Komunikadus
- 11 setembru 2019Sorumutu Konsellu Ministrus iha Loron 11 fulan-setembru tinan 2019Prezidénsia Konsellu Ministrushare tan
VIII Governu Konstitusionál
...........................................................................................................................
Komunikadu Imprensa
Sorumutu Konsellu Ministrus iha Loron 11 fulan-setembru tinan 2019
Konsellu Ministrus hala’o sorumutuk iha Palásiu Governu, iha Dili no asiste aprezentasaun husi Ministru Estadu Prezidénsia Konsellu Ministrus, Agio Pereira no ekipa peritu husi DLA Piper, relasiona ho opsaun sira ba setór aviasaun sivíl iha Timor-Leste. Aprezentasaun ne’e ninia objetivu mak atu hato’o opsaun estratéjika sira ne’ebé apropriada liu ba tempu badak, médiu no naruk, ne’ebé bele disponivel ba Governu, atu asegura transporte aéreu no evita izolamentu impostu husi merkadu kompetitivu iha indústria aérea nian.
Ministru Defeza Filomeno Paixão de Jesus, halo aprezentasaun ida iha Konsellu Ministrus kona-ba definisaun Konseitu Estratéjiku Militár (KEM) ida ba Timor-Leste. Kriasaun Konseitu Estratéjiku Militár ida ne’e bazeia ba lejizlasaun ne’ebé vigora hela no ho objetivu atu hametin Forsas Armadas nasionais no reforsu ba seguransa nasionál, tuir evolusaun seguransa globál, rejionál no lokál nian.
Konsellu Ministrus asiste mós aprezentasaun husi Ministru Reforma Lejizlativa no Asuntus Parlamentares, Fidelis Leite Magalhães, relasiona ho proposta husi Ekipa Dezenvolvimentu Kompaktu – Timor-Leste (Compact Development Team – Timor-Leste, CDTL-TL) kona-ba komponente sira husi programa ne’ebé sei hato’o ba Millennium Challenge Corporation (MCC). Programa ida ne’e, ne’ebé haree liuliu ba oinsá atu hatán ba dezafiu ekonómiku sira país nian, hanesan Timor-Leste no MCC identifika hamutuk ona, ninia objetivu maka atu halakon moris-kiak no atu hasa’e kreximentu ekonómiku nasionál, no ninia komponente haat maka hanesan: fornesimentu bee-moos, saneamentu no drenajen; edukasaun; nutrisaun; no rezolusaun ba disputa komersiál sira.
Konsellu Ministrus aprova ona Rezolusaun Governu nian ne’ebé aprezenta husi Ministra Finansas iha ezersísiu, Sara Lobo Brites, relasiona ho definisaun ba kompozisaun Komité Revizaun Polítiku ho objetivu atu halo verifikasaun ba alokasaun estratéjika rekursu sira atu nune’e bele atinje kompromisu no objetivu hirak ne’ebé inklui ona iha dokumentu estratéjiku sira no apresia ezekuibilidade husi planu sira ba tinan finanseiru 2020 nian.
Ministru Justisa, Manuel Cárceres da Costa, aprezenta ona proposta Rezolusaun Governu nian kona-ba autorizasaun atu sosa kilat ba pesoál Polísia Sientífika Investigasaun Kriminál (PCIC), hanesan korpu superiór Polísia Kriminál ne’ebé iha misaun atu tulun autoridade judisiária, dezenvolve no promove asaun prevensaun, detensaun, investigasaun ne’ebé sai nu’udar ninia kompeténsia ka kompeténsia balun ne’ebé autoridade judisiária atribui ba nia, no mós asegura sentralizasaun nasionál ba informasaun kriminál no ninia koordenasaun operasionál no kooperasaun polisiál internasionál.
Konsellu Ministrus fó Podér Tomak ba Ministru Justisa atu asina akordu entre Ministériu Justisa Timor-Leste no Universidade Coimbra, Portugál, kona-ba estabelesimentu kooperasaun akadémika, sientífika no kulturál, iha ámbitu formasaun ba majistradu, defensór públiku no lisensiadu Direitu iha Timor-Leste.
Ministru Justisa aprezenta mós proposta Deliberasaun Konsellu Ministrus nian kona-ba alterasaun ba Protokolu Kooperasaun entre Ministériu Justisa Timor-Leste no Ministériu Justisa Portugál iha área Justisa nian, ne’ebé asina ona iha loron 25 fulan-fevereiru tinan 2016. Proposta deliberasaun ne’ebé Konsellu Ministrus aprova, ninia objetivu mak atu altera kritériu sira remunerasaun nian kona-ba kontratasaun téknika ba apoiu funsionamentu judisiál, asesoria no konsulta no mós kapasitasaun rekursus umanus. Alterasaun ba protokolu kooperasaun sei asina husi Ministru Justisa nasaun rua ne’e nian iha loron 17 fulan-setembru ne’e.
Governu aprova ona proposta Deliberasaun Konsellu Ministrus nian, ne’ebé aprezenta husi Ministru Administrasaun Estatál iha ezersísiu, Abílio José Caetano, kona-ba apoiu finanseiru husi Timor-Leste ba eleisaun prezidensiál Giné-Bisau nian iha fulan-novembru tinan 2019.
Konsellu Ministrus liuhusi dalan ida-ne’e hatán ba pedidu apoiu tékniku no finanseiru atu organiza no hala’o eleisaun prezidensiál ne’ebé Governu Giné-Bisau hato’o, hodi fó apoiu finanseiru ida ho valór dolar amerikanu rihun atus-tolu no nomeia Tomás do Rosário Cabral nu’udar Reprezentante Espesiál Governu nian, ho misaun atu halo identifikasaun ba obstákulu sira, kona-ba organizasaun no realizasaun resenseamentu eleitorál nian no kona-ba eleisaun ne’ebé livre no justa.
Konsellu Ministrus aprova ona proposta Dekretu-Lei kona-ba Lei Orgánika Ministériu Planeamentu no Investimentu Estratéjiku, departamentu governamentál ne’ebé sai nu’udar responsavel ba konsesaun, koordenasaun no avaliasaun polítika, ne’ebé Konsellu Ministrus define no aprova ona, ba área sira hanesan promosaun dezenvolvimentu ekonómiku no sosiál nasaun nian, liuhosi planeamentu estratéjiku no integradu no mós rasionalizasaun rekursus finanseirus ne’ebé disponivel hodi asume responsabilidade espesífika sira kona-ba implementasaun Planu Estratéjiku Dezenvolvimentu nian.
Ikus liu, Konsellu Ministrus fó Podér Tomak ba Ministru Transportes no Komunikasoins, José Agustinho da Silva, atu asina Akordu sira kona-ba Servisu Aéreu nian ho Estadu Qatar no ho Uniaun Emiradus Árabes, tuir Konvensaun kona-ba Aviasaun Sivíl Internasionál, ho objetivu atu estabelese no halo operasaun servisu aéreu sira entre Timor-Leste ho nasaun rua ne’e no mós ho nasaun sira seluk. REMATA - 28 agostu 2019Asinatura Kontratus Partilla Produsaun ho Operador Petróleo Offshore siraKOMUNICADO IMPRENSA KONJUNTUhare tan
Ministru Estadu Prezidénsia Konsellu Ministrus no Ministru Petróleu no Minerais iha ezersísiu,
Hermenegildo Cabral Pereira
Ministru Negósius Estranjeirus no Kooperasaun husi Timor-Leste,
Dionisio da Costa Babo Soares
Loron 28, FulanAgostu, Tinan 2019
Governu Timor-Leste konklui ona prosesu ‘rejime tranzitóriu’, ne’ebé presiza atu Tratadu entre Repúblika Demokrátika Timor-Leste no Austrália, ne’ebé estabelese sira-nia ketan-tasik iha Tasi Timór, tama iha vigór iha loron 30 fulan-agostu tinan 2019.
Hafoin períodu konsulta no negosiasaun ida ne’ebé naruk, ne’ebé hahú molok asinatura ba Tratadu iha fulan-marsu tinan 2018, no oras ne’e to’o ona nia rohan, Governu asina Kontratu Partilla Produsaun nian foun hamutuk lima ho empreza petróleu no gás ne’ebé afeta husi Tratadu ne’e, hodi garante estabilidade no seguransa ba operasaun offshore iha Tasi Timor, durante períodu tranzisaun nian tomak husi Tratadu Tasi Timór ba Tratadu Ketan-Tasik nian foun.
Governu asina mós akordu foun sira ho Governu Austrália kona-ba troka informasaun fiskál sira entre Timor-Leste no Austrália, no memorandu entendimentu rua entre instituisaun sira husi Estadu rua ne’e, ne’ebé permite kooperasaun iha matéria petróleu nian (liuliu kona-ba jestaun kadoras mina Bayu-Undan nian no kona-ba transferénsia dadus jeolójikus no kooperasaun ne’ebé iha relasaun).
Asinatura ba Kontratu Partilla Produsaun nian lima no akordu sira seluk ho Governu Austrália halo parte husi kondisaun prévia hirak ne’ebé presiza ba troka nota diplomátika sira entre Timor-Leste no Austrália, ne’ebé kompleta prosesu rejime tranzitóriu ida-ne’e no sei permite atu Tratadu Fronteira nian tama iha vigór iha loron 30 fulan-agostu tinan 2019. ENDS - 28 agostu 2019Asinatura Memorandu Entendimentu no Akordu Kooperasaun husi Timor-Leste no AustráliaGOVERNU TIMOR-LESTE NO GOVERNU AUSTRÁLIAhare tan
KOMUNIKADU IMPRENSA KONJUNTU
Ministru Negósius Estranjeirus no Kooperasaun husi Timor-Leste,
Dionisio da Costa Babo Soares
Ministru Recursus no Norte husi Austrália,
Senador Matthew Canavan
Loron 28, FulanAgostu, Tinan 2019
Asinatura memorandu entendimentu no Akordu Kooperasaun husi Timor-Leste no Austrália
Iha loron 6 fulan-marsu tinan 2018, Ministru Adjuntu Primeiru-Ministru nian ba Delimitasaun Fronteira no Ajente Prosesu Konsiliasaun nian iha tempu ne’ebá, Hermenegildo Cabral Pereira, no Ministra Negósius Estranjeirus Austrália nian iha tempu ne’ebá, Julie Bishop, asina ona Tratadu entre Repúblika Demokrátika Timor-Leste no Austrália ne’ebé mak estabelese sira-nia Ketan Tasik iha Tasi Timor.
Tratadu kona-ba Ketan Tasik ne’e estabelese ketan tasik permanente sira entre país rua ne’e no kuadru jurídiku ida ne’ebé estavel ba dezenvolvimentu rekursu mina-rai no gás iha Tasi Timor.
Dezde asinatura ba Tratadu Ketan Tasik, país rua ne’e serbisu hamutuk nafatin no serbisu hamutuk ho operadór petrolíferu offshore sira, hodi define dispozisaun tranzitória sira, ne’ebé maka sei fó seguransa komersiál no garantia ba parte hotu-hotu durante prosesu tranzisaun nian tomak husi Tratadu Tasi Timor ba Tratadu Ketan Tasik nian foun.
Governu Timor-Leste, husi nia parte, konklui ona dispozisaun tranzitória ba implementasaun Tratadu Ketan Tasik ho asinatura ba Kontratu Partilla Produsaun foun lima ho operadór petrolíferu offshore sira.
Governu Austrália nian, husi nia parte, mós konklui ona foin lalais ne’e dispozisaun tranzitória sira ba implementasaun Tratadu Ketan Tasik, ho aprovasaun iha Parlamentu Austrália nian ba lejizlasaun ne’ebé pertinente iha matéria ne’e.
Timor-Leste no Austrália asina ona akordu ida kona-ba troka informasaun fiskál sira entre país rua no memorandu entendimentu rua entre sira-nia instituisaun atubele permite kooperasaun kona-ba kestaun sira ne’ebé iha relasaun ho petróleu.
Ho konkluzaun no asinatura ba akordu sira-ne’e maka konklui ona medida hotu-hotu ne’ebé presiza ba troka nota diplomátika sira entre Timor-Leste no Austrália, ne’ebé sei hala’o iha loron 30 fulan-agostu no ne’ebé konfirma katak Tratadu Ketan Tasik nian tama ona iha vigór.
Timor-Leste no Austrália haree ho fiar metin ba troka nota diplomátika sira, ba entrada iha vigór Tratadu Ketan Tasik nian no ba kapítulu foun ida iha amizade entre país rua ne’e. REMATA - 27 agostu 2019Sorumutu Extraordinária Konsellu Ministrus iha Loron 27 fulan-agostu tinan 2019Prezidénsia Konsellu Ministrushare tan
VIII Governu Konstitusionál
...........................................................................................................................
Komunikadu Imprensa
Sorumutu Extraordinária Konsellu Ministrus iha Loron 27 fulan-agostu tinan 2019
Konsellu Ministrus hala’o sorumutuk iha Palásiu Governu, iha Díli no aprova Rezolusaun Governu nian, ne’ebé aprezenta husi Ministru Petróleu no Mina-rai iha ezersísiu, Agio Pereira, kona-ba nomeasaun despaxante ofisiál ba atividade sira importasaun no esportasaun iha kampu Bayu-Undan nian. Hare katak ho asinatura Tratadu Tasi Timor nian, nu’udar projetu ida ne’ebé sei tranzita husi Área Konjunta Dezenvolvimentu Petrolíferu daudaun ne’e ba jurisdisaun eskluziva Timor-Leste nian, maka projetu Bayu-Undan, Rezolusaun Governu nian ida-ne’e ho objetivu hodi mantein empreza Altus Oil & Gas Services hanesan despaxante ofisiál, hodi hamenus perturbasaun ba iha operasaun ne’ebé hala’o hela, konforme ezije husi obrigasaun internasionál nian sira ne’ebé asume husi Estadu Timor-Leste bazeia ba Tratadu nian.
Konsellu Ministrus fó poder tomak ba Ministra Edukasaun Juventude no Desportu, Dulce de Jesus Soares, atu asina programa PRO-Portugés, parseria ida entre Ministériu ne’e no INFORDEPE no Camões, Institutu Kooperasaun no Lian nian. Projetu ida-ne’e atu kontribui ba konsolidasaun husi sistema edukativu Timor-Leste nian, liuhusi apoiu ba setór formasaun profisionál no kontínua husi pesoál dosente ba sistema edukativu ensinu nian la’ós superiór. Programa ida-ne’e atu substitui programa Formar+, ne’ebé remata iha loron 31 fulan-dezembru tinan 2018 no sei ezekuta entre tinan 2019 no tinan 2022. Liuhosi Projetu PRO-Portugés nian ne’e, ho realizasaun oras 520 formasaun nian ba profesór sira maizumenus 4 300 tinan-tinan, karik bele, ba prazu tinan tolu nian, ne’ebé profesór hotu-hotu hosi sistema edukativu nasionál nian bele atinje nivel B2 ho kapasidade linguístika iha lian portugeza to’o finál tinan 2022 nian.
Hanesan parte integrante husi programa Selebrasaun Aniversáriu Konsulta Popular ba dala 20, iha parte dader loron 29 fulan-agostu, sei realiza mós selebrasaun relijioza iha tempu ne’ebe hanesan husi konfisoins relojiosas prinsipais lima, ne’ebe hanesan reprezentante iha Timor-Leste, ne’ebe mak sei konta mós ho prezensa husi VIII Governu.
Selebrasaun Katolika, sei hala’o iha Igreja Katedral, Dili no sei konta ho prezensa husi Ministru Justisa, selebrasaun protestante sei hala’o iha Igreja Osana no konta ho prezensa husi Ministra Edukasaun Juventude no Desportu, no Ministru Obras Públika sei akompaña serimónia Islamika iha Meskita An-Nur, no selebrasaun iha Templo Budista sei akompaña husi Vise-Ministru ba Dezenvolvimentu Estratéjiku Saúde no ikusliu, serimónia Hindu, sei hala’o iha templo Pura Girinatha no sei konta ho prezensa husi Ministru Agrikultura no Peskas. REMATA - 23 agostu 2019Toleránsia de Pontu ba okaziaun Komemorasaun Aniversáriu Konsulta Popular ba dala 20Prezidénsia Konsellu Ministrushare tan
VIII Governu Konstitusionál
...........................................................................................................................
Komunikadu Imprensa
Toleránsia de Pontu ba okaziaun Komemorasaun Aniversáriu Konsulta Popular ba dala 20
Governu deside fó toleránsia de pontu durante períudu lorokraik iha loron-26 to’o loron-29 fulan agostu tinan 2019, tan okaziaun atu selebra vijésimu aniversáriu Konsulta Popular no misaun INTERFET nian, ba funsionáriu no ajente hotuhotu iha ministériu no servisu sira ne’ebé nia depende ba, nomós ba institutu no organizmu sira ne’ebé integra iha administrasaun indireta Estadu nian nune’e, permiti atu ema bele fó partisipasaun másimu iha atividade komemorativa sira ne’e..
Desizaun ida-ne’e baziea ba Lei n.º 10/2005, 10 agostu nian, ne’ebé determina feriadu nasionál sira, data ofisiál komemorativa no regra sira kona-ba toleránsia de pontu. RAMATA - 23 agostu 2019Sorumutu Konsellu Ministrus iha Loron 23 fulan-agostu tinan 2019Prezidénsia Konsellu Ministrushare tan
VIII Governu Konstitusionál
...........................................................................................................................
Komunikadu Imprensa
Sorumutu Konsellu Ministrus iha Loron 23 fulan-agostu tinan 2019
Konsellu Ministrus hala’o sorumutuk iha Palásiu Governu, iha Dili no asiste aprezentasaun husi Ministru Reforma Lejizlativa no Asuntus Parlamentares, Fidelis Manuel Leite Magalhães, kona-ba Programa Reforma ba Administrasaun Públika.
Programa ida-ne’e hatama mós iha grupu ida ba reforma institusionál boot haat nian (Reforma ba Administrasaun Públika, Reforma ba Jestaun Fiskál no Finanseira, Reforma ba Desentralizasaun no Reforma Legál no Judisiál) atubele realiza no ho objetivu atu transforma no moderniza administrasaun públika sai kompetente, inovadora, responsiva no transparente liután, ne’ebé mak orienta ba públiku no ba rezultadu sira.
Programa Reforma Administrasaun Públika nian organiza ona iha komponente lima: prestasaun servisu; insentivu no responsabilizasaun; jestaun no dezenvolvimentu rekursus umanus; rasionalizasaun estrutura no funsaun sira; no hadi’a ambiente negósiu sira.
Ministra Edukasaun Juventude no Desportu, Dulce de Jesus Soares, halo aprezentasaun ida ba Konsellu Ministrus, kona-ba Projetu PRO-Portugés, parseria ida entre Ministériu ne’e no INFORDEPE no Camões, Institutu Kooperasaun no Lian nian.
Projetu ida-ne’e atu kontribui ba konsolidasaun husi sistema edukativu Timor-Leste nian, liuhusi apoiu ba setór formasaun profisionál no kontínua husi pesoál dosente ba sistema edukativu ensinu nian la’ós superiór.
Programa ida-ne’e atu substitui programa Formar+, ne’ebé remata iha loron 31 fulan-dezembru tinan 2018 no sei ezekuta entre tinan 2019 no tinan 2022.
Liuhosi Projetu PRO-Portugés nian ne’e, ho realizasaun oras 520 formasaun nian ba profesór sira maizumenus 4 300 tinan-tinan, karik bele, ba prazu tinan tolu nian, ne’ebé profesór hotu-hotu hosi sistema edukativu nasionál nian bele atinje nivel B2 ho kapasidade linguístika iha lian portugeza to’o finál tinan 2022 nian.
Konsellu Ministrus asiste mós aprezentasaun hosi Ministru Defeza, Filomeno da Paixão de Jesus no aprezentasaun hosi reprezentante sira hosi empreza Damen Shipyards no Pan Union Corporation kona-ba proposta sira ba akizisaun ró patrulla marítima no ekipamentu sira seluk ró nian, ho objetivu atu garante patrullamentu ida-ne’ebé efetivu ba área kosteira nasionál nian sira no hatán ba situasaun sira emerjénsia no dezastre nian.
Ministra Finansas iha ezersísiu, Sara Lobo Brites, aprezenta proposta Dekretu-Lei, ne’ebé aprova ona hosi Konsellu Ministrus, kona-ba alterasaun dahuluk ba estrutura orgánika Autoridade Aduaneira nian.
Objetivu husi alterasaun ida-ne’e, atu halo ajustamentu balu ne’ebé permite ba administrasaun atubele hatán ho forma ne’ebé transparente liu ba dezafiu sira ne’ebé maka hasoru loroloron, tanba kompleksidade atribuisaun sira ne’ebé dezempeña hosi Autoridade Aduaneira.
Atu nune’e, halo alterasaun estrutura no atribuisaun nian sira husi servisu sentrál balu Autoridade Aduaneira nian, haree ba ninia reestruturasaun no reformulasaun husi ninia atribuisaun no kompeténsia sira atu bele hatán di’ak liután ba nesesidade sira no garante prestasaun servisu ba sidadaun sira ho forma efikás no efisiente.
Diploma daudaun ne’e akresenta ba estrutura Autoridade Aduaneira nian servisu sira planeamentu no finansas, lojístika no jestaun patrimóniu nian no manutensaun, administrasaun no rekursus umanus, nune’e mós unidade rekursu nian. Altera mós dezignasaun dirijente másimu Autoridade Aduaneira nian, ne’ebé ba oin sei hanaran Komisáriu.
Ministra Finansas iha Ezersísiu aprezenta ona proposta Dekretu-Lei, ne’ebé aprova husi Konsellu Ministrus, kona-ba alterasaun dahuluk ba estrutura orgánika Autoridade Tributária nian.
Liuhosi diploma ida-ne’e, halo alterasaun ba estrutura no atribuisaun husi servisu sentrál Autoridade Tributária nian sira, husi servisu sira deklarasaun no likidasaun, jestaun anti fraude, devolusaun no reembolsu impostu kona-ba valór akresentadu, jestaun aprovizionamentu no kontratu sira, sistema informasaun no rejistu kontribuinte sira nian, relasaun internasionál tributária, komunikasaun no relasoins públikas no kontratante no sub-kontratante inspesaun tributária petrolífera no inspesaun tributária minerál nian.
Ministru Petróleu no Mina-rai en ezersísiu, Agio Pereira, aprezenta ona proposta Rezolusaun Governu nian kona-ba nomeasaun despaxante ofisiál ba atividade sira importasaun no esportasaun iha kampu Bayu-Undan nian.
Haree katak ho asinatura Tratadu Tasi Timor nian, nu’udar projetu ida ne’ebé sei tranzita husi Área Konjunta Dezenvolvimentu Petrolíferu daudaun ne’e ba jurisdisaun eskluziva Timor-Leste nian, maka projetu Bayu-Undan, Rezolusaun Governu nian ida-ne’e ho objetivu hodi mantein empreza Altus Oil & Gas Services hanesan despaxante ofisiál, hodi hamenus perturbasaun ba iha operasaun ne’ebé hala’o hela, konforme ezije husi obrigasaun internasionál nian sira ne’ebé asume husi Estadu Timor-Leste bazeia ba Tratadu nian.
Proposta ne’e sei kontinua analiza no sujeita ba aprovasaun hafoin Sorumutuk Konsellu Ministrus nian.
Konsellu Ministru deside ona toleránsia pontu durante períodu loraik nian, hahú husi loron 26 to’o 29 fulan-agostu, ba okaziaun selebrasaun aniversáriu daruanuluk Konsulta Populár no misaun INTERFET nian, nune’e funsionáriu no ajente ministériu no servisu dependente hotu-hotu, institutu no organizmu integradu sira iha administrasaun indireta Estadu nian, atu bele partisipa másimu iha atividade komemorativa sira. HOTU - 16 agostu 2019Toleránsia Pontu ba Komemorasaun Loron FALINTILPrezidénsia Konsellu Ministrushare tan
VIII Governu Konstitusionál
...........................................................................................................................
Komunikadu Imprensa
Toleránsia Pontu ba Komemorasaun Loron FALINTIL
Governu deside fó toleránsia pontu iha loron 20 fulan-agostu tinan 2019 ba funsionáriu no ajente sira hotu husi ministériu no serbisu hotu-hotu ne’ebé dependente ba ministériu sira-ne’e, nune’e mós instituisaun no organizmu sira ne’ebé integra iha administrasaun indireta Estadu nian.
Desizaun ida-ne’e ninia baze maka Lei n. 10/2005, loron 10 fulan-agostu, ne’ebé estabelese loron sira ne’ebé sai nu’udar feriadu nasionál, data ofisiál komemorativa sira no toleránsia pontu.
Kona-ba data ofisiál komemorativa sira ne’ebé prevee iha artigu da-5, n.3 prevee data hirak ne’ebé bele sai nu’udar objetu ba toleránsia pontu.
Entre data ofisiál komemorativa sira ne’e, lei estabelese loron 20 fulan-agostu hanesan loron ofisiál komemorativa ba Loron Forsa Armada Libertasaun Nasionál Timor-Leste (FALINTIL) nian, ne’ebé tinan ida-ne’e komemora ba aniversáriu da-44. REMATA - 14 agostu 2019Sorumutu Konsellu Ministrus iha Loron 14 fulan- agostu tinan 2019Prezidénsia Konsellu Ministrushare tan
VIII Governu Konstitusionál
...........................................................................................................................
Komunikadu Imprensa
Sorumutu Konsellu Ministrus iha Loron 14 fulan- agostu tinan 2019
Konsellu Ministrus hala’o sorumutuk iha Palásiu Governu, iha Dili no asiste ona aprezentasaun husi Ministru Obras Públikas, Salvador Soares dos Reis Pires, no espesialista sira enerjia nian husi Banku Mundiál, relasiona ho estudu kona-ba interkonesaun rejionál husi sistema sira enerjia elétrika nian entre Timor-Leste no Indonézia.
Estudu aprezenta mós rekomendasaun sira hodi troka fonte enerjétika ne’ebé utiliza iha sentrál elétrika sira, husi gazóleu ba fali mina kombustivel pezadu ka gás naturál likifeitu (GNL), ne’ebé bele hamenus kustu to’o 30% kada tinan. GNL, aleinde hamenus kustu, sai mós nu’udar fonte enerjia nian ne’ebé ladún kria poluisaun no efisiente liu.
Estudu ne’e aprezenta vantajen sira husi interkonesaun rejionál husi sistema sira enerjia elétrika nian, ho posibilidade ba Timor-Leste atubele komersializa eletrisidade ho Indonézia, bainhira esporta ninia enerjia ne’ebé resin ba Timor Osidentál ne’ebé ninia kapasidade elétrika la sufisiente. Konsellu Ministrus fó podér tomak ba Ministru Obras Públikas hodi realiza estudu viabilidade kona-ba projetu ne’e no hodi hahú negosiasaun ho entidade relevante sira husi Governu Indonézia nian ba interkonesaun rejionál ne’e. REMATA
