Divizaun Administrativa

Territóriu Timor-Leste konstituidu/kompostu husi parte loromonu tomak ilha Timor nian, ilha Ataúru ne’ebé hamriik iha parte norte kosta Díli nian, ilhéu ka ilha kiik Jako, iha liu ponta leste, no enklave Oekusi-Ambenu, iha kosta norte, parte Timór Indonézia. Territóriu ne’e nia área totál mak besik 15 mil km², ho populasaun serka de 1,066,409 (Sensus 2010), i nia kapitál mak sidade Díli.

Iha 1908, Portugal fahe territóriu Timor-nian ba komandus miltares 15, ne’ebé hola konta mós Administrasaun Sivíl, hodi desentraliza tiha. Dékada ka tinan sanulu liutiha metrópole (governu Lisboa) kria primeiras sirkunskrisoens sivís, hodi sobu-fahe tiha monopóliu podér militár, tanba la presiza ona depois-de halo asinatura Sentensa Arbitrál 1914 ho Olanda. Iha 1940 kria Primeiru Koncelhu – Koncelhu Dili – hahú husi ne’ebá koncelhus ho sirkunskrisoens sei la’o hamutuk to’o ikus liu foti sirkunskrisaun (Oekusi-Ambeno) ba koncelhu, iha Agostu 1973.

Iha meadus dékada 60, Administrasaun portugál kaer koncelhus 11, Bobonaru, Kova-Lima, Likisá, Ermera, Díli, Ainaru, Same, Manatutu, Baukau, Vikeke no Lautém; no sirkunskrisaun mesak ida mak, enklave Oekusi-Ambenu. Divizoens hirak ne’e nia fronteiras kuaze hanesan ho Distritus nian agora, ho diferensas tolu: koncelhu Aileu, iha tinan hirak ne’ebé Administrasaun portugeza besik ona atu naksobu, haketak tiha husi Díli; no, iha tempu Administrasaun indonézia, sub Distritu Turiskai muda husi Distritu Ainaru bá fali Manufahi, troka ho Hatudu. Entre Distritus Timor-Leste nian tomak, Vikeke nia rain mak luan liu (884 km²) i Díli mak ki’ik liuhotu (364 km²).

Distritus

Distritos

Tuir termus Administrativus, Timor-Leste fahe ba Distritus 13: Bobonaru, Likisá, Díli, Baukau, Manatutu i Lautém iha kosta norte ka tasi feto; Kova-Lima, Ainaru, Manufahi no Vikeke, iha kosta sul ka tasi mane; Ermera ho Aileu, iha parte klaran ne’ebé mesak foho; i Oekusi-Ambenu, enklave ida iha Territóriu indonézia laran. Timor-Leste nia Distritus 13 agora ne’e nian, sei kontinua ho limites/fronteiras koncelhus 13 nian iha tempu Administrasaun Portugeza. Distritu ida-ida iha nia sidade kapitál rasik, ne’ebé fahe fali ba Subdistritus, maibé númeru Subdistritus varia husi tolu to’o hitu, ho média Subdistritus lima ba kada Distritu. Tuir termus demográfikus ka populasaun, Distritu Díli mak konsentra populasaun barak liu no Distritu Aileu uitoan, maski nia luan liu Dili dala-rua.

Subdistritus

Subdistritos

Kada Subdistritu husi totál 67 ne’ebé tama iha Distritus 13 laran, iha mós nia kapitál rasik no subdivizoens administrativas hanesan Sukus, ne’ebé varia entre 2 to’o 18 ba kada Subdistritu. Subdistritu boot liu mak Lospalus, iha Lautém, ho 635 km², ki’ik liuhotu mak Na’in-Feto, iha Díli, ho 6 km². Fatu Lulik, Sub-Distritu ida hotu ne’ebé ki’ik i ema mós uitoan, 2 mili de’it. Naturalmente, Sub-Distritus ne’ebé populasaun boot liu mak sira ne’ebé pertense ba Distritu Dili, liu-liu sira ne’ebé iha kedas sidade kapitál paíz laran.

Sukus

Divizaun adminsitrativa ki’ik liuhotu iha Timor-Leste mak Suku, ne’ebé bele kompostu husi Aldeia ida ka lubun ida. Iha Sukus 498 iha Territóriu tomak, ho média suku 7 ba Subdistritu ida. Distritu Baukau mak iha Sukus barak liuhotu, 63, no Distritu Ainaru mak aprezenta divizoens ki’ik liu, 21 Sukus. Analiza média distritál kona-ba númeru Sukus ba kada Subditritu, Distritus iha parte sentrál mak segmentadus ka fahe barak liu. Aileu ho Ermera iha média aas liuhotu, Sukus 11 ba Distritu ida, Ainaru ho Oekusi-Ambenu uitoan liu, Sukus 5 ba kada Subdistritu. Subdistritus iha sentru ne’ebé mesak rai foho, sira nia Sukus barak liuhotu: Aileu, Distritu Aileu, no Bobonaru, Distritu Bobonaru, kada ida kompostus husi divizoens 18; kontráriu fali, Subdistritus Hatudu, iha Ainaru, no Tutuala, iha Lautém, rua ne’e besik tasi no rai ladún aas, ida-ida iha de’it sukus rua.

Kona-ba dimensoens ka rai-luan, maioria sukus ne’ebé boot liu, lokalizadus iha Distritus Timor-Leste iha parte lorosa’e rohan bá, ho destake ba Laline, iha Subdistritu Lakluta, Distritu Vikeke, ho 212 km². Sukus 15 ne’ebé ki’ik liu, iha hotu Distritu Díli, sai hanesan bairrus, ho luan entre 2 km² i 6 ha. Populasaun la fahe hanesan ba Sukus. Entre Sukus ne’ebé nia populasaun menus liu 500, iha rua husi suku haat ne’ebé pertense ba Subdistritu Fatu-Lulik, Kova-Lima, mak ho de’it ema 136, no konsidera hanesan Suku ho ema menus liuhotu iha Timor-Leste. Hanesan ita hatene nanis ona, entre sukus ne’ebé ho abitantes barak liu 5 mil, barak mak pertense ba Distritu Díli, liu-liu iha Subdistritu Dom Aleixo. Maibé suku ho populasaun barak liuhotu, ema besik 10 mil mak Fuiloro, Iha Lospalus, Lautém.

Informasaun Distritus

Distritu AileuDistrito de Aileu

Lokalizadu iha parte sul Díli, kapitál paíz. Iha abitantes 44.325 mil (Sensus 2010), ho área 729 km² no densidade demográfika ema 50,6 ba km². Nia kapitál mak sidade Aileu. Aileu uluk liu halo parte koncelhu Dili no foin hamriik ketak iha tinan hira ikus mai iha tempu administrasaun portugeza. Distritu Aileu inklui Subdistritu Aileu rasik, Laulara, Lekidoe no Remexiu.

 

Distritu AinaruDistrito de Ainaro

Lokalizadu iha sudoeste paíz. Iha abitantes 59.175 mil (Sensus 2010) no área 797 km². Nia kapitál mak sidade Ainaru. Distritu Ainaru uluk iha tempu Timor Portugêz hanesan koncelhu ida ho naran ne’ebé hanesan, maibé iha exepsoens balu hanesan ne’e: durante Administrasaun Indonézia Subdistritu Turiskai pasa husi Diistritu Ainaru ba Manufahi, troka ho Hatudu ne’ebé pertense fali ba Ainaru. Distritu Ainaru inklui atualmente Subdistritus Ainaru, Hatudu, Hatu Builiku no Maubise. Distritu Ainaru iha bee barak tebes no rai ne’ebé bokur i di’ak ba Agrikultura. Nia iha mós área ida ke besik tasi, no zonas barak liu mesak foho, inklui pontu aas lihotu iha Timor-Leste, mak Foho Ramelau (2.960 m). Tuir istória, Ainaru iha papél boot tebes durante tempu Rezistênsia hasoru okupasaun Indonézia iha Timor-Leste, hodi fó fatin subar ba gerrilheirus sira iha foho leten bá. Alein-de línguas ofisiais paíz, tetun no portugêz, iha Distritu Ainaru populasaun barak liu mak koalia mambae.

 

Distritu BaucauDistrito de Baucau

Lokalizadu iha parte orientál paíz, hela dook 122 km husi kapitál Dili, nia mak segunda sidade paíz , ho abitantes 111.694 mil (Sensus 2010) no área 1.494 km². Nia kapitál mak sidade Baukau. Iha tempu kolonizasaun portugeza bolu naran Vila Salazar. Distritu Baukau inklui Subdistritus Bagia, Baukau,Fatumaka(?), Laga, Kelikai, Vemase no Venilale (naran Vila Viçosa durante tempu Administrasaun Portugeza). 6 km besik sidade Baukau, iha aeroportu Internasionál ne’ebé boot liuhotu iha Timor-Leste (kódigu IATA: NCH), oras ne’e la utiliza ba aviasaun sivíl. Iha Subdistritu Venilale (ex-Vila Viçosa) iha túneis ka rai ku’ak naruk no luan boot ne’ebé ema japaun sira ke’e, halo ita hanoin fali tempu okupasaun japaun nian iha Segunda Gerra Mundiál. Atividade ekonómika prinsipál Distritu Baukau nian mak agrikultura (batar, háre, fore-rai, nuu no produtus to’os nian seluk). Ho hadi’a neineik transportes no fornesimentu enerjia elétrika, bele haré katak iha ona dezenvolvimentu ne’ebé progresivu iha Setór Privadu no pekenas i médias emprezas. Distritu Baukau nia zona litorál ka rai besik tasi mós luan tebes, ho praias ka tasi ninin mesak furak, di’ak tebes atu nani no halo atividades seluktán iha bee laran. Alein-de línguas ofisiais paíz, tetun no portugêz, iha Distritu Baukau populasaun barak liu mak koalia dialetu lokál, makasae.

 

Distritu BobonaruDistrito de Bobonaro

Lokalizadu iha zona loromonu paíz, besik fronteira ho Indonézia. Iha abitantes 92.049 mil (Sensus 2010) no área ida ho 1.368 km². Nia kapitál mak sidade Maliana ne’ebé hela 149 km iha sudoeste Díli, kapitál paíz. Distritu Bobonaru uluk iha tempu Timor Portugêz hanesan koncelhu ida ho naran ne’ebé hanesan, i iha tempu ne’ebá nia kapitál mak Vila Armindo Monteiro, agora temi naran Bobonaru. Distritu ne’e inklui Subdistritus Atabae, Balibó, Bobonaru, Kailaku, Lolotoe no Maliana.

 

Distritu Kova LimaDistrito de Cova Lima

Lokalizadu iha zona osidentál paíz , besik fronteira ho Indonézia. Iha abitantes 59.455 mil (Sensus 2010) no área ida ho 1.226 km². Nia kapitál mak sidade Suai ne’ebé hela 138 km iha sudoeste Díli, kapitál paíz . Distritu Kova Lima inklui Subdistritus Fatululik, Fatumean, Fohorén, Mape-Zumulai, Maukatar, Suai i Tilomar.

 

Distritu Dili (kapitál)Distrito de Díli

Lokalizadu iha kosta norte ilha Timor ne’ebé konfina ka halo baliza, husi lorosa’e, ho Distritu Manatutu, husi sul ho Aileu, husi loromonu ho Likisá husi norte ho Tasi Savu; integra mós ilha Ataúru, ne’ebé hateke besik ba sidade Díli. Iha abitantes 234.026 mil (Sensus 2010) ho área 372 km². Ne’e mak Distritu kiik liuhotu iha paíz . Nia kapitál mak sidade Díli ne’ebé hanesan mós kapitál Timór-Leste. Distritu Díli iha tempu Timór Portugêz koncelhu ida hotu ho naran ne´ebé hanesan no inklui koncelhu (agora Distritu) Aileu. Distritu Díli inklui atualmente Subdistritus Ataúru, Kristu-Rei, Dom Aleixo, Na’infeto, Metinaru i Vera Kruz.

 

Distritu ErmeraDistrito de Ermera

Lokalizadu iha zona sentrál paíz . Iha abitantes 117.064 (Sensus 2010) no área ida ho 746 km². Nia kapitál mak sidade Glenu hela 58 km husi sudoeste Díli, kapitál paíz. Distritu Ermera inklui Subdistritus Atsabe, Ermera, Hatólia, Letefoho no Railaku. Entre kulturas agríkolas, Ermera konhesidu liu hanesan zona kafé ne’ebé di’ak liuhotu iha paíz.

 

Distritu LautémDistrito de Lautém

Lokalizadu iha ponta orientál ilha Timor, inklui mós ilha Jako. Iha abitantes 59.787 (Sensus 2010) no área ida ho 1.702 km². Nia kapitál mak sidade Lospalus ne’ebé hela 248 km husi leste Díli, kapitál paíz . Distritu Lautém uluk iha tempu Timor Portugêz hanesan mós koncelhu ida ho naran ne’ebé hanesan. Iha tempu ne’ebá, fatin barak mak fó naran portugêz, hahú husi vila Lautém ne’ebé bolu naran Vila Nova de Malaca, no mós Kom agora (uluk naran Nova Nazaré), Tutuala (uluk Nova Sagres), Laivai (uluk Nova Âncora) no Loré (uluk Silvícola). Distritu Lautém inklui Subdistritus Iliomar, Lautém-Moru, Lospalus, Luru no Tutuala. Alein-de lian ofisiais paíz nian, tetun ho portugêz, iha Distritu Lautém abitantes sira koalia fataluku, idioma ida ho hun mai husi lian papuas, ne’ebé koalia iha Nova Giné.

 

Distritu LikisáDistrito de Liquiçá

Lokálizada iha kosta norte paíz , besik 32 km husi Dili. Halo fronteira ho Distritus Bobonaru no Ermera husi sul; ho Díli husi lorosa’e; no Tasi Savu husi norte i loromonu. Iha abitantes 63.403 (Sensus 2010) no área ida ho 543 km². Nia kapitál mak sidade Likisá. Distritu Likisá inklui Subdistritus Bazartete, Likisá no Maubara. Áreal rai-henek metan ne’ebé luan tebes mak hanesan atrasaun prinsipál turístika ida hotu. Alein-de línguas ofisiais paíz, tetun ho portugêz, iha Distritu Likisá kuaze populasaun tomak koalia tokodede.

 

Distritu ManatutuDistrito de Manatuto

Lokalizadu iha zona sentrál paíz , abarka ka kobre kosta norte no sul ilha. Husi norte konfina ho tasi Estreitu Wetar; husi lorosa’e ho Distritus Baukau no Vikeke; husi sul ho Tasi Timór no loromonu ho Distritus Manufahi, Aileu i Díli. Iha abitantes 42.742 (Sensus 2010) i área ida ho 1.706 km². Nia kapitál mak sidade Manatutu. Mota naruk liuhotu iha Timór-Leste, mak mota Lakló, ne’ebé suli mai to’o iha Distritu Manatutu, entre ponta Subaun ho baía Lanesana. Distritu Manatutu inklui Subdistritus Barike-Natarbora, Laklo, Laklubar (iha tempu portugêz bolu naran Vila de Nova Ourique), Laleia, Manatutu no Soibada. Aleinde "lían ofisiais" Timor-Leste nian, tetun ho portugêz, iha Manatutu populasaun barak liu mak koalia galolen, idioma ida ke rekonhesidu ho estatutu "língua Nasionál" tuir Konstituisaun.

 

Distritu ManufahiDistrito de Manufahi

Lokalizadu iha kosta sul ilha, konfina husi loromonu ho Distritu Manatutu, husi norte ho Aileu, husi loromonu ho Ainaru no husi sul ho Tasi Timor. Iha abitantes 48.628 (Sensus 2010) i área ida ho 1.325 km². Nia kapitál mak sidade Same. Distritu Manufahi mak hanesan koncelhu Same iha tempu Timór Portugêz ne’ebé harí iha 1945 no inklui Subdistritus Alas, Fatuberliu, Same no Turiskai. Subdistritu ida ikus ne’e - Turiscai - uluk pertense ba Distritu Ainaru iha iha tempu Administrasaun indonézia mak bá fali Manufahi, troka ho Hatudu ne’ebé pertense fali ba Ainaru. Alein-de línguas ofisiais paíz nian , tetun ho portugêz, iha Distritu Manufahi populasaun barak liu mak koalia mambae.

 

Distritu Oekusi-AmbenuDistrito de Oecussi-Ambeno

Lokalizadu iha kosta norte metade osidentál ilha Timor, hanesan enklave Timor-Leste nian ida, tanba hela dook husi paíz tomak, haketak ho província indonézia Timor Oeste, ne’ebé hale’u enklave kiik-oan ne’e husi Diresaun hotu-hotu, exeptu husi norte, tanba iha Tasi Savu. Oekusi-Ambenu ne’e liafaun ida ne’ebé mai husi naran reinu rua nian iha tempu uluk, hodi forma Distritu atuál. Territóriu ne’e iha abitantes 64.025 (Sensus 2010) i área ho 815 km². Kapitál mak sidade Pante Makasar ne’ebé, iha tempu portugêz, konhesidu ho naran Vila Taveiro. Distritu Oekusi-Ambenu hanesan ho Konselhu Oekusi iha tempu Timor Portuguêz, nia mak srikunskrisaun Timor-nian ne’ebé ikus liu ona mak foin hasa’e ba koncelhu iha Agostu 1973, no inklui Subdistritus Nitibe, Oesilu, Pante Makasar no Pasabe.

Oekusi-Ambenu uluk hanesan fatin ida iha Timor ne’ebé uluk liu portugezes sira mai hela bá, ne’e mak to’o ohin loron konsidera hanesan bersu ka kama-huur Timor-Leste. Iha 1556, grupu frades dominikanus harí primeiru Povuadu iha Lifau, kilómetrus sanulu-resin husi oeste Pante Makasar. Iha 1702, Lifau sai hanesan kapitál kolónia hodi simu primeiru governadór ne’ebé haruka-mai husi Lisboa, i sei ho nafatin estatutu ne’e to’o 1767, bainhira portugezes sira deside atu transfere kapitál ba Díli, tanba forsas olanda nian sira ataka beibeik. Só iha 1859, ho Tratatu Lisboa, mak Portugál ho Paízes Baixus, fahe ba malu ilha ne’e: Timor Osidentál ba olandezes sira, ho sede iha Kupang, no Timór-Leste ba portugezes, ho sede iha Díli, hodi rekonhese Oekusi-Ambenu hanesan enklave portugál nian ida iha rai olandêz laran.

Invazaun indonézia ba Timor Portugêz hahú iha Oekusi semana ida antes, molok tama iha rai sira seluk iha Territóriu tomak - iha 29 Novembru 1975 kinta koluna ezêrsitu Indonézia nian okupa Pante Makasar. Maski ho okupasaun Indonézia, Oekusi-Ambenu kontinua administra hanesan parte husi provínsia Timór Timur (ne’e naran ba Timór-Leste ho lian indonézia), hanesan mós uluk iha portugezes sira nia tempu. Nune’e, iha rekonhesimentu ba independênsia Timór-Leste, iha 2002, Oekusi-Ambenu kontinua nafatin hanesan parte integrante nasaun Timór. Alein-de línguas ofisiais paíz nian, tetun ho portugêz, iha Distritu Oekusi-Ambenu populasaun barak liu mak koalia baikenu.

 

Distritu VikekeDistrito de Viqueque

Lokalizadu iha kosta sul ilha nian. Husi lorosa’e halo baliza ho Lautém, husi norte ho Baukau, husi loromonu ho Manatutu no husi sul ka tasi mane ho Tasi Timor. Iha abitantes 70.036 (Sensus 2010) no área ida ho 1.781 km². Nia kapitál mak sidade Vikeke. Distritu Vikeke inklui Subdistritus Lakluta, Osú, Uatulari (iha tempu portugês bolu naran Leça), Uato Karabau no Vikeke. Alein-de lian ofisiais paíz nian, tetun ho portuguêz, iha Distritu Vikeke populasaun barak liu mak koalia makasae.

   Ba leten