Primeiru-Ministru inaugura sistema kanalizasaun bee-moos iha Aldeia Mausoi-FahitePrimeiru-Ministru, Dr. Rui Maria de Araújo, Iha loron 11 fulan-marsu, inaugura sistema kanalizasaun bee-moos ba komunidade iha Aldeia Mausoi-Fahite, Suku Tibar, Postu Administrativu Bazartete, Munisípiu Likisá.
Bee-moos ne’ebé inaugura ona husi Xefe Ezekutivu, hetan apoiu husi Krús Vermella Timor-Leste (KVTL) no Governu Timor-Leste, liuhosi Gabinete Ministra Solidariedade Sosiál nian no mós ho kontribuisaun osan husi komunidade rasik ne’ebé ho esforsu maka’as konsege ona dada bee ne’e ba sira-nia uma. Sistema kanalizasaun ne’e rasik sei benefisia komunidade uma-kain 60 resin iha Aldeia Mausoi-Fahite.
Primeiru-Ministru hato'o parabéns ba komunidade, tantu feto no mane, nune’e mós ba Krus-Vermella Timor-Leste hanesan parseiru Governu nian ida, ne’ebé hatudu ona ezemplu boot ho espirítu voluntáriu hodi dada bee-moos ba aldeia ne’e.
Xefe Governu ne’e husu ba komunidade atu uza bee ho kuidadu no ba lider komunitáriu sira atubele mobiliza komunidade hodi kuda tan ai-horis sira ne’ebé bele kaer metin rai besik bee-matan.
Marka prezensa iha serimónia ne’e maka hanesan prezidente KVTL Timor-Leste, Administradór Postu Administrativu Bazartete, Komandante Polísia, lia-na’in no komunidade sira iha aldeia ne’e.
1 
