Komunikadus
15 jullu 2009Soru-mutu Konsellu Ministru iha loron 15 fulan Jullu tinan 2009IV GOVERNU KOSTITUSIONALhare tan
SEKRETARIA ESTADO KONSELLU MINISTRUS
KOMUNIKADU BÁ IMPRENSA
Sorumutuk Konsellu Ministrus iha loron 15 fulan Jullu tinan 2009
Konsellu Ministrus hala’o sorumutuk iha Kuarta-feira ida ne’e, loron 15 fulan Jullu tinan 2009, iha Sala Sorumutuk Konsellu Ministrus nian, iha Palásiu Governu iha Dili, no aprova:
1. Rezolusaun ne’ebé aprova Kriasaun ba Komisaun Interministeriál ba akompañament u iha projetu infraestrutura Estadu nian.
Konsellu Ministrus aprova Komisaun Interministeriál ba Akompañamentu ba Projetu infraestrutura Estadu nian, ne’ebé halo parte husi membru Governu nian hotu-hotu ho projetu infra-estrutura ne’ebé hala’o hela no sei funsiona ho koordenasaun husi Vise-Primeiru-Ministru ba Asuntu jestaun Administrasaun Estadu nian. Komisaun ida ne’e atu halo akompañamentu ba ezekusaun servisu hirak ne’ebé iha ligasaun ba projetu fíziku hirak ne’ebé atu hala’o no hetan apoiu husi Gabinete Apoiu Tékniku nian ida. Gabineti Apoiu Tékniku mak iha kompeténsia atu organiza no hala’o kna’ar sekretariadu nian ba sorumutuk Komisaun Interministeriál, kria no mantein atualizadu baze dedadus ida kona-ba projetu fíziku hotu-hotu ne’ebé hala’o hela no aprezenta rekomendasaun sira kona-ba prosesu ezekusaun husi projetus (ho hanoin ida atu substitui, hadi’a ka aselera prosedimentu hirak ne’ebé mak vigora hela)
2. Rezolusaun ne’ebé aprova Kriasaun ba Komisaun Interministeriál ba Dezenvolvimentu Rurál
Komisaun Interministeriál ba Dezenvolvimentu Rurál (CIDR), ne’ebé ohin hetan aprovasaun, ho objetivu atu koordena programa hirak ba dezenvolvimentu rurál nian. Nia kompeténsia atu define área hirak ne’ebé sai nu’udar prioridade iha dezenvolvimentu rurál, asegura koordenasaun interministeriál ida ne’ebé di’ak iha definisaun, implementasun no ezekusaun husi projetu hirak, atu koordena no asegura ho parseiru sira ba dezenvovimentu. Halo parte iha Komisaun ne’e, Vise-Primeiru-Ministru ba Asuntu Jestaun Administrasaun Estadu nian hanesan (koordenadór), husi Ministra Finansas, Ministru Saúde, Ministru Edukasaun, Ministru Adminstrasaun Estatál i Ordenamentu Teritóriu, Ministru Ekonomia i Dezenvolvimentu hanesan (vise- koordenadór) Ministru Infra-Estrutura, Ministru Agrikultura i Peska no hetan apoiu husi Gabinete ba Apoiu Tékniku ida. Gabinete ida ne’e, sei partisipa husi Ministériu Ekonomia i Dezenvolvimentu (Sekretaria Estadu ba Dezenvolvimentu Rurál) Ministériu Infra-Estrutura no Ministériu Agrikultura i Peska, sei hetan funsaun atu fó apoiu ba CIDR iha koordenasaun ba programa, implementa ninia desizaun, dezenvolve diálogu entre VPM, Ministériu hirak ne’ebé relevante no parseiru dezenvolvimentu sira no iha tempu ne’ebé hanesan sei apoia kriasaun ba baze dedadus ida.
3. Rezolusaun ne’ebé aprova Akordu Jerál ba Kooperasaun Ekonómika, Komersiál, Téknika, Sientífika i Kulturál entre Repúblika Angola no Repúblika Demokrátika Timor-Leste no nia respetivu Protokolu Komplementár kona-ba Kriasaun ba Komisaujn Bilaterál ida.
Akordu ida ne’e atu halo metin liután lasu amizade no kooperasaun nian entre Repúblika rua ne’e no haree ba kreximentu ekonómiku no dezenvolvimentu husi Estadu rua ne’e. Bainhira konsulta entre Parte hirak ne’e favorese dezenvolvimentu ba relasaun bilaterál no kooperasaun kona-ba asuntu internasionál, tuir prinsípiu husi Karta Nasoens Unidas nian no norma hirak ne’ebé aseita iha mundu tomak kona-ba Direitu Internasionál, mak obriga atu harii Komisaun Bilaterál ida iha nível diplomátiku.
4. Rezolusaun ne’ebé aprova Proposta ba Planu Estratéjiku husi CPLP ba Repúblika Demokrátika Timor-Leste
Haree ba importánsia atu hakle’an lasu kooperasaun nian ho paíz luzófonu sira ne’ebé inklui iha Komunidade Paíz sira ho Lian Portugés (CPLP) no interese Governu nian atu hadi’a promosaun, difuzaun no utilizasaun lian portugés, kapasitasaun téknika ba instituisaun públika sira, ho apoiu husi CPLP no ninia Estadu-Membru sira, membru sira husi Konsellu Ministru nian aprova Proposta ba Planu Estratéjiku CPLP nian ida ne’e.
5. Dekretu Governu nian ne’ebé fiksa Valór husi Variável ba kálkulu ba Vensimentu PNTL nian.
Governu fiksa ona ba Dólar ida valór Variável, ne’ebé prevee iha artigu 7o husi Dekretu Lei no 10/2009 loron 18 fulan Fevereiru, ba efeitu hirak kona-ba kálkulu ba renumerasaun baze husi Ajente no Ofisiál Polísia Nasionál Timor-Leste nian.
6. Dekretu Governu nian ne’ebé fiksa Valór Mensál ba Subsídiu Alimentasaun ba PNTL
Dolar Amérika 20 mak hanesan valór mensál ne’ebé Konsellu Ministrus aprova nu’udar subsídiu alimentasaun nian ba PNTL.
Konsellu Ministrus analiza ona mós:
1. Aprezentasaun ne’ebé aprova Polítika ba Enerjia Rurál
Membru Konsellu Ministrus nian sira iha oportunidade hodi rona, husi parte Sekretaria Estadu ba Polítika Enerjétika, aprezentasaun kona-ba planu ba Polítika Enerjia rurál ne’ebé halo parte husi Polítika Enerjétika Nasionál. Ninia intensaun mak atu hamenus dependénsia enerjétika, hodi hamenus importasaun hirak ne’ebé tama nafatin mai rai laran, tanba ne’e presiza utiliza fonte enerjia alternativa no renovável hirak ne’ebé barak tebes iha país nia laran. Ho nune’e, iha zona oioin paíz ne’e nian ne’ebé enerjia sai hanesan rekursu ida ne’ebé kuaze la iha, sei bele haree iha polítika ida ne’e melloria ba kondisaun vida nian no kriasaun ba oportunidade foun iha nível husi atividade produtiva no servisu sosiál hirak ne’ebé iha área saúde no eduksasaun. Iha sorumutuk ohin loron nian halo aprezentasaun kona-ba sistema Biogás, posibilidade ba produsaun Biogás iha Timor-Leste no benefísiu hirak ne’ebé sistema ne’e sei fó: hamenus tesi ai, kontaminasaun ba bee hemu no insetu sira (tanba konsekuénsia husi moras) produsaun gás hodi te’in no naroman husi gás presaun nian. Enerjia eólika, sai hensan rekursu ida ne’ebé Timor-leste bele aproveita haree ba ninia situasaun Jeográfika no kondisaujn klima nian. Maski investimentu inisiál bele boot, sei bele haree diminuisaun ba poluisaun, bainhira utiliza enerjia renovável, no sei bele uza mós sistema íbridu karik laiha anin ho kapasidade sufisiente ba produsaun ne’e rasik.
2. Aprezentasaun ne’ebe aprova Polítika Nasionál ba Kultura
Ministériu Edukasaun, husi Sekretaria Estadu Kultura, aprezenta Rezolusaun ne’ebé aprova Polítika Nasionál ba Kultura. Polítika ida ne’e prevee prezervasaun no divulgasaun patrimóniu no valór kulturál i artístiku Timor-Leste nian liu husi konjuntu liña asaun ida ne’ebé inklui kriasaun lejislasaun, apoiu iha programa investigasaun, edukasaun i formasaun no harii infra-estrutura atu nune’é, suporta asosiasaun no atividade kulturál nune’é mós iha kolaborasaun ho entidade sira seluk ne’ebé relevante iha área kultura.
27 juñu 2009Deklarasaun Porta-vóz IV Governu Konstitusionál iha 27 Juñu 2009Alegasoens kona-ba korrupsaunhare tan
24 juñu 2009Soru-mutu Konsellu Ministrus loron 24 fulan Juñu tinan 2009GOVERNU KONSTITUSIONÁL IVhare tan
SEKRETARIA ESTADU KONSELLU MINISTRU
KOMUNIKADU IMPRENSA
Soru-mutu Konsellu Ministrus loron 24 fulan Juñu tinan 2009
Konsellu Ministrus halo Soru-mutu iha loron-Koarta ida ne’e, loron 24 fulan Juñu tinan 2009, iha Sala soru-mutu Konsellu Ministrus nian, iha Palásiu Governu, iha Dili, no aprova:
1. Dekretu-Lei ne’ebé altera Rejime Jurídiku Notariado nian
Tinan lima hafoin publikasaun husi Rejime Jurídiku Notariadu nian, no hó hanoin atu armoniza linguajen no termu tékniku sira atu fasilita interpretasaun ba aplikadór lei sira, propoin ona alterasaun balu atu adota medida hirak kona-ba simplifikasaun administrativa no lejitimasaun husi prosedimentu administrativu balun, hanesan introdusaun kona-ba mekanizmu justifikasaun no akizisaun nian husi direitu kona-ba propriedade imovel, no seluk-seluk tan no autorizasaun provizória ba ezersísiu husi atividade notariál husi notáriu sira ne’ebé la’ós timo-roan.
Nune’e, regulamenta intervensaun ba notáriu iha átu hirak ne’ebé sujeita ba restrisaun no proibisaun sira no estabelese kritériu objetivu sira atu evita adosaun ba prosedimentu ne’ebé la hanesan iha repartisaun notariál ida-idak.
Diploma ida ne’e prevé mós, tanba kuadru espesializadu sira iha área rejistu no notariadu nian la to’o, admisaun ba notáriu sira husi país sira ho sistema sivilista ba efeitu hirak kona-ba atividade notariál, no ida ne’e restrita funsaun téknika sira.
Alterasaun hirak ne’e lejitima prátika hirak ne’ebé iha vigór no adekua rejime notariál ba realidade país nian hodi konkretiza objetivu ida husi hirak seluk Governu Konstitusionál IV nian ne’ebé temi kona-ba konsolidasaun ba notariadu no asesu ba justisa.[1]
2. Dekretu-Lei ne’ebé kria Regulamentu Notariál
Rejime Jurídiku Notariadu nian estabelese orientasaun polítika sira ba sistema notariál Timor-leste nian no fó ba Governu responsabilidade atu regulamenta orientasaun polítika hirak ne’ebé define iha diploma legál ida ne’e. Hó dalan ida ne’e, diploma ne’e regulamenta Rejime Jurídika Notariadu nian liuliu livru notariál nian sira, ninia eskriturasaun, guarda no arkivu, ata notariál sira no emisaun ba kópia, atestadu no sertifikadu sira.
Importante mós atu hatete katak, Dekretu-Lei ne’e elabora ho baze iha sistema jurídiku ne’ebé pretende duni ba país hanesan iha lei hirak ne’ebé iha ona vigór no ne’ebé temi kona-ba Kódigu Prosesu Sivíl, husi Sosiedae Komersiál no Rejistu Komersiál, Rejime Jurídiku husi ema Koletiva sira sein fin lukrativu no Projetu kódigu Sivíl.
Hó Lei ida ne’e pretende utiliza meiu informátiku sira nu’udar forma simplifikasaun administrativa ne’ebé temi kona-ba resposta ba pedidu husi utente sira relasiona ho komunikasaun entre servisu sira liu husi via eletrónika.
Konsellu Ministru analiza mós:
1. Diploma Ministeriál ne’ebé kria Tarifa Sosiál ba Eletrisidade.
Membru Konsellu Ministru nian sira iha oportunidade hodi apresia posibilidade atu kria tarifa sosiál ida hó hanoin katak oferta tarifa subsidiada ba eletrisidade hanesan prátika ida ne’ebé komún iha país karensiadu sira. Iha país hirak ne’e Estadu kontribui ba enerjia elétrika nia folin hodi benefisia sosiedade.
17 juñu 2009Soro-mutu Konsellu Ministrus iha loron 17 fulan Juñu tinan 2009REPÚBLIKA DEMOKRÁTIKA TIMOR-LESTEhare tan
IV GOVERNU KONSTITUSIONAL
SEKRETARIA ESTADU KONSELLU MINISTURS
KOMUNUIKADU BÁ IMPRENSA
Soro-mutu Konsellu Ministrus, Kuarta-feira loron 17 fulan Juñu tinan 2009
Konsellu Ministrus hala’o tiha soru-mutu ohin Kuarta-feira, loron 17 fulan Juñu tinan 2009, iha Sala soru-mutu Konsellu Ministrus, iha Palásiu Governu, iha Dili no diskuti asuntu hirak hanesan tuir mai ne’
1. Proposta Lei Kontra Violênsia Doméstika
Konsellu Ministrus diskuti iha nia sorumutuk ohin diploma lejislativu ida relasiona hó kombate ba violênsia doméstika.
Dokumentu ida ne’e atu halo hanesan marku ida iha sensibilizasaun ba povo timorense ba nesesidade atu previni, investiga no hodi hatan ba krime violênsia, ne’ebé kria daudauk ne’e hó aprovasaun Kódigu Penal.
Lei ida ne’e iha hanesan objetivu esensial, bá promosaun kampaña edukativa ne’ebé fó korajen bá mudansa sosial no kultural hodi halakon kauza espesífika sira ne’ebé bele hamosu krimi hirak ne’e iha Timor-Leste.
Iha kontestu ida ne’e, no hodi hametin nafatin unidade familia nian, projetu estabelese luta hasoru violénsia doméstika hanesan kestaun interese públiku ida, hodi buka involve parseiru sosial hotu, órgaun Estadu nian, Sosiedade sivil, konfisaun relijioza, komunikasaun sosial no liu-liu ema hotu hotu, iha polítika ba prevensaun no apoiu ba vítima sira ne’ebé hetan tratamentu la diak liu husi kampaña sensibilizasaun opiniaun públika, iha àrea ensinu, hamutuk hó autoridade, no seluk tan.
Konsellu Ministrus entende atu fila hikas hodi analiza diploma ida ne’e iha sorumutuk oin mai.
2. Aprezentasaun kona-ba Revizaun Rejime Vistu nian
Tuir separasaun ba Servisu Migrasaun husi Polisia nasional Timor-Leste, ne’ebe liu ba sei halo parte iha PNTL, servisu hirak ne’e aprezenta ona bá Konsellu Ministrus projektu dezenvolvimentu no melloramentu sistema kona-ba entrada ema estranjeiru iha territóriu nasional.
Revizaun ida ne’e liu husi implementasaun ba rejime ida kona-ba entrada ida rigirozu liu no kontroladu, no respeita tipu vistu ne’ebe fó bá ema estrajeiru sira.
Husi parte seluk, kontrolu boot ida ne’e liu mos husi dezenvolvimentu sistema informátiku ida kompletu liu, ne’ebé bele halo ligasaun ida iha tempu loloos bá postu entrada hotu-hotu iha Timor-Leste, hodi fó vistu sira tuir situasaun vizitante ida-idak nian hodi bele kontrola diak liu tan sira ne’ebé hela iha país ida ne’e.
3. Aprezentasaun kona-ba Institutu Mikro-finansas
Konsellu rona tiha aprezentasaun husi Direktur Jeral projektu kona-ba haburas Institutu Mikro-finansas no iha hanoin atu nia sai entidade finanseira ida ne’ebé ema hotu bele fó fiar bá.
Timor-Leste foin daudauk ne’e sai nu’udar titular úniku ba Fundasaun Redusaun Pobreza nian, ne’ebé hari iha tempu administrasaun tranzitória husi Nasoñs Unidas ne’ebe halo jestaun ba institutu ne’e. Iha aspektu ida ne’e hakarak habelar âmbitu atuasaun entidade ne’e nian, liu husi hari tan delegasaun iha rai laran no aumenta kapasidade fó kréditu ho montante ki’ik, liu-liu iha àrea rural, hodi fó benefisiu bo’ot ba populasaun sira no presta servisu ida diak liu ba grupu hirak nu’udar alvu, hanesan komersiante ki’ik, agrikultor sira, emprezáriu ki’ikoan no funsionáriu públiku sira.
Aprezentasaun kona-ba “Projektu Nasional Konexaun”
Konsellu Ministrus rona tiha aprezentasaun ida kona ba projektu dezenvolvimentu rede informátika ida Governu nian.
Projektu ne’e atu fornese portal internet ida independente bá Governu, hadia diak liu tan ligasaun entre ministériu sira no servisu Governu nian sira, iha nivel sentral no lokal, no ajuda bá implementasaun no dezenvolvimentu prosesu deskonsentrasaun husi servisu administrasaun públika, mak hanesan hirak iha àrea agrikultura, edukasaun, saúde, justisa , finansas no planeamentu.
Baze husi projektu ne’e, atu hadia diak liu tan sistema no jestaun informasaun iha Administrasaun Públika, liu husi fornesimentu internet no hodi fasilita komunikasaun dadus nian entre servisu sira.
Ikus mai Konsellu Ministrus aprova ona :
Rezolusaun ne’ebe aprova “Akordu Finansiamentu entre Ajênsia Kooperasaun Internasional husi Japaun no Governu Repúblika Demokrátika Timor-Leste bá Projektu Melloramentu urjente Sistema Abastesimentu Bee iha Bemós-Díli.
Akordu ne’e hetan tiha ona asinatura iha loron 26 fulan Maiu liu ba, ne’ebé estabelese finansiamentu ida, mai husi Governu Japaun nian ba Projetu sistema abastesimentu bee iha Bemós ho valór osan dólar amerikanu $7,151,867.18.
Dekretu-Lei ne’ebe altera Rejime Pensaun Kombatentes no Mártires ba Libertasaun Nasional
Konsellu Ministrus aprova ona korresaun ki’ikoan ida husi dekretu-lei no.
15/2008, loron 4, fulan Juñu, kona-ba pensaun ba Kombatentes Libertasaun Nasional.
Alterasaun ida ne’e atu korriji difikuldade ida ne’ebé mosu iha dokumentu identifikasaun nian ne’ebe lei exiji bá pensionista sira atu fó prova sira nia direitu; nuné, tanba eis-Kombatente sira laiha kartaun eleitor no servisu kompetente Administrasaun Estatal nian lá halo resenseamentu ida ne’ebé permanente hodi bele hetan kartaun eleitor iha momentu ne’e, tan ne’e presiza duni kria mekanismu ida seluk ba identifikasaun pesoal ne’ebe bele halo identifikasaun ne’e.
Ida ne’e liu husi fó sai atestadu hó fotografia husi Xefe Suku hodi hetan sertidaun ida bá eleitor.
Hateten tan katak alterasaun ne’e halo dei’t ba pontu balu no revizaun ida bo’ot ba diploma ida ne’e sei halo bainhira halo alterasaun ba Estatutu Kombatentes Libertasaun Nasional nian ne’ebé oras ne’e dadauk hala’o hela diskusaun iha Parlamentu Nasional.
10 juñu 2009Soru-mutuk Konsellu Ministrus loron 10 fulan Juñu tinan 2009REPÚBLIKA DEMOKRÁTIKA TIMOR-LESTEhare tan
IV GOVERNU KONSTITUSIONÁL
SEKRETARIA ESTADU KONSELLU MINISTRUS
KOMUNIKADU BA IMPRENZA
Sorumutuk Konsellu Ministru loron 10 fulan Juñu 2009
Konsellu Ministrus hala’o tiha iha Kinta-feira semana liu ba, loron 10 fulan Juñu,2009, iha Sala Soru-mutu Konsellu Ministrus, iha Palásiu Governu, iha Díli, no aprova tiha :
1.Proposta ba Lei Seguransa Nasionál, Defeza Nasionál no Seguransa Interna.
Konsellu Ministru aprova tiha ona iha nia sorumutuk semana liu ba Proposta ba Lei lunbun oan ida ne’ebé oras daudaun sujeita ona ba Parlamentu Nasionál, koná-ba Seguransa Nasionál, Defeza Nasionál no Seguransa Interna.
Proposta ba lei hirak ne’e,bainhira mak aprovada hosi Parlamentu, sei hola forma ida ba quadru legal ne’ebé mak hetan iha área defeza no seguransa, falta deit atu aprova tan Proposta ba Lei Proteksaun Sivil.
Governu ho medida lejislativa hirak ne’e fó tan pasu ida hodi kumpri Programa ne’ebé mak tau hodi ezekuta ba iha enkuadramentu jurídiku no halo definisaun konseptual tuir Seguransa Nasionál,hanesan kontibuisaun ba Dame no Estabilidade.
1- Proposta ba Lei Seguransa Nasionál
Proposta ba lei ida ne’e sei mai disiplina exersísiu ne’ebé koordenadu ba aktividade Estadu nian iha defeza ba nia membru principal sira : ba atu define polítika ida iha mat’eria Seguransa Nasionál (hodi halo karakterizasaun no forsa ba defeza, forsa no servisu seguransa no ajente ba proteksaun sivil) atu hodi garante dezenvolvimentu bele hatam ba nia aktividade iha matéria Defeza Nasionál, Seguransa Interna no Proteksaun Sivil; iha kuadru Sistema Integradu ba Seguransa Nasionál mak empeñu operasional hamutuk iha lei ne’ebé mak propoin hodi regula, bainhira mak apresenta beibeik hanesan forma únika ida ba atu kumpre objektivo Estadu nian, hodi kontra ameasa sáida deit ka risku ba nia membru principal sira.
1.2-Proposta ba Lei Defeza Nasionál
Proposta ba Lei Defeza Nasionál estabelese tiha ona prinsípiu, objektivu, orientasaun no medida ne’ebé mak adopta husi Estadu Timorense no ba nia sidadaun sira atu hodi garante independênsia nasionál, ba integridade ninia territóriu no liberdade no seguransa ba nia populasaun hirak ne’e hela iha rai ne’e husi kualkuer atake ka ameasa husi rai liur.
Ba efeitu ida ne’e refere katak Defeza Nasionál (halo ona karakterizasaun no prinsípiu), Polítika Defeza Nasionál karakteriza tiha, objektivu permanente no Konseitu Estratéjiku ba Defeza no Seguransa Nasionál) ba Estrutura superior iha Defeza Nasionál (halo ona kompozisaun no atribuisaun ba órgaun soberana, halo plano estratéjiku ba forsa, halo organizasaun no halo la’o ba Forsa Armada Timor-Leste, dever Defeza Nasionál,hodi halo empeñu ba F-FDTL no Estatutu Militar nian.
1.3-Proposta ba Lei Seguransa Interna
Seguransa Interna ne’e aktividade ida mak hala’o hosi Estadu atu hodi garante ordem, seguransa no trankuilidade públika, hodi proteje ema no rikusoi, garante exersísiu ba direitu no liberdade fundamental ba sidadaun sira, prevene no kombate kriminalidade violenta no organiza,liu-liu terorismu, sabotajem no espionajem, no prevene atu hodi hamenus katástrofe natural, defende ambiente no preserva saúde públika no hodi asegura funsionamento normal ba instituisaun sira.
Prevê mos posibilidade ba atribui ba entidade seluk, públika ka privada, hodi halo realizasaun ba aktividade seguransa privada, tuir lei no kondisaun ne’ebé mak atu mai definine iha lejislasaun rasik.
2.Akordu Básiku kooperasaun entre Repúblika Demokrátika Timor-Leste no Reinu España.
Konsellu Ministru analiza no aprova tiha ona Akordu Básiku Kooperasaun entre Repúblika Demokrátika Timor-Leste no Reinu España.
Ba akordu ida ne’e Timor-Leste no España propoin atu dezenvolve aktivdade kooperasaun ba area interesse principal. Entre área interese hirak ne’e konta katak, liu-liu, ba servisu social básiku, akondisionamentu ba infra-estrutura no apoiu ba dezenvolvimentu iha sector produtivu, promosaun cultural no dezenvolvimentu ba investigasaun sientífika no teknolójika.
3.Proposta ba Resolusaun kona-bá Adezaun ba Konvensaun Viena Ba Proteksaun Kamada Ozonu no Protokolu Montreal Ba Hamenus Substánsia ne’ebé hodi Empobrese Kamada Ozono
Konsellu Ministru, iha nia sorumutuk semana liu ba, analiza no haksesuk tiha mós proposta Rezolusaun ida atu hodi hato’o ba Parlamentu kona-bá Adezaun Timor-Leste ba Konvensaun Viena Ba Proteksaun Kamada Ozono no Protokolu Montreal Ba Hamenus Substánsia ne’ebé atu hodi Empobrese Kamada Ozono.
Instrumentu kooperasaun internasionál hirak ne’e tuir nesesidade atu promove entreajuda iha proteksaun kamada ozono hasoru risku deteriorasaun, tan deit funsaun emisaun ba substánsia kímika balun.
Bainhira hala’o tiha adezaun Timor-Leste ba Konvensaun Viena no ba Protokolu Montreal, Timor-Leste sei bele rekuza importasaun ba produtu no ekuipamentu ne’ebé mak produz ka kontém substánsia la diak ba ambiente no ne’ebé konsta ba Anezu Protokolu Montreal, hanesan importa ka exporta produtu ne’ebé mak produz substánsia hirak ne’e ka sira ne’ebé mak halo parte ba nia kompozisaun.
