Komunikadus
- 23 abril 2019Governu Timor-Leste felisita Prezidente eleitu iha IndonéziaPrezidénsia Konsellu Ministrushare tan
VIII Governu Konstitusionál
...........................................................................................................................
Komunikadu Imprensa
Governu Timor-Leste felisita Prezidente eleitu iha Indonézia
Governu Timor-Leste aprezenta felisitasaun boot ba Joko Widodo tanba eleitu filafali nuudar Prezidente Repúblika Indonézia nian no deseja susesu ba nia atu kontinua knaar boot ida-ne’e.
Primeiru-Ministru, Taur Matan Ruak, iha ninia karta felisitasaun ne’ebé haruka ba Prezidente eleitu, fó hanoin filafali katak “Timor-Leste no Indonézia iha relasaun amizade no proximidade espesiál, ne’ebé nuudar fundamental tebes hodi konsolida defeza, seguransa no estabilidade nesesáriu ba progresu no dezenvolvimentu armoniozu Nasaun rua ne’e nian, iha Rejiaun”.
Primeiru-Ministru hato’o mós “iha esperansa boot tebtebes atu aprofunda, liuhosi Joko Widodo ukun filafali, amizade fraterna ne’ebé kesi rai rua no povu rai rua ne’e nian, iha ámbitu oioin atuasaun bilaterál no multilaterál, liuliu iha ita-nia prosesu atu adere ba Asosiasaun hosi Nasaun sira Sudeste Aziátiku nian (ASEAN)”. FIM - 22 abril 2019Governu Timor-Leste hato’o ninia solidariedade ba Sri LankaPrezidénsia Konsellu Ministrushare tan
VIII Governu Konstitusionál
...........................................................................................................................
Komunikadu Imprensa
Governu Timor-Leste hato’o ninia solidaridade ba Sri Lanka
Governu Timor-Leste hato’o ninia solidariedade ba Governu no povu Sri Lanka, liuliu ba komunidade kristaun nian, hafoin atake bomba iha domingu Páskua, loron 21 fulan-abril, iha igreja kristã nian tolu no otél haat iha sidade Colombo, Negombo no Batticaloa, ne’ebé trajikamente halo ema na’in 207 maka mate no na’in 450 kanek.
Governu Timor-Leste kondena atentadu hirak ne’ebé akontese iha Sri Lanka, ne’ebé kauza ema atus rua-resin husi nasaun 36 maka mate, hanesan hahalok violénsia kriminoza, no hato’o ninia laran triste ba família no amigu vítima sira-nian. Timor-Leste hato’o mós ninia apoiu ba Governu no ekipa médika no ekipa seguransa nian tomak, ne’ebé mak halo buat hotu tuir sira-nia kbiit hodi hasoru situasaun trájika no difisil tebes ida-ne’e.
Portavós Governu Konstitusionál VIII nian, Ministru Estadu, Agio Pereira, afirma ona katak “Ami-nia hanoin, iha momentu ida-ne’e, hamutuk ho povu Sri Lanka, no liuliu, ho sira hotu ne’ebé mak afetadu diretamente husi akontesimentu horisehik nian ne’e. Governu Timor-Leste manifesta ninia solidariedade ba povu no Estadu Sri Lanka no ba nasaun sira seluk ne’ebé afetadu husi eventu trájiku ida-ne’e”. REMATA - 17 abril 2019Sorumutu Konsellu Ministrus loron 17 fulan-abril tinan 2019Prezidénsia Konsellu Ministrushare tan
VIII Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus loron 17 fulan-abril tinan 2019
Konsellu Ministrus hala’o sorumutuk iha Palásiu Governu, iha Dili no analiza ona aprezentasaun husi Sekretariadu Grupu Traballu Revizaun Nasionál Voluntária (sigla iha lia inglés VNR- Voluntary National Review) kona-ba Objetivu sira husi Dezenvolvimentu Sustentável (ODS).
Durante aprezentasaun ne’e, Sekretariadu Grupu Traballu submete ba membru Governu sira atu halo konsiderasaun, ba testu ho mensajen-xave hamutuk sanulu-resin-ida, ne’ebé aliña ho Programa Governu VIII nian no ne’ebé maka sai nu’udar eixu prinsipál husi komunikasaun ne’ebé país ne’e hakarak tranzmite kona-ba progresu iha implementasaun ODS nian. Membru Governu sira aprezenta rekomendasaun sira kona-ba alterasaun ba testu finál husi mensajen-xave sira ne’ebé sei haruka ba sede Organizasaun Nasoins Unidas nian to’o loron 17 fulan-maiu tinan 2019. Konsellu Ministrus aprova tiha ona, iha sorumutuk loron 13 fulan-fevereiru tinan 2019, rekomendasaun prinsipál sira ba Revizaun Nasionál Voluntária no durante fulan-fevereiru no fulan-marsu hala’o ona konsulta ho organizasaun sira sosiedade sivíl nian. Relatóriu finál ne’e no nia mensajen-xave sira sei aprezenta iha Forum Polítiku Nivel Aas Nasoins Unidas nian, ne’ebé sei hala’o husi loron 9 to’o loron 18 fulan-jullu tinan 2019, iha Novaiorke.
Ministru Ensinu Superiór, Siénsia no Kultura, Longuinhos dos Santos, aprezenta ona proposta Rezolusaun Governu nian, ne’ebé aprova ona husi Konsellu Ministrus ho alterasaun sira kona-ba nomeasaun Prezidente no Viseprezidente ba Konsellu Ezekutivu Institutu Nasionál Siénsias no Teknolojia (INCT - sigla iha lian portugés). Tuir Planu Estratéjiku Dezenvolvimentu nian no tuir Programa Governu nian, diploma ida-ne’e ninia objetivu maka nomeia José Cornélio Guterres atu ezerse mandatu ida ba tinan haat, hanesan Prezidente Konsellu Ezekutivu ba (INCT - sigla iha lian portugés) no nomeia mós Afonso de Almeida, ba kargu Viseprezidente Konsellu Ezekutivu INCT nian, ba tinan haat oin mai. INCT ninia misaun maka promove difuzaun no divulgasaun kultura, koñesimentu sientífiku no teknolójiku, ensinu siénsia no teknolojia nian, nune’e mós disponibilizasaun dadus no informasaun sira ne’ebé iha relasaun ho interese nasionál.
Konsellu Ministrus analiza ona proposta ne’ebé aprezenta husi Sekretáriu Estadu ba Asuntus Kombatentes Libertasaun Nasionál, Gil da Costa Monteiro ‘Oan Soru’, kona-ba memorandu entendimentu entre Timor-Leste no Governu Tazmánia ne’ebé sei loke dalan ba veteranu nasionál sira atu partisipa iha programa informasaun no dezenvolvimentu profisionál nian ida ba jestaun no prezervasaun parke nasionál sira, ho objetivu atu konserva patrimóniu naturál no kulturál nasionál, kontribui atu hadi’a kualidade moris komunidade sira-nian no ba promosaun dezenvolvimentu turizmu istóriku no sustentavel. Proposta ne’e sei hetan fali análize iha sorumutuk oinmai hafoin Ministériu relevante sira fó sira-nia paresér. REMATA - 16 abril 2019Timor-Leste konklui prosesu sosa partisipasaun Greater Sunrise nianPrezidénsia Konsellu Ministrushare tan
VIII Governu Konstitusionál
...........................................................................................................................
Komunikadu Imprensa
Timor-Leste konklui prosesu sosa partisipasaun Greater Sunrise nian
Governu Timor-Leste ohin remata ona, prosesu kona-ba sosa partisipasaun hamutuk 30% husi ConocoPhillips no 26,56% husi partisipasaun Shell Austrália nian iha kampu sira Greater Sunrise nian, loron 16 fulan-abríl tinan 2019, iha Singapura, hodi fó ba TIMOR GAP, kompañia petrolífera nasionál Timor-Leste nian, partisipasaun hamutuk 56,56%.
Primeiru-Ministru, Taur Matan Ruak, felisita parte hirak ne’ebé mak envolve tanba remata ona tranzasaun sira ne’ebé hala’o ho susesu no hein ho espetativa ba diskusaun sira ne’ebé foun ho membru konsórsiu nian sira seluk kona-ba oinsá atu dezenvolve lalais rekursu sira Greater Sunrise nian.
Reprezentante Espesiál Timor-Leste nian ba Kestaun Petrolífera sira, Kay Rala Xanana Gusmão, deklara katak “konkluzaun husi akizisaun sira-ne’e marka fin hosi prosesu ida ne’ebé hahú hafoin asinatura Tratadu nian kona-ba Ketan Tasik entre Austrália no Timor-Leste. Akizisaun ho valór 56,56% ne’ebé TIMOR GAP simu ona, sei permite atu avansa diskusaun sira entre konsórsiu Sunrise no autoridade sira husi Austrália no mós Timor-Leste nian kona-ba Kontratu foun Fahe Produsaun nian husi Greater Sunrise ne’ebé sei jere kampu mina nian sira-ne’e hafoin Tratadu ne’e hahú vigora. Tratadu ne’e mós sei fó dalan ba kontinuidade negosiasaun sira konsórsiu Sunrise nian, agora ho TIMOR GAP, kona-ba konseitu husi dezenvolvimentu Greater Sunrise no konstrusaun planta Gás Naturál Likefeitu (GNL) iha Beasu, iha parte tasi-mane Timor-Leste nian. Governu Timor-Leste sei serbisu nafatin atu dezenvolve Greater Sunrise lais liután, hodi benefisia parte hotu-hotu ne’ebé iha interese”.
Tranzasaun kona-ba venda ne’e kobre interese partisipativu sira hosi ConocoPhillips no Shell iha Kontratu Fahe Produsaun nian sira 03-19 no 03-20 iha Área Konjunta Dezenvolvimentu Petrolíferu ne’ebé harii ona bazeia ba Tratadu Tasi Timor nian, akordu sira jestaun nian ne’ebé iha ligasaun no kontratu sira arrendamentu nian NT/RL2 no NT/RL4 ne’ebé mak Austrália fó-sai. Hafoin Tratadu kona-ba Ketan Tasik entre Estadu rua ne’e hahú vigora, kampu sira husi Greater Sunrise sei inklui iha Área Rejime Espesiál Greater Sunrise nian no sei sujeita ba ezersísiu konjuntu jurizdisaun nian bazeia ba Tratadu foun.
Kampu sira husi gás naturál no kondensadu Sunrise no Troubadour nian, ne’ebé hamutuk hanaran kampu sira Greater Sunrise, lokaliza besik kilómentru 150 iha sudeste Timor-Leste nian no kilómetru 450 iha noroeste Darwin, iha Territóriu Norte Austrália nian.
Timor Gap halo parte ba parseiru sira hosi Konsórsiu Greater Sunrise: Woodside (operadora) ho ida partisipasaun hamutuk 33, 44% no Osaka Gas ho 10%. Remata - 10 abril 2019Toleránsia Pontu iha loron 18 fulan-abrílPrezidénsia Konsellu Ministrushare tan
VIII Governu Konstitusionál
...........................................................................................................................
Komunikadu Imprensa
Toleránsia Pontu iha loron 18 fulan-abríl
Lei n.0 10/20015, loron 10 fulan-agostu, iha redasaun ne’ebé fó hosi Lei n.0 3/2016, loron 25 fulan-maiu, ne’ebé maka estabelese ona loron feriadu nasionais, data ofisial komemorativa sira no ba situasaun sira seluk ne’ebé maka bele fó toleránsia pontu.
Ne’ebé maka relasiona ho toleránsia pontu sira, mak iha artigu da-7 nian husi lei ne’e rasik, determina katak bele sai nu’udar objetu toleránsia pontu nian. Entre data ofisial komemorativa sira konta mós loron Quinta-Feira Santa, ne’ebé maka kada tinan la monu iha loron ne’ebé maka hanesan.
Quinta-Feira Santa hanesan loron solene no loron ne’e nu’udar loron boot no importante tebes-tebes ba komunidade Kristaun Timor-Leste nian. No mos loron ikus kuarezma nian iha kalendáriu relijiaun katólika nian, no tinan ida ne’e, Quinta-Feira Santa monu iha loron 18 fulan-abril.
Tuir hakerek iha númeru 2, al c), husi artigu da-7, no iha númeru 6 alínea d), husi artigu ne’e rasik, Governu determina tuirmai:
1.Konsidera toleránsia pontu iha loron 18 fulan-abril tinan 2019, durante loron tomak
2.Despaxu ida-ne’e abranje ba funsionáriu hotu no ajente husi Ministériu sira ka servisu sira ne’ebé dependente ba ministériu sira-ne’e, nune’e mós ba institutu no organizasaun sira ne’ebé integra iha administrasaun indireta Estadu nian. REMATA - 10 abril 2019Sorumutu Konsellu Ministrus loron 10 fulan-abril tinan 2019Prezidénsia Konsellu Ministrushare tan
VIII Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus loron 10 fulan-abril tinan 2019
Konsellu Ministrus hala’o sorumutuk iha Palásiu Governu, iha Díli, no analiza proposta Deliberasaun ne’ebé aprezenta hosi Ministru Obras Públikas, Salvador Soares dos Reis Pires, kona-ba alterasaun husi kontratu prestasaun servisu konsultoria iha supervizaun ba manutensaun no hadi’a estrada nasionál nian sira. Deliberasaun ida ne’e ko’alia kona-ba servisu konsultoria ba estudu detalladu enjeñaria no supervizaun obra nian iha trosu estrada sira Manatutu-Natarbora, Manatutu-Laklubar-Natarbora, Tasitolu-Tibar, Tibar-Likisá, Tibar-Glenu, Maubara-Karimbala, Baukau-Lautein no Atabae-Mota-ain. Revizaun kontratuál sira ne’ebé aprova ona sira-nia objetivu mak atu ajusta servisu supervizaun obra nian sira ba estensaun prazu sira nian, ne’ebé uluk hetan ona aprovasaun, hodi finaliza obra manutensaun sira no hadi’a trosu estrada sira ne’e nian. Proposta ne’e hetan ona aprovasaun hosi Konsellu Ministrus, maibé tenke hetan mós paresér ne’ebé favorável husi Ministériu Finansas no hetan vistu préviu hosi Kámara Kontas.
Konsellu Ministrus aprova ona proposta Deliberasaun Konsellu Ministrus nian, ne’ebé aprezenta hosi Ministra Solidariedade Sosiál no Inkluzaun, Armanda Berta dos Santos, kona-ba programa kooperasaun setoriál entre Ministériu Traballu, Solidariedade no Seguransa Sosiál Portugál nian no Ministériu Solidariedade Sosiál no Inkluzaun Timor-Leste nian, ba períodu tinan 2019 to’o tinan 2022. Eixu no área prioritária sira ne’ebé estabelese ona, liuhosi análize ba objetivu no prioridade sira ne’ebé Governu nasaun rua ne’e nian konkorda ona, mak eixu “demokrasia, estadu-de-direitu no direitus umanus”, ho intervensaun iha área kapasitasaun institusionál, eixu “ dezenvolvimentu umanu no halakon moris-ki’ak” ho atividade sira iha área protesaun no inkluzaun sosiál, no kapasitasaun institusionál, no eixu “direitu labarik sira nian no igualdade jéneru” liuhosi kapasitasaun institusionál.
Ikusliu, Konsellu Ministrus deside ona hodi fó toleránsia pontu iha loron 18 fulan-abríl tuirmai, Kinta-Feira Santa, loron ikus Kuarezma nian tuir kalendáriu relijiaun katólika, ba funsionáriu no ajente sira hotu hosi Ministériu no servisu dependente sira, no mós hosi instituisaun no organizmu sira ne’ebé integra iha administrasaun indireta Estadu nian. REMATA - 03 abril 2019Sorumutuk Konsellu Ministrus loron 3 fulan-abril tinan 2019Prezidénsia Konsellu Ministrushare tan
VIII Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus loron 3 fulan-abril tinan 2019
Konsellu Ministrus hala’o sorumutuk iha Palásiu Governu, iha Dili no akompaña aprezentasaun husi empreza Mura, kona-ba CAT-HTR, teknolojia inovadora ida ne’ebé bele transforma plástiku ba mina. Teknolojia ne’e, Thomas Maschmeyer, profesór Kímika husi Universidade Sidney iha Austrália mak inventa. Empreza Mura, ne’ebé pertense ba Armstrong Energy no Licella, maka soi propriedade intelektuál ba utilizasaun teknolojia ida-ne’e nian.
CAT-HTR utiliza bee ne’ebé ho presaun boot no temperatura aas hodi hakfilak rezíduu plástiku sira ba produtu ne’ebé iha valór aas. Ho nune’e, teknolojia ne’e permite hamenus lixu plástiku sira iha oseanu no hamenus problema sira ne’ebé kauza husi emisaun dióksidu karbonu nian ne’ebé maihusi sunu plástiku, aleinde kria mós fonte reseita nian ida ho transformasaun fo’er hirak-ne’e nian. Ba Mura, nu’udar empreza responsavel ba projetu ne’e, Timor-Leste sai nu’udar parseiru ideál ba implementasaun projetu ida-ne’e nian, tanba ninia karakterístika jeográfika no sosiál sira.
Sekretáriu Estadu Ambiente nian, Demétrio de Amaral de Carvalho, sei diskute termu sira kona-ba memorandu entendimentu ida entre Governu Timor-Leste no Mura, ne’ebé tuirmai sei haruka ba Konsellu Ministrus hodi halo análize, ho objetivu atu hahú estudu viabilidade no atu hetan finansiadór sira.
Ministru Administrasaun Estatál iha ezersísiu, Abílio José Caetano, halo aprezentasaun ida ba Konsellu Ministrus, kona-ba planu atu implementa jestaun kona-ba rezíduu sólidu urbanu iha Dili.
Planu ida-ne’e realiza bazeia ba Rezolusaun Governu nian n. 32/2016 loron 5 fulan-outubru ne’ebé aprova estratéjia ba jestaun rezíduu sólidu urbanu nian iha sidade Dili no Dekretu-Lei n. 2/2017 ne’ebé aprova sistema jestaun rezíduu sólidu urbanu nian. Planu ne’ebé hato’o ona ne’e, propoin kona-ba sosa modelu kontentór sira ne’ebé modernu no efisiente atu tau fo’er, karreta atu tula fo’er, ekipamentu movel, balansa no ekipamentu aterru nian atu hadi’a padraun operasionál husi fatin soe fo’er nian iha Tibar.
Objetivu seluk tan husi planu ne’e mak atu hadi’a servisu rekolla rezíduu sólidu nian, ne’ebé ba oin sei uza métodu rekolla mekánika. Ikus-liu, planu ne’e buka mós atu transforma fatin soe fo’er nian iha Tibar ba aterru kontroladu ida tuir estratéjia integrada kona-ba tratamentu ba fo’er sira. Planu kona-ba implementasaun husi jestaun rezíduu sólidu urbanu nian iha Dili aprezenta katak benefísiu prinsipál sira husi planu ne’e mak hadi’a kualidade ambiente sidade nian, hadi’a saúde, hamenus risku inundasaun nian, efisiénsia ne’ebé boot liután husi rekolla no jestaun rezíduu nian liuhusi prátika nivel internasionál nian, kria oportunidade sira kona-ba empregu no posibilidade ba kreximentu turizmu nian liuhusi jestaun ne’ebé efikás no manutensaun ambiente nian.
Ministru Administrasaun Estatál iha ezersísiu halo mós aprezentasaun ida ba Konsellu Ministrus kona-ba aplikasaun iha Timor-Leste husi modelu dezenvolvimentu Saemaul Undong (SMU), ne’ebé Koreia Súl kria iha tinan 1970 no lori ona dezenvolvimentu ekonómika no sosiál ba nasaun.
Modelu Saemaul Undong refere ba movimentu dezenvolvimentu komunitáriu ida, ne’ebé ninia objetivu mak atu hadi’a kualidade moris komunidade rurál sira nian bazeia ba espíritu dilijénsia, ajuda an rasik no kooperasaun. Implementasaun SMU nian iha Timor-Leste sei kontribui ba hamenus distánsia entre Governu Sentrál no komunidade sira, hamenus númeru migrante sira husi área rurál ba iha kapitál, hasa’e oportunidade iha nivel munisipál ho aproveitamentu ba sira-nia karaterístika no potensialidade sira, hasa’e númeru postu traballu no utiliza sidadaun nasionál sira-nia esperiénsia ne’ebé formadu iha área dezenvolvimentu rurál nian.
Ministra Solidariedade Sosiál no Inkluzaun, Armanda Berta dos Santos, aprezenta proposta kona-ba Deliberasaun Konsellu Ministru nian, kona-ba programa kooperasaun setoriál entre Ministériu Traballu, Solidariedade no Seguransa Sosiál Portugál nian no Ministériu Solidariedade Sosiál no Inkluzaun Timor-Leste nian ba períodu tinan 2019 to’o 2022. Eixu no área prioritáriu sira ne’ebé estabelese ona, liuhusi análize ba objetivu no prioridade sira ne’ebé Governu nasaun rua ne’e nian konkorda ona, maka eixu “demokrasia, estadu direitu no direitus umanus”, ho intervensaun iha área kapasitasaun institusionál, eixu “dezenvolvimentu umanu no hamenus moris-kiak” ho atividade sira iha área protesaun no inkluzaun sosiál no kapasitasaun institusionál no eixu “direitu labarik sira nian no igualdade jéneru” liuhusi kapasitasaun institusionál. Proposta ne’e sei hetan fali apresiasaun iha sorumutuk Konsellu Ministrus nian tuirmai. FIN 
27 marsu 2019Sorumutuk Konsellu Ministrus loron 27 fulan-marsu tinan 2019Prezidénsia Konsellu Ministrushare tan
VIII Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus loron 27 fulan-marsu tinan 2019
Konsellu Ministru hala’o Sorumutuk iha Palásiu Governu, iha Díli no aprova Rezolusaun Governu kona-ba donativu ba Repúblika Moçambique nuudar apoiu ba dezastre naturais ne’ebé provoka hosi siklone Idai, ne’ebé akontese iha sidade kosta Beira nian, kapitál provinsia mosambikana Sofala, iha loron-14 fulan marsu liubá, hodirezulta ema mate 450 resin, kanek 1.700 resin no 100 resin lakon hela-fatin. Haree ba situasaun ne’ebé mosu grave tebes no haree ba lasu istóriku no amizade entre Timor-Leste ho Moçambique, Governu hato’o nia solidariedade ba povu Moçambique no aprova montante dolár amerikanu Millaun Ida hodi apoia no hatán ba nesesidade sira ne’ebé mak kauza hosi Siklone Idai.
Ministra Finansa ein ezersísiu, Sara Lobo Brites, aprezenta proposta Rezolusaun Governu, ne’ebé aprova ona hosi Konsellu Ministru, kona-ba kriasaun Komisaun Interministerial ba Reforma Fiskal no Jestaun Finansa Públika. Kriasaun ba komisaun interministerial ida-ne’e, loke dalan atu halo promesa politika foun ba programa reforma fiskal no jestaun finansa públika, ne’ebé hahú ona iha VI Governu Konstitusional, hodi reforsa papel no envolvimentu membru Governu ne’ebé ho responsabilidade iha área ne’e, ho objetivu atu to’o tinan 2023, sei elabora parte signifikativa hosi lejislasaun nesesária iha materia ne’e. Tanba ne’e, Governu reafirma kompromisu ne’ebé asumi iha Programa reforma, ho forma komprensiva, iha area finansa públika, ho hare ba hasae reseita Estadu, fortalese no promove sustentabilidade, kualidade, tranparénsia no responsabilidade iha polítika fiskal no iha jestaun finanseira. Komissaun ne’e sei lidera hosi Primeiru-Ministru no sei servisu hamutuk ho apoiu hosi Ministru responsável iha area Finansa, Koordenasaun Assuntus Ekonómiku, Reforma Lejislativa, Justisa, Administrasaun Estatal, Planeamentu Investimentu Estratéjiku, no Petroleu no Minerais.
Konsellu Ministru aprova tiha proposta Memorandu Entendimentu ne’ebé aprezenta hosi Ministériu Negósiu Estranjeiru no Kooperasaun no Ministériu Justisa kona-ba kontratu arendamentu ba terenu Embaixada Estadus Unidos Amérika nian iha Timor-Leste. Memorandu Entendimentu ida-ne’e sei defini termu arendamentu terenu ba embaisada no regra sira kona-ba konstrusaun no alterasaun ba instalasaun diplomátika. REMATA
