 25 fulan-juñu tinan 2018Prezidénsia Konsellu Ministrushare tan
VIII Governu Konstitusionál
...........................................................................................................................
Komunikadu Imprensa
Sorumutuk membru sira Governu Konstitusionál VIII nian iha loron 25 fulan-juñu tinan 2018
Governu Konstitusionál VIII hala’o sorumutuk ba dala uluk iha loron-segunda ne’e, 25 fulan-juñu tinan 2018, iha Palásiu Governu, iha Dili.
Primeiru-Ministru, Taur Matan Ruak, hato’o ninia dezeju atu serimónia simu pose ba membru Governu Konstitusionál VIII nian sira seluk bele hala’o iha tempu badak nia laran atu nune’e Programa Governu nian no Orsamentu Jerál Estadu nian bele aprezenta lalais ona.
Primeiru-Ministru garante katak Programa Governu nian sei hatuur iha kompromisu atu hadi’a kualidade moris povu nian, liuhusi dezenvolvimentu área sosiál, infraestrutura, dezenvolvimentu institusionál no ekonómiku.
Primeiru-Ministru husu ba membru Governu sira atubele halo pontu situasaun ida kona-ba kondisaun hirak ne’ebé oras ne’e iha, iha nivel patrimóniu, rekursus umanus no kontratu hirak ne’ebé halo ona atu nune’e bele garante planeamentu ida ne’ebé rigorozu no efikás ba mandatu Governu Konstitusionál VIII nian.
Ministru Estadu no Ministru Prezidénsia Konsellu Ministrus, Agio Pereira, aprezenta ona Rejimentu Konsellu Ministrus nian no Rejime Jurídiku Gabinete Ministeriál sira nian ba Governu. REMATA- 25 juñu 2018Lideransa tranzitória Ministério Finansas no Ministério Administrasaun EstatalPrezidénsia Konsellu Ministrushare tan
VIII Governu Konstitusionál
...........................................................................................................................
Komunikadu Imprensa
Dili, loron 25 fulan-juñu, 2018
Lideransa tranzitória Ministério Finansas no Ministério Administrasaun Estatal
sei publika - 25 juñu 2018Administrasaun Ministerial TranzitóriaPrezidénsia Konsellu Ministrushare tan
VIII Governu Konstitusionál
...........................................................................................................................
Komunikadu Imprensa
Dili, loron 25 fulan-juñu, 2018
Administrasaun Ministerial Tranzitória
Konsidera katak Governu Konstitusionál VIII simu pose iha loron-sesta, 22 fulan-juñu liubá, no tanba ne’e, importante atu trata kedas ona serbisu espesiál “pasajen pasta” husi ministériu sira Governu Konstitusionál VII nian ba ministériu sira Governu atuál nian.
Konsidera katak iha períodu inisiál husi mandatu Governu ida ne’e nian no haree ba faktu katak lei orgánika Governu nian seidauk iha, situasaun hirak ne’ebé bele hamosu hela indefinisaun balu kona-ba atribuisaun ministériu ida-idak nian;
Konsidera mós katak membru Governu foun balun seidauk simu pose, liuliu ministru sira balu, nune’e iha kazu balu, laiha lideransa institusionál ne’ebé presiza tebes atu halo “tranzisaun pasta” no atu asume kompromisu sira kona-ba jestaun loron-loron ministériu sira nian;
Nune’e, tuir Konstituisaun Repúblika nian, artigu 117.o, n.1, alínea c), Primeiru-Ministru determina hanesan tuirmai:
Depende, tranzitoriamente, ba Ministru Estadu no Ministru Prezidénsia Konsellu Ministrus, Agio Pereira, ministériu sira ne’ebé ninia ministru titulár seidauk simu pose. Ministru ne’e maka sei simu kompeténsia atu, ho apoiu husi Vise-Ministru no Sekretáriu Estadu sira husi ministériu sira-ne’e ida-idak ne’ebé simu ona pose, asegura koordenasaun kona-ba setór atividade nian sira-ne’e.
Ministériu sira ne’ebé, tranzitoriamente, depende ba Ministru Estadu no Ministru Prezidénsia Konsellu Ministrus, maka hanesan tuirmai ne’e:
a) Ministériu Turizmu, Komérsiu, Indústria no Ambiente;
b) Ministériu Planeamentu no Investimentu Estratéjiku;
c) Ministériu Defeza;
d) Ministériu Interiór;
e) Ministériu Petróleu no Rekursus Minerais;
f) Ministériu ba Asuntu Kombatente sira nian;
g) Ministériu Saúde.
Iha tempu ne’ebé Ministru titulár sira husi Ministériu hirak ne’ebé temi iha n.2 seidauk simu pose, Vise-Ministru no Sekretáriu Estadu sira ministériu hirak ne’e nian hatán ba Ministru Estadu no Ministru Prezidénsia Konsellu Ministrus.
Ministru Estadu no Ministru Prezidénsia Konsellu Ministrus maka, espesialmente, sai hanesan enkaregadu hodi asegura tranzisaun ba asuntu pendente sira husi Governu anteriór iha ministériu sira ne’ebé temi iha n. 2.
Delegasaun kompeténsia sira ba Ministru Estadu no Ministru Prezidénsia Konsellu Ministrus termina, automatikamente, bainhira ministru titulár husi ministériu ida-idak ne’ebé temi iha n. 2 simu pose ba nia funsaun sira. REMATA
