Komunikadus
27 setembru 2019Sorumutuk Estraordinária Konsellu Ministrus nian iha loron 27 fulan-setembru tinan 2019Analisa ona:hare tan
1 - Rezolusaun Governu nian kona-ba autorizasaun atu loke konkursu públiku sira ba selebrasaun kontratu petrolíferu
2 - Aprezentasaun kona-ba moras ne’ebé provoka fahi atus ba atus mate iha territóriu nasionál
Aprova ona
1 - Dekretu Governu ne’ebé regulamenta prosedimentu kona-ba afetasaun área sira iha territóriu Timor-Leste nian ba atividade sira peskiza no produsaun petrolífera nian.
27 setembru 2019Moras fahi (African Swine Fever) iha Timor-LestePrezidénsia Konsellu Ministrushare tan
VIII Governu Konstitusionál
...........................................................................................................................
Komunikadu Imprensa
Loron 27, Fulan-Setembru, Tinan 2019
Moras fahi (African Swine Fever) iha Timor-Leste
Hahú kedas husi inísiu fulan-setembru tinan 2019, rejista kazu fahi moras (African Swine Fever - ASF) no halo fahi barak mate iha Timor-Leste. Iha Díli laran, kazu hirak-ne'e barak tebtebes maka relata direta husi fahi-na’in sira. Atu identifika kauza husi moras ne’e, Ministériu Agrikultura no Peskas (MAP) rekolla amostra husi animál ne’ebé moras no haruka ona ba Austrália hodi halo teste. Husi amostra hirak ne’ebé maka haruka ba laboratóriu Austrália nian hodi halo teste, rezultadu hirak ne’e konfirma katak, moras ASF tama ona iha Timor -Leste no iha fahi 41% mak hatudu ona pozitivu sofre moras ASF ne’e.
To’o loron 19 fulan-setembru 2019, MAP rejista ona fahi hamutuk 400 ne’ebé mak mate ona iha Díli no 400 seluk ne’ebé mak hetan ona moras ASF ne’e.
lstorikamente Timor-Leste livre husi moras ASF. Atu garante ba ida ne’e, iha ona Dekretu Lei n. 21/2003, kona-ba rejime Kuarentena, iha artigu ninia da-56, define katak bandu importasaun ba fahi no produtu fahi husi nasaun sira ne’ebé afetadu ho moras African Swine Fever.
Bainhira moras ne’e hahú belar daudaun iha rejiaun Ázia nian, MAP mós hala’o semináriu ida kona-ba moras ne’e, iha loron 13 fulan-jullu 2019, hanesan medida preventiva. Objetivu husi semináriu ne’e mak atu halo diskusaun téknika ida entre MAP no servisu públiku sira seluk ne’ebé relevante, mak hanesan Alfándega, AEFAESA, PNTL, UNTL ka SERVE hodi esplora posibilidade atu haforsa no kontrola Timor-Leste ninia bioseguransa, kona-ba moras animál nian ne’e.
African Swine Fever (ASF) ne’e nu’udar moras ba fahi ida ne’ebé da’et lais tebes, ne’ebé maihusi Áfrika. Moras ASF maski ezisti kleur ona iha mundu maibé to’o ohin loron seidauk iha ai-moruk atu kura ka vasina atubele prevene moras ne’e. Moras ASF daudaun ne'e akontese ona iha nasaun barak iha Ázia. To’o fulan-setembru 2019, nasaun iha Ázia ne'ebé afetadu ona mak hanesan Xina, Vietname, Kamboja, Filipina, Laos, Myanmar, Koreia-do-Norte, no Mongólia (dadus husi FAO, tinan 2019). lha Timor-Leste, iha fahi 400,000 maka hetan risku ona husi moras ASF no iha umakain 70% liu ne’ebé mak depende ba hakiak fahi hodi sustenta sira-nia moris.
Relasiona ho saúde públika, MAP hakarak esklarese katak moras ASF la’ós moras zoonótiku, signifika katak moras ida-ne'e la fó impaktu ba ema nia saúde.
Asaun imediata ne’ebé oras ne'e ita halo daudaun maka ita tenke haforsa serbisu iha postu tránzitu animál ho kolaborasaun husi autoridade seguransa atubele suspende movimentu fahi husi Díli ba munisípiu sira seluk.
MAP sei iha kolaborasaun di’ak ho governu Austrália hodi foti medidas hanesan teste amostra sira hodi bele hetan diagnóstiku definitivu ba moras ASF. Nune’e mós sei halo kolaborasaun ho OIE (Organizasaun Mundiál Saúde Animál) hodi prodús matéria ba sosializasaun moras refere. Remata
26 setembru 2019Votu Pezar ba Padre João de Deus Pires nia matePrezidénsia Konsellu Ministrushare tan
VIII Governu Konstitusionál
...........................................................................................................................
Komunikadu Imprensa
Loron 25, Fulan-Setembru, Tinan 2019
Voto Pezar ba Falesimentu husi Amo João de Deus Pires
Ho laran-triste no laran-dodok tebes maka Governu Repúblika Demokrátika Timor-Leste simu notísia kona-ba Padre João de Deus Pires nia mate, misionáriu salezianu ne’ebé hakotu iis iha loron 22 fulan-setembru foin daudaun ne’e iha Ospitál Nasionál Guido Valadares, iha Dili.
Padre João de Deus moris iha Morais, Macedo de Cavaleiros, Portugál, simu ordenasaun hanesan amu-lulik iha tinan 1956, no mai iha Timor-Leste iha tinan 1957.
Hahú kedas husi tinan 1957 to’o agora, nia nafatin iha rai ne’e no iha ne’e nia dezenvolve atividade edukativa no misionária barak no oioin, hodi hakat liu difikuldade saida de’it no hodi suporta kontrariedade lubun boot durante períodu okupasaun Indonézia nian.
Ninia papél iha tempu okupasaun Indonézia nian sei hela-metin iha Istória Timor-Leste nian. Iha tempu ne’ebé baze apoiu rahun, Padre João de Deus halo esforsu tomak atu tulun populasaun hirak ne’ebé mak inimigu kaer no rende, ne’ebé enfrenta, iha tinan 1979 no 1980, iha situasaun aat liu, hamlaha no moras.
Hafoin reorganizasaun luta nian, iha fulan-marsu tinan 1981, bainhira polítika foun ho tema “Unidade Nasionál” halo neon nakloke no tulun klarifika konseitu foun no ideál nasionalista sira, Padre João de Deus halo buat hotu, ne’ebé inklui mós hetan ameasa husi indonéziu sira, atu mantein ligasaun ne’ebé besik entre ai-laran (Diresaun Boot Luta nian) no Dili, liuhusi dalan ida-ne’ebé bele haruka karta ba rai-li’ur.
Padre João de Deus sai hanesan ezemplu kona-ba trata estafeta sira, iha tempu ne’ebé hanaran “kaixa”, hodi hanorin sira kona-ba abnegasaun, espíritu sakrifísiu no responsabilidade nian.
Ema sira ne’ebé mai husi rede klandestina nunka bele haluha espíritu altruísta husi misionáriu no lutadór boot ba liberdade povu timoroan nian ida-ne’e, ba ida-ne’ebé kompromete an ona atu serbí, hanesan Padre, hanesan ema portugés no hanesan umanista.
Iha tinan hirak ikus iha nia moris, nia fó importánsia maka’as liu kona-ba halibur ema mukit sira, hodi fó ba sira uma, asisténsia sosiál no hahán, domin, edukasaun, no mós dezenvolve formasaun intelektuál iha ambiente saudavel, hodi permite foin-sa’e sira kontinua estudu iha nivel superiór no prepara sira ba moris ativa.
Tanba ninia dedikasaun boot ne’e, nia simu respeitu, admirasaun no mós venerasaun husi povu timoroan, hodi kontribui ho forma notavel ba nia evanjelizasaun no ba konsolidasaun prezensa saleziana nian iha Timor.
Iha fulan-maiu tinan 2012, amu-lulik ne’e simu kondekorasaun hosi Prezidente Repúblika, ho Medalla Orden Dom Martinho Lopes, tanba ninia apoiu ba rezisténsia Timor-Leste nian no kontributu relevante ba luta ukun rasik-an nian.
Iha momentu ne’ebé triste tebetebes ba relijiozu no povu timoroan nian ida-ne’e, Governu Repúblika Demokrátika Timor-Leste hato’o ninia laran-triste ba família estimadu Padre João de Deus nian, ba Igreja Katólika no ba família saleziana Timor-Leste nian. REMATA
25 setembru 2019Sorumutu Konsellu Ministrus iha Loron 25 fulan-setembru tinan 2019Analiza ona:hare tan
1.Aprezentasaun kona-ba prioridade sira atu harii infraestruturas Ministériu Interiór nian
2.Aprezentasaun kona-ba Komunikasaun Nasionál Daruak Timor-Leste nian iha ámbitu Konvensaun husi Nasoins Unidas kona-ba Alterasaun Klimátika
3.Rezolusaun Governu nian kona-ba autorizasaun atu loke konkursu públiku sira ba selebrasaun kontratu petrolíferu sira
Aprova ona:
1.Votu pezar ida ba Padre João de Deus Pires ne’ebé mate
2.Deliberasaun kona-ba integrasaun militár sira F-FDTL nian iha kontinjente Forsas Armadas Portugál ne’ebé atu haruka ba Repúblika Sentru-Afrikana
3.Rezolusaun Governu nian atu halo negosiasaun kona-ba adezaun Timor-Leste nian ba Organizasaun Mundiál Komérsiu
4.fó podér tomak ba Ministra Edukasaun Juventude no Desportu atu asina akordu kooperasaun nian ida ho UNESCO, ba projetu ida kona-ba fortalesimentu siénsia no matemátika iha ensinu báziku iha Timor-Leste
Deliberasaun nian ida kona-ba fornesimentu kombustivel kmaan ba Empreza Eletrisidade Timor-Leste (EDTL), ba tinan 2019 no tinan 2020- 19 setembru 2019Partisipasaun husi Timor-Leste iha Asembleia Jeral Nasoins Unidas nianhare tan
Prezidénsia Konsellu Ministrus
VIII Governu Konstitusionál
...........................................................................................................................
Komunikadu Imprensa
Díli, Loron 19, Fulan-Setembru, Tinan 2019
Partisipasaun husi Timor-Leste iha Asembleia Jeral Nasoins Unidas nian
Iha loron 27 fulan-setembru tinan 2002, Repúblika Demokrátika Timor-Leste, liuhusi votasaun ho unanimidade, sai nu’udar membru Nasoins Unidas nian da-191. Dezde tempu ne’ebá Estadu tenke iha reprezentasaun iha Asembleia Jerál Nasoins Unidas nian, ne’ebé maka hala’o tinan-tinan iha sede iha Novaiorke.
Iha ámbitu ida-ne’e, Ministru Negósius Estranjeirus no Kooperasaun Repúblika Demokrátika Timor-Leste nian, Dionísio Babo Soares, Ph.D., dezloka ohin, loron 19 fulan-setembru, ba Novaiorke, atu partisipa iha sesaun Asembleia Jerál Nasoins Unidas nian da-74, husi loron 23 to’o loron 30 fulan-setembru.
Iha okaziaun Asembleia Jerál nian ne’e, sei hala’o mós sorumutuk ketak balun ho karakter multilaterál, trilaterál no bilaterál, ne’ebé maka sei lidera husi xefe diplomasia timoroan ne’e.
Ajenda ne’ebé prevee ba realizasaun enkontru Nivel Aas Asembleia Jerál Nasoins Unidas nian sei foka ba (1) Simeira kona-ba Alterasaun Klimátika, ne’ebé Sekretáriu-Jerál Nasoins Unidas nian, António Guterres, maka konvoka; (2) Programa Asesu Universál ba Saúde; (3) Forum Polítiku Nivel Aas Nasoins Unidas nian kona-ba Dezenvolvimentu Sustentavel (HLPF- sigla iha lian inglés); no (4) diálogu nivel aas kona-ba finansiamentu ba dezenvolvimentu (FfD-sigla iha lian inglés), nune’e mós sorumutuk nivel aas ida kona-ba halakon arma nukleár sira.
Xefe diplomasia nian ne’e sei partisipa mós iha sorumutuk nivel aas atu analiza progresu sira ne’ebé halo ona iha abordajen prioridade husi Estadu insulár ki’ik sira ne’ebé iha hela faze dezenvolvimentu nian (SIDS, sigla iha lian inglés) liuhusi aplikasaun via husi programa ida kona-ba asaun antesipada SAMOA Pathway iha nivel nasionál no rejionál, iha ne’ebé sei rezulta “deklarasaun polítika rezumida, orientada husi asaun no sei hetan akordu intergovernamentál”.
Tuir ajenda ne’e, Ministru Negósius Estranjeirus no Kooperasaun, Dionísio Babo Soares, sei halo ninia intervensaun iha sesaun plenária husi debate jerál iha ne’ebé sei marka prezensa Xefe Estadu no Governu sira, ne’ebé lidera husi Prezidente Asembleia Jerál Nasoins Unidas nian, S.E. Tijani Mohamad Bande.
Xefe Diplomasia Timor-Leste nian sei partisipa mós iha enkontru nivel ministeriál, iha ámbitu organizasaun g7+, grupu G77 no Xina, Movimentu País La Aliñadu sira (NAM, sigla iha lia-inglés), Komunidade País Lian Portugés sira (CPLP) no ho grupu husi “País sira Ladún Avansadu” (LDC’s iha sigla lia-inglés).
Hatán ba konvite husi Ministru omólogu Repúblika Kénia nian, Xefe Diplomasia Timor-Leste nian sei partisipa hanesan oradór iha eventu Nivel Aas “Side Event” ho nia tema “Pás no Tranzisaun Polítika”.
Iha enkontru bilaterál ne’ebé prevee ona iha ajenda, inklui sorumutuk ho reprezentante sira, husi (1) Repúblika Irlanda, (2) Repúblika Demokrátika Jeórjia, (3) Repúblika Kosovo, (4) Repúblika Malta, (5) Estadus Unidus Amérika, (6) Frente Polizariu, liuhusi Instituisaun Repúblika Árabe Saaraui Demokrátika.
Iha nivel trilaterál nian, prevee mós enkontru hamutuk ida entre reprezentante sira Repúblika Indonézia ho Commonwealth Austrália nian.
Atu kumpre estratéjia polítika esterna Timor-Leste nian “halo belun barak no zero inimigu’, sei kria estabelesimentu relasaun diplomátika foun ho país barak, ne’ebé maka sei konsidera iha forma “komunikadu konjuntu”.
Atividade sira nivel aas ne’ebé prevee iha ámbitu Asembleia Jerál Nasoins Unidas nian da-74 sei remata iha loron 30 fulan-setembru tinan 2019, no, tuir planu, hafoin partisipa iha Asembleia Jerál ONU nian, xefe diplomasia Timor-Leste nian sei dezloka ba Repúblika Kuba, hodi hatán fali ba vizita ofisiál husi Repúblika Kuba nian mai iha Timor-Leste, iha tinan kotuk. REMATA - 17 setembru 2019Toleránsia ponto iha loron 20 Fulan-Setembru tinan 2019 ba Selebrasaun aniversáriu INTERFET tama mai Timor-Leste ba Dala-20Prezidénsia Konsellu Ministrushare tan
VIII Governu Konstitusionál
...........................................................................................................................
Komunikadu Imprensa
Toleránsia ponto iha loron 20 Fulan-Setembru tinan 2019 ba Selebrasaun aniversáriu INTERFET tama mai Timor-Leste ba Dala-20
Konsidera INTERFET tama mai Timor-Leste konstitui akontesimentu nasionál ne’ebe boot no importante iha istória Povu Timoroan nian no iha tinan ida-ne’e mós hanesan aniversáriu ba dala-20 INTERFET tama mai Timor-Leste
Hodi konsidera katak atu komemorasaun ne’e bele la’o ho diak, Governu sei realiza serimónia ofisiál ne’ebé mak sei partisipa hosi altu dignitáriu internasionál oioin no Governu mós sei favorese partisipasaun hosi sidadaun sira hotu iha serimónia refere, no sei sai hanesan reflesaun a’as no signifikadu iha istoria hosi akontesimentu ne’ebé boot.
Nune’e, haktuir saida maka hatuur ona iha alinea b) hosi n.º 2, n.º 4 no hosi alínea d) hosi n.º 6, hotu, artigu 7.º hosi Lei n.º 10/2005, loron-10 fulan agostu, altera hosi Lei n.º 3/2016, loron-25 fulan maiu, kona-ba feriadu ofisiál sira no data komemorativa ofisiál, Primeiru-Ministru desidi fó toleránsia pontu ba funsionáriu hotu-hotu no ajente Ministériu sira ka servisu ne’ebé dependente ba, nomós ba institutu sira no organizmu integradu iha administrasaun indireta Estadu nian, iha loron-20 fulan setembru tinan 2019. 
17 setembru 2019Konstrusaun ba Porto TibarPrezidénsia Konsellu Ministrushare tan
VIII Governu Konstitusionál
...........................................................................................................................
Komunikadu Imprensa
Konstrusaun ba Porto Tibar
Membru Governu sira ne’ebé nuudar responsável ba Projetu Portu Tibar maka Ministru Planeamentu no Investimentu Estratéjiku iha ezersísiu, Ministra Finansas iha ezersísiu, Ministru Obras Públikas no Ministru Transportes no Komunikasoins, preokupadu tanba hanoin hela impaktu sá de’it maka bele mosu ba konstrusaun Porto Tibar tanba suspensaun servisu esplorasaun ba pedreira hosi China Harbour Timor, Lda, tan ne’e, membru Governu sira ne’e reuni tiha informasaun kona-ba medida kautelár ne’ebé Tribunal Distrital Díli dekreta ona kona-ba oinsá parsela-rai nebe hola parte ba pedreira.
Projetu ida-ne’e nuudar interese públiku, ne’ebé hakerek iha Planu Nasionál Dezenvolvimentu Estratéjiku Timor-Leste nian ba 2011-2030, ne’ebé maka Governu Konstitusionál hotu-hotu iha pasadu no agora sempre apoia no promove.
Hafoin halo tiha análize ba prosesu, haree hetan katak tribunal dekreta medida kautelár ba parsela rai ne’ebé sala. Atu dehan katak, tribunal husu atu halo restituisaun provizória ba posse kona-ba parsela rai ida no tribunal haruka ezekuta medida ba parsela rai ida seluk fali no ida ne’e, hamosu konfuzaun no halo ema hotu hakfodak, inklui mós Governu.
Tuir prosesu Tribunal, rekerimentu koa’lia kona-ba parsela rai ida ne’ebé lokalisa dook ho distánsia liu km 1 (ida) hosi parsela rai ne’ebé nuudar objetu ezekusaun tribunal nian. Erru ida-ne’e taka dalan assesu ba servisu pedreira no ida-ne’e impede kontinuasaun servisu pedreira, ho risku sériu ba konstrusaun Porto Tibar tanba sei la hetan fornesimentu materiál atu halo konstrusaun nesesáriu.
Tuir informasaun hosi Diresaun Nasionál Terras no Propriedades no Servisu Kadastrál katakparsela rai ne’ebé ezekuta sala maka parsela rai ne’ebé daudauk ne’e nia propriedade iha hela disputa ho Estadu rasik no Ministériu Justisa analisa hela parsela rai ne’e.
Haree ba faktu hirak-ne’e, Governu desidi foti asaun reprezenta Estadu no defende interese públiku, hodi alerta ba Tribunal tan erru ne’ebé Tribunal komete ona nune’e Tribunal para revé filafali medida ne’e no dekreta hodi anula no ordena atu sobu saida de’it maka taka hela dalan ka meiu saida de’it maka halo atu la bele hetan asesu ba pedreira.
China Harbour Timor, Lda, nuudar subkontratada konsensionáriu ba Porto Tibar nian, utiliza rai ba pedreira ho koñesimentu, autorizasaun no perfeita kolaborasaun ho entidade kompetente hotuhotu inklui komunidade lokál, Xefe Aldeia Mota Ikun, Administrador Postu Administrativu Bazartete, Administrador hosi Munisípiu Likisá, Komandante PNTL Likisá, Diresaun Nasionál Terras no Propriedades no Servisu Kadastrál Likisá, Autoridade Nasional Petróleu no Minerais (responsável ba lisensiamentu pedreira), Unidade Jestaun ba Projetu ba Porto Tibar (responsável ba ezekusaun Projetu ba Porto Tibar) no mós, membru Governu sira ne’ebé nuudar responsável ba ezekusaun projetu ba Porto Tibar no Sekretáriu Estadu Terras no Propriedades no Ministériu Justisa rasik.
Hamutuk ho esklaresimentu nebe halo ona ba tribunal, Governu sei foti medida nesesáriu atu salvaguarda interese públiku nian ba konstrusaun Porto Tibar. Remata
- 12 setembru 2019Sorumutu Extraordinária Konsellu Ministrus iha Loron 12 fulan-setembru tinan 2019Prezidénsia Konsellu Ministrushare tan
VIII Governu Konstitusionál
...........................................................................................................................
Komunikadu Imprensa
Sorumutu Extraordinária Konsellu Ministrus iha Loron 12 fulan-setembru tinan 2019
Konsellu Ministru halao’o sorumutu iha Palásiu Governu, iha Díli no aprova Votu Pezár ba falesimentu Eis-Prezidente Repúblika Indonézia, Bacharuddin Jusuf Habibie.
Iha Nota Pezár ne’ebé aprova husi Konsellu Ministru, Governu Repúblika Demokrátika Timor-Leste manifesta pezár ne’ebé bo’ot wainhira simu notísia falesimentu husi B.J. Habibie. No ho momentu ida ne’e konsternasaun bo’ot tebes ba Povu Repúblika Indonézia, ho nune’e Governu Repúblika Demokrátika Timor-Leste aprezenta mós sentidu kondolénsias ba família husi Eis-Prezidente Repúblika Indonézia, Bacharuddin Jusuf Habibie, no sei hamutuk ho familia ne’ebé lakon.
B. J. Habibie hanesan Prezidente Repúblika Indonézia ba da-tolu nian, hahu iha mandatu loron 21 fulan-maiu tinan 1998 no remata iha loron 20 fulan-outubru tinan 1999.
Ninia kapasidade diplomátika halo nia sai parte fundamental ida iha Timor-Leste nia istoria, bainhira nia haruka nia pedidu ba Sekretáriu-Jerál Nasoins Unidas, Kofi Annan, iha loron-27 fulan-janeiru tinan 1999, hodi nune’e loke dalan ba Timor-Leste realiza referendu. Liuhusi referendu mak povu Timor-Leste ezerse nia direitu ba nia autodeterminasaun no ema barak liu mak desidi independénsia ba Timor-Leste iha tinan 1999.
Votu Pezár ne’e sei entrega husi Kay Rala Xanana Gusmão nu’udar Eis Prezidente Repúblika Demokrátika Timor-Leste ba B.J. Habibie nia família. REMATA
