Governu Timor-Leste

Komunikadus

• 09 agostu 2019Toleránsia Pontu iha loron 12 fulan-agostu, Tinan 2019

  Prezidénsia Konsellu Ministrus
  VIII Governu Konstitusionál
  ...........................................................................................................................
  Komunikadu Imprensa
  Toleránsia Pontu iha loron 12 fulan-agostu Tinan 2019
  Lei n.10/2005, loron 10 fulan-agostu, iha redasaun neebé fó hosi Lei n.3/2016, loron 25 fulan-maiu, estabelese loron sira neebé sai nuudar feriadu nasionál, data ofisiál komemorativa sira no sirkunstánsia sira seluk neebé maka bele fó toleránsia pontu.Nunee, haree ba saida mak prevee iha alínea c) hosi n. 2 artigu da-7, no iha alínea d) n-6 husi artigu hanesan, Governu deside fó toleránsia pontu iha loron-segunda mai nee, loron 12 fulan-agostu, ba okaziaun komemorasaun Idul Adha, ba funsionáriu no ajente sira hotu hosi ministériu no serbisu hotu-hotu neebé dependente ba ministériu sira-nee, nunee mós instituisaun no organizmu sira neebé integra iha administrasaun indireta Estadu nian.Idul Adha, neebé selebra mós hanesan Festa Boot ka Festa Sakrifísiu nian, nuudar selebrasaun musulmana nian, neebé fó hanoin fila fali kona-ba Abraão nia sakrifisiu, no neebé tuir fali ho peregrinasaun ba Meka. Festa nee ninia komemorasaun monu iha loron dasanuluk fulan Dhu al-Hijjah (fulan ikus hosi tinan fulak, iha kalendáriu Izlaun nian). Remata

  hare tan
• 
  07 agostu 2019Sorumutu Konsellu Ministrus iha Loron 7 fulan- agostu tinan 2019

  Prezidénsia Konsellu Ministrus
  VIII Governu Konstitusionál
  ...........................................................................................................................
  Komunikadu Imprensa
  Sorumutu Konsellu Ministrus iha Loron 7 fulan- agostu tinan 2019
  Konsellu Ministrus reuni iha Palácio Governu, iha Díli no hahú rona aprezentasaun hosi Diretor Estatístika kona-ba Progresu Dahuluk hosi Sensus Agríkula Nasionál. Sensu Agríkula n’e e ho objetivu rekolla dadus iha setór agríkula hodi defini Polítika no Estratéjia ida ba setór ne’e, apoia programa nasionál ba agrikultura ba Planu Estratéjiku Dezenvolvimentu 2011-2030, dezenvolve indikadór hosi Objetivu Dezenvolvimentu Sustentável, fornese dadus estatístiku kona-ba setór agríkula ne’e iha nível administrativu no fornese enkuadramentu ida ba setór agríkula nasionál. Iha loron-12 fulan agostu too loron-12 fulan outubru 2019 sei rekolla dadus sira, sei lansa relatóriu finál iha fulan abril 2020 no sei disemina rezultadu sira ba munisípiu hotu entre fulan maiu no juñu 2020. ema entrevistadór hamutuk 1.292, operadór GPS hamutuk ema 646 no supervizór hamutuk ema 646 no, totál ema hamutuk 2.584 iha territóriu laran-tomak, hosi totál ne’e 36,8% nuudar seksu femininu, sira hotu halo parte iha ekipa ‘’ Sensu Agríkula’’.
  Ministru Negósiu Estranjeiru no Kooperasaun, Dionísio Babo Soares, aprezenta ba Konsellu MInistru relatóiu progresu kona-ba prosesu adezaun Timor-Leste ba ASEAN. Timor-Leste nia adezaun konsidera nuudar prioritáriu iha kontestu polítiku esternu nian no sei reprezenta impaktu ida pozitivu ba dezenvolvimentu nasionál, ho benefísiu boot ba ekonomia o sosiál. Tinan 2019 sei sai tinan ida desizivu atu halo avaliasaun ida pozitivu kona-ba Timor-Leste nia kapasidade atu kumpri ezijénsia hosi pilár tolu ASEAN nian no, tatuir kedas, adezaun nuudar Estadu-Membru. Timor-Leste adere ba Fórum Rejionál ASEAN nian iha tinan 2005 no entrega ona kandidatura ba Estadu-Membru ASEAN iha tinan 2011. hafoin vizita delegasaun boot Timor-Leste nian ba Sekretariadu ASEAN, entre loron-3 no loron-7 fulan setenbru, Timor-Leste sei simu misaun esploratóriu, hodi reprezenta atividade ne’ebé ho impaktu boot iha prosesu adezaun Timor-Leste nian, hahú hosi loron ne’ebé halo entregue formál kandidatura iha tinan 2011.
  Ministra Finansa iha ezersísiu, Sara Lobo Brites, aprezenta proposta Dekretu-Lei kona-ba primeira alterasaun ba estrutura orgánika ba Autoridade Aduaneira. Alterasaun ida-ne’e buka atu, haree ba komplesidade knaar ne’ebé Autoridade Aduaneira dezempeña, halo ajustamentu balu ne’ebé permiti atu administrasaun bele hatán kedas ho transparente ba dezafiu sira ne’ebé enfrenta loroloron. Tan ne’e maka, tenke halo alterasaun ba estrutura no atribuisaun hosi servisu ruma hosi servisu sentrál Autoridade Aduaneira nian, hodi haree mós ba ninia estrutura no reformulasaun ba ninia atribuisaun no kompeténsia sira ho objetivu atu bele hatán di’akliu ba nesesidade sira no garante prestasaun servisu ida efikza no efisiente ba sidadaun sira. Diploma ida-ne’e akresenta estrutura ba Autoridade Aduaneira servisu sira kona-ba planeamentu no finansa nian, lojístika no jestaun ba patrimóniu no manutensaun, administrasaun no rekursu umanu nomós ba unidade rekursu. No sei altera mós designasaun ba dirijente másimu Autoridade Aduaneira nian, ne’ebé tuirmai sei bolu ho naran Komisáriu. Proposta ida-ne’e sei analiza filafali iha reuniaun Konsellu Ministru hodi hein mós pareser hosi Komisaun Funsaun Públika.
  Ministra Finansa iha ezersísiu mós aprezenta proposta Dekretu-Lei kona-ba primeira alterasaun ba estrutura orgánika ba Autoridade Tributária. Liuhosi diploma ida-ne’e sei halo alterasaun ba estrutura no atribuisaun sira hosi servisu sentrál Autoridade Tributária servisu sira kona-ba deklarasaun no likuidasaun, jestaun antifraúde, devolusaun no reenbolsu ba impostu sobre valór akresentadu, aprovizionamentu no kontratu, sistema informasaun no rejistu kontribuinte, relasaun internasionál tributária, komuniksaun no relasaun públika ba kontratante no sub-kontratante ba inspesaun tributária petrolífera no ba inspesaun tributária minerál. Proposta ida-ne’e sei analiza filafali iha reuniaun Konsellu Ministru hodi hein mós pareser hosi Komisaun Funsaun Públika. REMATA

  hare tan
• 05 agostu 2019Feriadu Nasional ba Selebrasaun loron Idul Adha 2019

  Prezidénsia Konsellu Ministrus
  VIII Governu Konstitusionál
  ...........................................................................................................................
  Komunikadu Imprensa
  Feriadu Nasional ba Selebrasaun loron Idul Adha

  hare tan
• 02 agostu 2019Timor-Leste Simu Deklarasaun Husi Enkontru Ministru Negósius Estranjeirus ASEAN nian ba dala 52 Rekoñese Progresu ba Adezaun ba ASEAN

  Prezidénsia Konsellu Ministrus
  VIII Governu Konstitusionál
  ...........................................................................................................................
  Komunikadu Imprensa
  Timor-Leste Simu Deklarasaun Hosi Enkontru Ministru Negósius Estranjeirus ASEAN nian ba dala 52 Rekoñese Progresu ba Adezaun ba ASEAN
   
  Timor-Leste, liu husi Ministériu Negósius Esranjeirus no Kooperasaun, simu Komunikadu Konjuntu husi Enkontru Ministru Negósius Estranjeirus ASEAN nian ba dala 52, ne’ebé hala’o iha 31 Jullu 2019, iha Banguecoque.
  Timor-Leste fo agradese ba Membru Estadu ASEAN – liuliu Tailándia – ba sira nia laran luak durante delegasaun nia vizita ba Banguecoque no rekoñese katak rezultadu husi enkontru ida ne’e sai hanesan momentu ne’ebé importante ba nasaun nia adezaun ba ASEAN.
  Hanesan konfirma ona iha Komunikadu Konjuntu husi enkontru ida ne’e, Timor-Leste hein atu simu Misaun ba Apuramentu Faktu kona ba nasaun nia preparasaun atu adere ba ASEAN iha Pilar Polítika no Seguransa ASEAN, iha inísiu fulan Setembru.
  Governu Timor-Leste kontinua kompromete maka’as atu atinje adezaun ida ne’ebé diak ba ASEAN no sei kontinua dezenvolve ho di’ak iha preparasaun téknika iha fulan hirak tuir mai. REMATA

  hare tan
• 
  31 jullu 2019Sorumutu Konsellu Ministrus iha Loron 31 fulan- jullu tinan 2019

  Aprova ona:
  1 - Dekretu Lei kona-ba Orgánika Ministériu Finansas nian;
  2 - Tetu Fiskál no prioridade nasionál sira ba Orsamentu Jerál Estadu (OJE) ba tinan 2020;
  3 - Memorandu entendimentu entre Repúblika Demokrátika Timor-Leste no Repúblika Indonézia, kona-ba kooperasaun aduaneira no asisténsia mútua iha asuntu aduaneira nian; no
  4 - Naran atu fó kondekorasaun ho “Orden Timor-Leste nian” iha okaziaun selebrasaun aniversáriu ba dala 20 Konsulta Popular.

  hare tan
• 24 jullu 2019Sorumutu Konsellu Ministrus iha Loron 24 fulan- jullu tinan 2019

  Prezidénsia Konsellu Ministrus
  VIII Governu Konstitusionál
  ...........................................................................................................................
  Komunikadu Imprensa
  Sorumutu Konsellu Ministrus iha Loron 24 fulan- jullu tinan 2019
  Konsellu Ministrus hala’o sorumutuk iha Palásiu Governu, iha Dili, no entrega podér tomak ba Ministru Justisa, Manuel Cárceres da Costa, ba asinatura adezaun Timor-Leste nian ba Konvensaun Nasoins Unidas kona-ba Akordu Kompensasaun Internasionál ne’ebé maihusi Mediasaun, koñesidu mós ho naran Konvensaun Singapura kona-ba Mediasaun. Konvensaun ida-ne’e, ne’ebé Asembleia Jerál Nasoins Unidas nian adota iha loron 20 fulan-dezembru tinan 2018, ninia objetivu mak atu garante ba Estadu no organizasaun rejionál sira halo parte iha integrasaun ekonómika, kuadru legál transfronteirisu ne’ebé garante kumprimentu ba akordu sira ne’ebé prevee mediasaun nu’udar forma atu rezolve disputa hirak ne’ebé bele mosu, entre Parte sira iha área komersiál. Konvensaun ida-ne’e prevee Mediasaun hanesan dalan atu rezolve disputa sira ne’ebé maka mosu iha kontestu relasaun komersiál internasionál sira no hetan ona ratifikasaun husi nasaun 150 resin, inklui nasaun hotu ASEAN nian. Timor-Leste sei asina Konvensaun ne’e iha loron 7 fulan-agostu mai iha Singapura.
  Ministru Interiór iha ezersísiu, Filomeno da Paixão de Jesus, aprezenta ona proposta Rezolusaun Governu nian, ne’ebé hetan ona aprovasaun husi Konsellu Ministrus, kona-ba livre vistu turizmu ba sidadaun Indonézia nian sira, ho nune’e, implementa memorandu entendimentu entre Timor-Leste, Indonézia no Banku Dezenvolvimentu Aziátiku kona-ba asisténsia téknika ba komérsiu transfronteirisu no kooperasaun. Rezolusaun ida-ne’e buka atu hametin kooperasaun ekonómika transfronteirisa hodi kombate moris-kiak no kria oportunidade ekonómika foun sira no reseita ho impulsiona turizmu transfronteirisu nian. O objetivu seluk husi rezolusaun ne’e maka prepara integrasaun ba AZEAN liuhusi kooperasaun ida-ne’ebé boot liután ho nasaun viziñu ne’ebé besik liu, apoiu ba kreximentu no diversifikasaun ekonómika.
  Konsellu Ministrus fó mós podér tomak ba Ministru Defeza, Filomeno da Paixão de Jesus, hodi asina prolongamentu ba Memorandu entendimentu ho Ministériu Defeza Japaun nian, kona-ba Kooperasaun iha edukasaun no formasaun iha área asisténsia umanitária no área operasaun sokorru nian iha dezastre sira.
  Ikusliu, Konsellu Ministrus fó podér tomak ba Ministra Edukasaun, Juventude no Desportu, Dulce de Jesus Soares, hodi asina Adenda ba Protokolu Kooperasaun entre Repúblika Demokrátika Timor-Leste no Repúblika Portugeza, ba kontinuidade husi implementasaun projetu Sentru Aprendizajen no Formasaun Eskolár (CAFE, sigla iha lian portugés) nian no realizasaun avaliasaun internasionál ne’ebé prevee ona iha protokolu, ne’ebé loke dalan atu debate ho parseiru faze foun ida husi implementasaun projetu ne’e nian no fó kontinuasaun, iha tinan 2019, ba prosedimentu hotu-hotu ne’ebé nesesáriu hodi garante implementasaun projetu ne’e nian hahú husi tinan 2020. Protokolu ne’e asina ona iha loron 30 fulan-dezembru tinan 2014, ba períodu tinan haat no renova ona iha loron 20 fulan-jullu tinan 2017, ba períodu loron 29 fulan-setembru tinan 2018 to’o loron 31 fulan-dezembru tinan 2019. Adenda tuirmai prevee prorrogasaun ba tinan rua liu, ne’ebé sei aplika husi loron 1 fulan-janeiru tinan 2020 to’o loron 31 fulan-dezembru tinan 2021. REMATA

  hare tan
• 10 jullu 2019Sorumutu Konsellu Ministrus iha Loron 10 fulan- jullu tinan 2019

  Prezidénsia Konsellu Ministrus
  VIII Governu Konstitusionál
  ...........................................................................................................................
  Komunikadu Imprensa
  Sorumutu Konsellu Ministrus iha Loron 10 fulan- jullu tinan 2019
  Konsellu Ministrus hala’o sorumutuk iha Palásiu Governu, Dili no hahú ho aprezentasaun ida husi Ministériu Edukasaun, Juventude no Desportu, kona-ba preparasaun ba Jogu Desportivu XII CPLP, Timor 2020 ne’ebé sei hala’o husi loron 14 to’o 24 fulan-jullu tinan 2020. Programa ne’ebé Sekretáriu Estadu Juventude no Desportu, Nélio Isaac Sarmento, aprezenta ne’e inklui país partisipante sira, modalidade no infraestrutura ne’ebé oras ne’e prepara daudaun, hanesan estádiu lubun ida ba modalidade desportiva oin-oin, alojamentu, transporte, servisu médiku sira no seguransa, no seluk tan. Iha sorumutuk ne’e iha mós aprezentasaun kona-ba logotipu no múzika ne’ebé prepara espesiál ba eventu internasionál ida ne’e, atu membru sira Konsellu Ministrus nian halo apresiasaun.
  Konsellu Ministrus, liuhusi Rezolusaun Governu nian ida analiza no aprova ona Memorandu Entendimentu ida entre Autoridade Nasionál Petróleu no Minerais, Department of Industry, Innovation and Science husi Commonwealth Austrália nian no Australian National Offshore Petroleum Safety and Environmental Management Authority, kona-ba kooperasaun entre autoridade reguladora sira relasiona ho Kampu Gás Bayu-Undan nian no ninia Gazodutu. Memorandu Entendimentu aprezenta husi ekipa ANPM nian, ne’ebé lidera husi Sr. Gualdino da Silva. Konsellu Ministrus fó podér tomak ba Sr. Gualdino da Silva atu asina Memorandu ne’e, hodi Autoridade Nasionál Petróleu no Minerais nia naran.
  Sekretáriu Estadu Juventude no Desportu, Nélio Isac Sarmento, aprezenta ona rezolusaun Governu nian ida ne’ebé estabelese Komisaun Eventuál Interministeriál ida, kona-ba Koordenasaun Atividade sira iha Ámbitu Konferénsia Ministru Juventude no Desportu CPLP nian sira no iha XII Âmbitu Jogu Desportivu sira CPLP nian. Konsellu Ministrus analiza no aprova ona Rezolusaun ne’e.
  Konsellu Ministrus aprova no fó podér tomak ba Ministra Edukasaun, Juventude no Desportu, Dulce de Jesus Soares, atu asina Proposta Alterasaun Akordu Kooperasaun iha Domíniu Juventude no Desportu, ne’ebé sei aprezenta iha XII Konferénsia Ministru Juventude no Desportu CPLP nian sira, ne’ebé sei hala’o iha Luanda, Angola entre loron 22 to’o loron 24 fulan-jullu tinan 2019.
  Ministru Obras Públikas, Salvador Soares dos Reis Pires, aprezenta ba Konsellu Ministrus, proposta ida atu altera kontratu kona-ba konstrusaun auto-estrada Suai, ho n. ICB/ 007/MPNR-2013, ne’ebé selebra ona ho konsórsiu China Overseas Engineering Group Co. Ltd. e China Railway First Group Co. Ltd. (seksaun I – Suai-Fatukai/Mola),  ne’ebé refere ba projetu Dezenvolvimentu Infraestrutura iha Tasi Mane. Alterasaun ne’e la implika kualkér aumentu ba kustu inisiál. Konsellu Ministrus aprova liuhusi Deliberasaun, proposta husi Ministru Obras Públikas nian. Remata

  hare tan
• 09 jullu 2019Sorumutu Extraordinária Konsellu Ministru loron 8 no 9 fulan-jullu tinan 2019

  Prezidénsia Konsellu Ministrus
  VIII Governu Konstitusionál
  ...........................................................................................................................
  Komunikadu Imprensa
  Sorumutu Extraordinária Konsellu Ministru loron 8 no 9 fulan-jullu tinan 2019
  Konsellu Ministru, hala’o sorumutu extraordinária ho xefe Ekipa ba Negosiasaun Konsellu ba Delimitasaun Definitva Fronteiras Maritimas no hanesan Reprezentante Espesiál Governu Timor-Leste ba Konkluzaun Prosedimentu sira ne’ebé nesesáriu ba Ratifikasaun Tratadu entre Repúblika Demokrátika Timor-Leste ho Commonwealth  Austrália ne’ebé estabelese ida-ida nia Fronteiras Maritimas iha Tasi Timor, Akizisaun interese sira iha kampu mina-rai sira no selebrasaun akordu sira kona-ba dezenvolvimentu husi Kampu Greater Sunrise nian, Kay Rala Xanana Gusmão, durante loron rua, loron 8 no 9 fulan-jullu.
  Sorumutu ida ne’e ho objetivu atu analiza no aprova husi Konsellu Ministru kona-ba proposta lejislasaun no dokumentus sira seluk ne’ebé presiza submete ba Parlamentu Nasionál kona-ba proposta rezulusaun ne’ebé sei hare ba ratifikasaun husi Tratadu entre Repúblika Demokrátika Timor-Leste no Austrália ne’ebé mak ida-ida estabelese ona Fronteiras Maritimas iha Tasi Timor
  Durante dader loron segunda-feira Xefe Ekipa Negosiasaun aprezenta proposta Tratadu nian no Prezidente Autoridade Nasional Petroleu no Minerais, Gualdino da Silva, aprezenta ba Konsellu Ministru rezumu ida no rezultadu prosesu negosiasaun ho emprensa mina-rai sira ne’ebé oras ne’e opera iha area dezenvolvimentu konjuntu (JDPA) tuir lisensa ne’ebé Austrália fó.
  Iha ambitu testu Tratadu ne’ebé Konsellu Ministru aprova atu submete ba ratifikasaun Parlamentu Nasional nian konforme previstu iha Tratadu Tasi Timor, Timor-Leste kompromete atu garante empreza sira nia kondisoins  hanesan iha lisensa ne’ebé australia  fó ba JPDA.
  Ba efeitu ne’e Konsellu Ministru analiza no aprova proposta Lei ida atu submete ba Parlamentu Nasional atu halo adaptasaun ba Lei fiskal sira hotu no fó dalan ba Timor-Leste atu kobra impostu iha atividade esplorasaun mina-rai iha Tasi Timor, no nune’e bele preve hasa’e reseita fiskal hanesan tributasaun ba atividade mina-rai sira iha area ne’ebé uluk fahe ho Austrália ka esklusivu Austrália.
  Tuir mai Konsellu Ministru analiza no aprova proposta Lei ida atu submete ba Parlamentu Nasional ne’ebé estabelese rejime laboral no migratóriu espesífiku ba esplorasaun husi Kampu Mina-rai Bayu-Undan. Ho forma atu fó dalan ba kampu mina-rai ne’e bele kontinua halo operasaun iha kondisaun ne’ebé iha to’o ohin loron ne’e presiza halo adaptasaun ba lei traballu sira no migrasaun ne’ebé permiti katak traballadór sira hotu, ema timoroan no estranjeiru sira bele kontinua servisu nafatin tuir akordu ho regras no prátika internasionál ne’ebé diak ba setór atividade ida ne’e.
  Konsellu Ministro analiza no aprova mós proposta Lei rua atu submete ba Parlamentu Nasional, kona-ba adaptasaun ba Lei Atividades Mina-rai no Lei Fundo Mina-rai ba rejime ne’ebé rezulta husi Tratadu foun.
  Durante tersa-feira loron 9 fulan-jullu,  Konsellu Ministru analiza, diskuti no aprova projetu Dekretu-Lei 4 ne’ebé estabelese Tranzisaun Títulos Mina-rai no Regulamentasaun atividade Mina-rai iha kampu Bayu-Undan, iha esplorasaun ne’ebé uluk situa iha Area Konjunta Dezenvolvimentu Mina-rai (ACDP), iha Kampu Buffalo no iha Area balun husi lisensa AC/L5 no WA-18-L (Laminaria no Koralina), no mós minutas sira Kontratu hodi fahe Produsaun ne’ebé regulamenta atividade ho kontratante sira no instrumentu kontratuais sira seluk ne’ebé presiza atu finaliza tranzisaun.
  Ikus-liu, total dokumentu hamutuk 50, Konsellu Ministru aprova mós Projetu Dekretu-Lei kona-ba alterasaun ba Dekretu-Lei n.º 20/2008, loron 19  fulan-juñu, ne’ebé kria Autoridade Nasionál Petróleu no Minerais, ho objetivu atu halo adaptasaun ba diploma orgániku ANPM ninian ba regulamentasaun foun ne’ebé rezulta husi Tratadu Fronteira Maritimas, no mós proposta Rezolusaun rua atu realiza akordu ho Austrália ne’ebé sei fó dalan troka informasaun sira ba kontratantes refere to’o Tratadu tama iha vigór ne’ebé opera iha Area Dezenvolvimentu Konjuntu ka Area juridisaun esklusivu Austrália nian no rejime ba operasaun kadoras Bayu-Undan nian no segmentu tuir Tratadu sei hela iha area plataforma kontinental ba juridisaun ekslusivu Timor-Leste nian.
  ANEKSU
  Lista Pakote Lejislativa sira ne’ebé mak aprova mak hanesan tuir mai ne’e:
  
  Proposta Rezolusaun ba Parlamentu Nasional ba Ratifikasaun Tratadu entre Repúblika Demokrátika Timor-Leste no Austrália ne’ebé  ida-ida estabelese ona Fronteiras Maritimas iha Tasi Timor
  Proposta husi Lei ne’ebé aprova ba alterasaun dahuluk mak Lei n.8/2008, loron 30 fulan-juñu, Lei dahuluk n.3/2003, loron 1 fulan-Jullu kona-ba tributasaun ba kontraentes husi Bayu-Undan no altersaun dahuluk ba Lei n.4/2003 loron 1 fulan-jullu, kona-ba dezenvolvimentu husi petróleu Tasi Timor.
  Proposta husi Lei ne’ebé aprova mak Rejime Laboral no Migratóriu Espesiál Aplikável ba Projetu Bayu-Undan;
  Proposta husi Lei ne’ebé aprova altersaun daruak mak Lei n.13/2005, loron 2 fulan-setembru, ne’ebé mak aprova hanesan Lei husi Atividade Petrolífera;
  Proposta husi Lei ne’ebé aprova husi alterasaun datolu mak Lei n.9/2005, loron 3 fulan-agostu, ne’ebé aprova hanesan Lei Fundu Petrolífero;
  Dekretu-Lei kona-ba Tranzisaun Títulu Petoliferu no Regulamentasaun husi Atividade Petrolifera iha Kampu Bayu Undan;
  Dekretu-Lei ne’ebé kona-ba Tranzisaun Títulu Petoliferu no Regulamentasaun Atividade Petrolifera anteriormente situadas iha Area Konjunta husi Dezenvolvimento Petrolíferu (ACDP);
  Dekretu-Lei kona-ba Tranzisaun Títulu Petoliferu no Regulamentasaun Atividade Petrolifera anteriormente situadas iha Area Konjunta husi Dezenvolvimento Petrolíferu iha kampu Buffalo;
  Dekretu-Lei kona-ba Tranzisaun Títulu Petoliferu no Regulamentasaun Atividade Petrolifera iha area linsensa balun AC/L5 e WA-18-L;
  Dekretu-Lei ne’ebé aprova iha alterasaun dahuluk ba Dekretu-Lei n.20/2008, loron 19 fulan-juñu, ne’ebé kria Autoridade Nasionál Petroleu Minerais. REMATA
  

  hare tan