Komunikadus
- 28 maiu 2019Feriadu Nasional ba Selebrasaun loron Idul FitriPrezidénsia Konsellu Ministrushare tan
VIII Governu Konstitusionál
...........................................................................................................................
Komunikadu Imprensa
Feriadu Nasional ba Selebrasaun loron Idul Fitri
Governu Timor-Leste estabelese ona loron 6 fulan-juñu tinan 2019, nu’udar feriadu nasionál ba selebrasaun loron Idul Fitri nian, liuhusi Despaxu n. 02/2019/I/PCM, ne’ebé define feriadu nasionál sira iha data variavel nian ba tinan 2019.
Desizaun ne’e foti bazeia ba Lei n. 10/2005, loron 10 fulan-agostu, ne’ebé determina rejime jurídiku husi feriadu sira, data ofisiál komemorativa sira no toleránsia pontu sira. Tanba natureza relijioza husi eventu sira ne’ebé feriadu sira-ne’e selebra, data hirak ne’ebé prevee iha Despaxu n. 02/2019/I/PCM, Dioseze Dili no Sentru Komunidade Izlámika Timor-Leste nian mak indika.
Lista ofisiál kona-ba feriadu nasionál hirak ne’ebé monu iha data fiksu no data variavel husi tinan 2019 nian bele haree iha Portál Governu nian liuhusi ligasaun http://timor-leste.gov.tl/?p=21146&lang=pt. - 22 maiu 2019Sorumutu Konsellu Ministrus iha Loron 22 fulan-Maiu tinan 2019Prezidénsia Konsellu Ministrushare tan
VIII Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus loron 22 fulan-maio tinan 2019
Konsellu Ministrus hala’o sorumutuk iha Palásiu Governu, iha Díli, no asisti aprezentasaun hosi Ministru Administrasaun Estatal interinu, Abílio José Caetano kona-ba Projetu Nova Díli. Projetu ne’e rasik iha ordenamentu hosi area ne’ebé funsiona, assebilidade no espasu matak no marinas iha kapitál nasaun nian.
Governu analiza proposta dekretu-lei ne’ebé maka aprezenta hosi Ministru Saúde interinu, Bonifácio Maukoli dos Reis, konaba Servisu Nasional Ambulánsia no Emerjénsia Médika nian, ho objetivu atu aumenta nível hosi funsionamentu no hatan ba servisu médiku ne’ebé maka kualidade atu garanti kuidadu ba urjensia no emerjénsia médika iha territoriu nasional tomak, inklui mos transporte hosi sinistradus ka vitima ba moras ne’ebe ataka derepenti ba instituisaun ba prestasaun hosi kuidadu ba saúde ne’ebé maka diak.
Konsellu Ministru aprova deliberasaun rua ne’ebé maka aprezenta hosi Ministru Obras Públika, Salvador Soares dos Reis Pires, kona-ba alterasaun kontratu públiku sira hosi empreitada sira atu hasa’e kualidade ba Estrada Nasional n⁰ 1, Díli-Manatutu no trosu Baukau-Lautem. Deliberasaun hosi Konsellu Ministru sei fo dalan atu estende durasaun ba kontratu, la ho kustu adisionais no sei la halo alterasaun ba termus no kondiasaun sira, ho forma atu konpensa fali atrasu no interupsaun hosi servisu obra ne’e rasik, kona-ba nesedidade revizaun hosi volume atual hosi servisu no terenu no motivu daruak hosi atrazu ne’e kona-ba pagamentu tantu kompensasaun ba populasaun ba terrenu eispropriadu sira, kona-ba dezeñu dahuluk nian.
Ministru Reforma Lejislativa no Assuntu Parlamentar, Fidelis Manuel Leite Magalhães, halo aprezentasaun kona-ba proposta hosi Rezolusaun Governu, ne’ebé maka aprova hosi Konsellu Ministru kona-ba regras sira hosi lejistika. Matéria ne’e asume natureza regulamentar ho objetivu atu garanti no hasa’e kualidade hosi funsionamentu internu hosi prosedimentu lejislativu hosi Governu, ne’ebé maka pasa ba fundamentasaun ne’ebé di’ak hosu desizaun hosi lejislar.
Konsellu Ministru analiza akordu ida ho Repúblika China ba fornsesimentu hosi medikamentu no entrega poder tomak ba Ministru Saúde interinu, Bonifácio Maukoli dos Reis, atu asina akordu refere.
Konsellu Ministru mos analiza proposta Memorandu Entendimentu, ne’ebé maka aprezenta hosi Ministru Ensinu Superior, Siénsia no Kultura, Longuinhos dos Santos, kona-ba kooperasaun Sientfika no Téknika ho objetivu atu Peskiza ba Dezenvolvimentu hosi França no entrega poder tomak ba Sekretáriu Estadu Arte no Kultura, Teófilo Caldas atu asina akordu ne’e.
Konsellu Ministru aprova proposta ida kona-ba Rezolusaun Governu, ne’ebé maka aprezenta hosi Ministru Negosiu Estranjeiru, Dionísio da Costa Babo Soares, kona-ba donativu ba reprezentasaun permanente hosi Repúblika Árabe Sarauí Demokrátika ho konsiderasaun ba lasu históriku ne’ebé hamutuk ho Timor-Leste, ho hakarak ne’ebé luan ba luta autodeterminasaun no independénsia ba povu.
Ikus Liu, Konsellu Ministru aprova akordu ida ne’ebé maka aprezenta hosi Ministru Negósiu Estranjeiru no Kooperasun, Dionísio da Costa Babo Soares, akordu ida ne’e entre Governu Repúblika Demokrátika Timor-Leste ho Governu Reinu Tailandia, ba Insensaun hosi Vistu ba Titular sira nia Passaporte Diplomatiku no Servisu nian. REMATA - 15 maiu 2019Mensajen kona-ba Loron Internasional Família nianPrezidénsia Konsellu Ministrushare tan
VIII Governu Konstitusionál
...........................................................................................................................
Komunikadu Imprensa
Mensajen kona-ba Loron Internasional Família nian
sei publika - 15 maiu 2019Sorumutu Konsellu Ministrus iha Loron 15 fulan-Maiu tinan 2019Prezidénsia Konsellu Ministrushare tan
VIII Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus loron 15 fulan-maio tinan 2019
Konsellu Ministrus hala’o sorumutuk iha Palásiu Governu, iha Díli, no aprova tiha proposta Dekretu Governu, ne’ebé aprezenta hosi Ministru Justisa Manuel Cárceres da Costa, ne’ebé maka aprova kona-ba Regulamentu Estájiu ba Investigadór sira hosi Kareira Espesiál Investigasaun Kriminal nian no ba Espesialista Laboratóriu Polísia Sientífika no Investigasaun Kriminal (PCIC). Ho aprovosaun ba diploma ida-ne’e sei kontribui hodi asegura formasaun no fó kualifikasaun ba profisionál sira ne’ebé maka tama iha rejime karreira espesiál ba Polísia Sientífika no Investigasaun Kriminal, hodi kumpri saida maka hatuur ona iha lei no tuir programa VIII Governu Konstitusionál nian, no hodi haree mós konsolidasaun ba setor justisa hodi tada ba instituisaun ba ida-ne’e rekursu umanu ne’ebé kompetente, independente no profisionál.
Ministru Agrikultura no Peska, Joaquim José Gusmão dos Reis Martins, aprezenta proposta Rezolusaun Governu kona-ba Estatutu Konsellu Nasional Seguransa no Soberania Alimentar no Nutrisionál Timor-Leste nian (KONSSATIL). Rezolusaun Governu ne’e hakarak defini natureza, objetivu, regulamentu sira, kompozisaun no funsionamentu hosi KONSSATIL, nuudar órgaun interministeriál atu halo koordenasaun no elaborasaun, implementasaun, monitorizasaun no avaliasaun ba polítika públika kona-ba seguransa no soberania alimentar no nutrisional. Objetivu hosi KONSSATIL maka assegura implementasaun hosi PEDN no programa Governu kona-ba matéria ne’e, dezenvolve no promove mekanismu atu halo koordenasaun no hodi fortalese kapasidade instituisaun públika sira no rekursu hirak ne’ebé eziste ona, ho objetivu atu reduz inseguransa alimentar no má nutrisaun no hodi implementa planu ba seguransa alimentar no nutrisaun. Rezolusaun Governu ida-ne’e sei analiza fila fali iha reuniaun Konsellu Ministru tuir mai.
Konsellu Ministru analiza Deliberasaun rua, ne’ebé aprezenta hosi Ministru Obras Públikas, Salvador Soares dos Reis Pires, kona-ba aleterasaun ba kontratu públiku empreitada nian atu hadi’ak kualidade no halo manutensaun ba estrada Natarbora-Laklubar, no ba estrada Manatutu-Baukau. Deliberasaun Konsellu Ministru ne’e sei fó dalan atu estende durasaun ba kontratu, lahó kustu adisionál no laiha mudansa ba termu no kondisaun kontratu nian tanba, ho objetivu atu kompensa atrazu no interupsaun hosi servisu ba obra sira tan udan bo’ot ne’ebé akontese iha área ne’ebá. Deliberasaun rua ne’e hetan aprovasaun hotu.
Ministru Obras Públikas aprezenta mós Proposta Deliberasaun ne’ebé maka aprova hosi Konsellu Ministru kona-ba aprovasaun ba prosedimentu aprovisionamentu nian atu hola mina ba sentrál eletrika iha Hera no Betanu ba tinan ida, hahú hosi fulan Outubru tinan 2019 to’o fulan Setembru tinan 2020, ho objetivu garante funsionamentu sentrál eletrika no fornesimentu enerjia ba Timor laran tomak. REMATA - 08 maiu 2019Sorumutu Konsellu Ministrus loron 8 fulan-maio tinan 2019Prezidénsia Konsellu Ministrushare tan
VIII Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus loron 8 fulan-maio tinan 2019
Konsellu Ministru hala’o Sorumutuk iha Palásiu Governu, iha Díli no aprova tiha proposta Dekretu-Lei ne’ebé aprezenta hosi Sekretáriu Estadu Ambiente, Deométrio Amaral de Cravalho, kona-ba Rejime Júridiku no Konservasaun ba Biodiversidade. Diploma ida ne’e atu salvaguarda biodiversidade ne’ebé boot iha Timor-Leste, tanba Timor-Leste hamriik nuudar rejiaun ne’ebé ho biodiversidade boot liu iha mundu no iha espesie flora no fauna oioin. Tan ne’e, Dekretu-Lei ne’e mai defini kona-ba kuadru jurídiku hodi halo protesaun no konservasaun ba biodiversidade no halo kompleta saida maka hatuur ona iha Sistema Nasional ba Área Protejida sira no Implementa Lei Baze Ambiente nian, iha parte ne’ebé maka nuudar kompeténsia Estadu nian atu adopta medida sira ne’ebé mak importenate atu fó protesaun no halo konservasaun ba espesie sira, abitat no ekosistema sira. Iha nivel institusional, Dekretu-Lei mós buka atu promove oinsá integra konsiderasaun kona-ba biodiversidade iha politika setorial oioin, no defini responsabilidade kada interveniente governamentai no husu kedas partisipasaun ativa hosi setor sosiedade hotu-hotu nian atu halo protesaun ba biodiversidade no oinsá uza didi’ak ninia komponente sira, iha kuadru partisipativu no kolaborasaun no konsulta.
Sekretáriu Estadu Ambiente aprezenta mós proposta Dekretu-Lei kona-ba alienasaun, importasaun no produsaun saku, embalajen no objetu seluk tan hosi plástiku. Diploma ida ne’e buka atu prevene no hamenus impaktu hosi rezídu ba ambiente no liuliu, ba produtu plástiku sira ne’ebé ho utilizasaun únika. Nune’e, Dekreteu-Lei ne’e preveé atu bandu halo alieanasaun, importasaun no produsaun ba produtu plástiku hirak ne’ebé labele atu utiliza filafali no bandu halo akizisaun,distribuisaun, importasaun no produsaun ba objetu ruma hosi plástiku. Diploma ne’e hakarak estabelese mós prinsipiu fundamental sira tuir mai ne’e: prekausaun, prevensaun, dezenvolvimentu sustentável, seguransa ambiental global, poluidor-pagador, reutilizasaun no resiklajen no valorizasaun enerjétika. Proposta ida-ne’e sei analiza filafali iha reuniaun Konsellu Ministru tuir mai.
Konsellu Ministru aprova Proposta Deliberasaun, ne’ebé aprezenta hosi Ministru Administrasaun Estatal ein ezersísiu, Abilio José Caetano, ne’ebé aprova prosesu aprovizionamentu hodi implementa estratéjia investimentu ba jestaun rezídu sólidu iha Díli. Planu ba jestaun rezídu sólidu ne’e hakarak uza modelu kontentór hodi tau rezidu modernu no efisiente, karreta hodi raut fo’er, ekipamentu móvel, balansa no ekipamentu hodi aterru atu hadi’ak padraun operasional ba fatin so’e fo’er nian iha Tibar. Objetivu seluk tan hosi planu ne’e mak atu hadi’a servisu rekolla rezídu sólidu nian, ne’ebé ba oin sei uza métodu rekolla mekánika. Ikus-liu, planu ne’e buka mós atu transforma fatin soe fo’er nian iha Tibar ba aterru ida kontroladu tuir estratéjia integrada kona-ba tratamentu ba fo’er sira. Planu kona-ba implementasaun ba jestaun rezídu sólidu urbanu nian iha Díli, aprezenta katak benefísiu prinsipál sira hosi planu ne’e maka hadi’ak kualidade ambiente sidade nian, hadi’ak saúde, hamenus risku inundasaun nian, efisiénsia ne’ebé bo’ot liután hosi rekolla no jestaun rezídu liuhosi prátika iha nivel internasionál nian no, kria oportunidade sira kona-ba empregu no posibilidade ba kresimentu turizmu liuhosi jestaun ne’ebé efikás no manutensaun ba ambiente.
Ministru Transporte no Komunikasaun, José Agustinho da Silva, apreszenta Proposta Deliberasaun, ne’ebé maka aprova hosi Konsellu Ministru, atu nomeia membru hosi Konsellu Administrasaun Autoridade Nasional Komunikasaun, entidade reguladora ba setór telekomunikasaun sira. Ho nune’e, Governu nomeia Fernando Afonso da Silva, hanesan Administrador Naun Ezekutivu no Vidal dos Santos Gomes hanesan Diretór Tékniku, ba mandatu tinan lima nian.
Ministru Transporte no Komunikasaun José Agustinho da Silva aprezenta mós proposta Delibersaun kona-ba konstrusaun barku passajeiru ba projetu hodi halo ligasaun transporte marítimu kosta norte tomak Timor-Leste nian. Projetu ida-ne’e ko-finansiadu hosi Kooperasaun Finanseira Alemaña no Repúblika Demokrátika Timor-Leste. Proposta Deliberasaun ida-ne’e aprova tiha liuhosi análize no konfirmasaun hosi Ministériu Finansas.
Konsellu Ministru aprova Proposta Delibersaun, ne’ebé maka aprezenta hosi Ministru Defeza, Filomeno da Paixão de Jesus, kona-ba nomeasaun ba komandante komponente hosi F-FDTL ne’ebé atu hatoo ba Prezidente repúblika, hanesan reponsável ba nomeasaun komponente sira F-FDTL nian.
Konsellu Ministru mós aprova proposta Delibersaun, ne’ebé maka aprezenta hosi Komisaun Nasional Aprovizionamentu, kona-ba autorizasaun ba prosesu aprovizionamentu ba konstrusaun futuru edifisiu ba Tribunal Distrital Díli. Verba ba projetu konstrusaun Tribunal Distrital Díli inklui ona iha Orsamentu Jeral Estadu tinan 2019 iha Fundo Infraestrutura. REMATA - 01 maiu 2019Governu felisita Imperadór Japaun founPrezidénsia Konsellu Ministrushare tan
VIII Governu Konstitusionál
...........................................................................................................................
Komunikadu Imprensa
Governu felisita Imperadór Japaun foun
Governu Timor-Leste aprezenta kongratulasaun boot ba Sua Majestade Imperadór Naruhito ne’ebé tuur iha tronu iha Japaun, iha loron 1 fulan-maiu tinan 2019 no dezeja susesu wa’in ba nia, iha ninia funsaun nobre sira ne’ebé nia hala’o.
Timor-Leste no Japaun iha relasaun bilaterál oin-oin no riku tebetebes ne’ebé maka prevee katak bele kontinua dezenvolve ho forma pozitiva, iha Imperadór Naruhito ninia lideransa.
Governu Timor-Leste hahii mós Imperadór ida-uluk, Akihito ne’ebé ezerse ona ninia funsaun sira nu’udar Imperadór Japaun nian durante dékada tolu ikus-ne’e.
Atu selebra okaziaun ne’e, sei iha Livru Kongratulasaun nian ida iha Embaixada Japaun nian ne’ebé sei konta ho partisipasaun husi Membru Governu sira no husi sira hotu ne’ebé hakarak hato’o felisitasaun ba Imperadór foun ne’e. Livru Kongratulasaun nian ne’e sei disponivel husi tuku 10 to’o tuku 12 no husi tuku 14 to’o tuku 16 iha loron 2, 3, 6, no 7 fulan-maiu nian.
Lori Governu nia naran, Ministru Estadu Prezidénsia Konsellu Ministrus, Agio Pereira, hato’o nia konviksaun katak, iha sekuénsia husi era imperiál foun ne’e, relasaun metin entre nasaun rua ne’e sei kontinua hametin nafatin iha tinan sira tuirmai. Remata - 30 abril 2019Sorumutu Konsellu Ministrus loron 30 fulan-abril tinan 2019Prezidénsia Konsellu Ministrushare tan
VIII Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus loron 30 fulan-abril tinan 2019
Konsellu Ministrus hala’o sorumutuk iha Palásiu Governu, iha Dili, no aprova ona proposta Deliberasaun nian ne’ebé aprezenta husi Ministru Reforma Lejizlativa no Asuntus Parlamentares, Fidélis Manuel Leite Magalhães, kona-ba akordu konsesaun no implementasaun entre Millenium Challenge Corporation (MCC) no Governu Timor-Leste ba implementasaun Millenium Challenge Compact. MCC no Governu Timor-Leste servisu hamutuk iha dezenvolvimentu programa kompaktu ida ba tinan lima nian atu hamenus kiak liuhosi kreximentu ekonómiku, ne’ebé maka haree liu ba dezafiu prinsipál sira ne’ebé nasaun ne’e hasoru, hanesan asesu ba bee moos, saúde, nutrisaun, saneamentu no dezenvolvimentu rekursus umanus. Konsellu Ministrus fó podér tomak ba Ministru Reforma Lejizlativa no Asuntus Parlamentares atu asina akordu ne’e.
Konsellu Ministrus aprova proposta Rezolusaun Governu nian, ne’ebé aprezenta husi Primeiru-Ministru, Taur Matan Ruak, ne’ebé fiksa vaga sira ba promosaun pesoál ne’ebé integradu iha karreira sira rejime jerál nian iha administrasaun públika. Vaga sira ne’ebé loke ba promosaun nian ne’e, Governu fó-sai tinan-tinan, bazeia ba proposta husi Komisaun Funsaun Públika, to’o limite 10% hosi totál iha kada kategoria ka grupu profisionál.
Konsellu Ministrus kontinua fali ho análize koba-ba proposta Deliberasaun nian ne’ebé aprezenta husi Sekretária Estadu Igualdade no Inkluzaun, Maria José da Fonseca Monteiro de Jesus, relasiona ho relatóriu kona-ba revizaun nasionál ba implementasaun Deklarasaun no Plataforma Asaun Pekín nian, husi períodu tinan 2014 to’o 2018. Deklarasaun no Plataforma Asaun Pekín nian, dokumentu ne’e kria iha tinan 1995, iha Xina, durante Konferénsia Mundiál Dahaat kona-ba Feto sira, ninia objetivu mak atu debate asaun sira ba promosaun igualdade nian, dezenvolvimentu no dame ba feto sira. Dokumentu ne’e identifika área temátika prioritária 12 ba Estadu sira hodi hakat liu obstákulu sira ne’ebé feto foin-sa’e no feto sira hasoru no atu alkansa igualdade entre feto ho mane. Relatóriu nasionál ne’e ko’alia kona-ba progresu no rezultadu prinsipál ne’ebé alkansa ona no dezafiu no obstákulu sira ne’ebé hasoru iha implementasaun Deklarasaun no Plataforma Asaun Pekín nian iha períodu tinan 2014-2018. Proposta ne’e hetan ona aprovasaun no relatóriu ne’e sei haruka ba Komisaun Ekonómika no Sosiál Nasoins Unidas nian ba Ázia no Pasífiku (UN-ESCAP - United Nations - Economic and Social Commission for Asia and Pacific) iha loron 1 fulan-maiu. Tuir fali mai relatóriu ne’e sei aprezenta mós iha fulan-novembru tinan 2019 iha Bankoke, iha nivel rejionál, iha sorumutuk UN-ESCAP nian no iha fulan-marsu 2020, iha sesaun da-64 husi Komisaun kona-ba Estatutu Feto nian (CSW - Commission on the Status of Women).
Konsellu Ministrus aprova ona proposta Deliberasaun nian, ne’ebé aprezenta husi Ministru Negósius Estranjeirus no Kooperasaun, Dionísio da Costa Babo Soares, relasiona ho naran sira ne’ebé propoin ba Prezidente Repúblika atu xefia Misaun Diplomátika sira Repúblika Demokrátika Timor-Leste nian. Remata - 24 abril 2019Sorumutu Konsellu Ministrus loron 24 fulan-abril tinan 2019Prezidénsia Konsellu Ministrushare tan
VIII Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus loron 24 fulan-abril tinan 2019
Konsellu Ministrus hala’o sorumutuk iha Palásiu Governu, iha Dili, no asiste aprezentasaun husi Roberto Caetano de Sousa Vicente, Diretór Ezekutivu Ajénsia Teknolojia Informasaun no Komunikasaun I.P. (TIK Timor) kona-ba estatutu, planu no programa husi institutu públiku ida-ne’e, ne’ebé tutela direta husi Primeiru-Ministru. TIK Timor, ne’ebé harii iha tinan 2017, nia misaun mak atu implementa polítika no estratéjia, ne’ebé hetan ona aprovasaun, kona-ba teknolojia sira informasaun no komunikasaun nian, no jere rede informátika Governu no entidade públika sira seluk, no inklui jestaun kona-ba infraestrutura teknolojia sira informasaun no komunikasaun nian no kona-ba sistema sira informasaun nian. Durante aprezentasaun ne’e, Diretór Ezekutivu TIK Timor nian ne’e aprezenta planu asaun to’o tinan 2030, ho objetivu atu hasa’e efikásia no efisiénsia husi prestasaun servisu sira, liuhusi Governasaun Eletrónika no, iha tempu hanesan, implementa estrutura sira ne’ebé sei fó dalan ba koneksaun nasionál no internasionál ne’ebé di’ak liu, estavel no segura liu, nune’e permite atu define no implementa padraun sira ne’ebé garante la’ós de’it kompatibilidade husi ekipamentu no software sira, maibé mós kapasidade interoperabilidade no seguransa ba dadus sira, ne’ebé importante tebes ba atividade governamentál no ba relasaun sidadaun sira-nian ho estrutura públika sira.
Konsellu Ministrus aprova ona, ho alterasaun sira,proposta Dekretu-Lei, ne’ebé aprezenta husi Ministru Interiór iha ezersísiu, Filomeno da Paixão de Jesus, kona-ba importasaun, transporte, armazenajen no utilizasaun produtu esplozivu sira hodi halo implementasaun projetu sira konstrusaun sivíl nian, atividade petrolífera no mineira sira. Dekretu-Lei ne’ebé hetan ona aprovasaun ne’e estabelese norma, regra no prosedimentu espesiál seguransa nian sira ne’ebé ema tenke obedese bainhira halo importasaun, transporte, armazenajen no utilizasaun produtu esplozivu komersiál sira, tuir nesesidade projetu sira ne’ebé iha interese públiku, iha setór sira konstrusaun sivíl, mineiru no petrolíferu nian.
Ministra Finansas iha ezersísiu, Sara Lobo Brites, aprezenta ona proposta Deliberasaun nian, ne’ebé hetan ona aprovasaun husi Konsellu Ministrus, kona-ba alterasaun daneen ba Akordu Dezenvolvimentu nian entre Estadus Unidus Amérika no Repúblika Demokrátika Timor-Leste ba fortalesimentu institusionál no kapasitasaun rekursus umanus ba dezenvolvimentu. Akordu ne’e buka atu kontribui ba Timor-Leste ida ne’ebé prósperu no saudavel liu, ho populasaun ida ne’ebé instruida liután, ho asesu ba beins no servisu esensiál sira, iha ne’ebé produsaun no empregu korresponde ba ekonomia emerjente ida, ho oportunidade ba ema hotu-hotu, ho dalan ne’ebé justu no inkluzivu, hodi fasilita kreximentu dinámiku no inovadór ida ba ekonomia.
Sara Lobo Brites aprezenta mós proposta, ne’ebé hetan ona aprovasaun husi Konsellu Ministrus, kona-ba memorandu entendimentu entre Governu Timor-Leste, Governu Indonésia no Banku Dezenvolvimentu Aziátiku (ADB – Asian Development Bank) kona-ba asisténsia téknika iha matéria kooperasaun no komérsiu transfronteirisu, ne’ebé sei asina iha loron 4 fulan-maiu tinan 2019, durante sorumutuk anuál ADB nian, iha Repúblika Fiji, liuhusi Ministra Finansas Timor-Leste, Ministra Finansas Indonésia no Prezidente ADB nian. Memorandu ne’e nu’udar kontinuasaun husi pedidu ne’ebé Governu Timor-Leste no Governu Indonézia hato’o ona ba ADB, atu fó apoiu ba fortalesimentu kooperasaun transfronteirisa, ho hanoin atu promove dezenvolvimentu iha rejiaun hirak ne’e. Hahú husi tinan 2017 to’o 2018, hala’o ona estudu esploratóriu ida, ne’ebé rekomenda área prinsipál tolu ba kooperasaun, maka hanesan- transporte no komunikasoins, turizmu no pekuária. Akordu ne’e fó dalan atu armoniza prosedimentu fronteirisu sira, hodi hadi’a ligasaun entre nasaun rua ne’e, hodi halo espansaun sistema sertifikasaun saúde animál nian no promove dezenvolvimentu ba área turístika konjunta, ne’ebé foka liu ba turizmu sustentavel no komunitáriu.
Konsellu Ministrus atribui ona ba Ministra Finansas iha ezersísiu podér tomak hodi asina akordu rua ne’ebé temi iha leten.
Konsellu Ministrus analiza ona proposta Deliberasaun, ne’ebé aprezenta husi Sekretária Estadu ba Igualdade no Inkluzaun, Maria José da Fonseca Monteiro de Jesus, relasiona ho relatóriu revizaun nasionál nian kona-ba implementasaun husi Deklarasaun no Plataforma Asaun Pekín nian, husi períodu entre tinan 2014 no 2018. Deklarasaun no Plataforma Asaun Pekín nian, nu’udar dokumentu ida-ne’ebé kria iha tinan 1995, iha Xina, durante Konferénsia Mundiál Dahaat kona-ba Feto sira, ninia objetivu mak atu debate asaun sira ba promosaun igualdade, dezenvolvimentu no pás ba feto sira. Dokumentu ne’e identifika área temátika prioritária hamutuk 12 ba Estadu sira, hodi ultrapasa obstákulu sira-ne’ebé labarik feto no feto sira hasoru, no hodi alkansa igualdade entre feto no mane. Relatóriu nasionál ne’e fó sai kona-ba progresu no rezultadu-xave sira ne’ebé atinje ona, kona-ba dezafiu no obstákulu sira ne’ebé sira hetan bainhira implementa Deklarasaun no Plataforma Asaun Pekín nian, durante períodu 2014-2018, no sei hato’o ba Komisaun Ekonómika no Sosiál Nasoins Unidas nian ba Ázia no Pasífiku (UN-ESCAP - United Nations - Economic and Social Commission for Asia and Pacific), iha loron 1 fulan-maiu oinmai. Tuirfali mai, Relatóriu ne’e sei aprezenta iha fulan-novembru tinan 2019, iha Bankoke, iha nivel rejionál, iha sorumutuk UN-ESCAP nian no iha fulan-marsu tinan 2020, iha sesaun da-64 husi Komisaun kona-ba Estatutu Feto nian (CSW - Commission on the Status of Women). Relatóriu ne’e sei analiza filafali iha sorumutuk Konsellu Ministrus nian tuirmai. REMATA
