Atleta timoroan sei partisipa Sea Games 2013

Ses. 26 jullu 2013, 20:21h
SEA_GAMES_PORTAL

Atleta na’in 48 husi Timor-leste, sei partisipa iha kompetisaun desportu Sea Games 2013 iha Myanmar, fulan Dezembru 2013.  Atleta sira husi modalidade desportu neen  tama ona Training Centre (TC) iha Dili, hahú loron 25 fulan Jullu 2013 to’o Dezembru 2013.

Modalidade desportu neen ne’e, maihusi Atletizmu ho atleta na’in (2), Taekwondo (2), Kempo (18), Futeból (22), Boxing (2) no Modalidade Siklizmu (2). Atleta sira-ne’e, prienxe ona kritéria atu partisipa eventu internasionál ne’e.

Sekretádu Estadu Juventude no Desportu, Miguel Marques Manetelu, bainhira loke ofisialmente TC iha Jináziu Dili, loron 25 fulan Jullu 2013 ho tema “Hakarak manan tenke matenek, badinas, fiar-an no dixiplina. Husu ba atleta sira, atu mantein dixiplina durante preparasaun fulan tolu, atu bele hetan rezultadu di’ak iha Sea Games 2013”.

“Joven barak mak  hakarak atu bá, hanesan mós imi. Maibé, sira la hetan oportunidade. Maske investimentu  ba desportu seidauk máximu, ita fiar katak, ho rekursu ne’ebé Timor-Leste iha, ita bele hetan rezultadu di’ak.”

Manetelu mós dehan tan, “Eventu Sea Games 2013 sai sasukat ida ba Timor-leste, atu bele partisipa Asia Games”.

Prezidente Konfederasaun Desportu Timor-Leste (KDTL), ne’ebé mós hanesan Prezidente ba Preparasaun Atleta Nasional (PAN), Higino Antonio Trindade, haktuir, “Selesaun ba atleta sira bazeia ba prestasaun no klasifikasaun hosi kada modalidade, liuhosi kompetisaun iha nível nasionál, rejionál nomós internasionál.

   Ba leten