Hafoin halo tiha konsultasaun ho Komisaun Avaliasaun Impaktu Ambientál, Ministériu Petróleu no Rekursu Minerál, hetan lisensa ambientál hosi Sekretáriu Estadu Meiu Ambiente iha loron 12 Jullu ba rai Suai Baze Supplay ho luan ektare 1.105 iha subdistritu Suai Vila, distritu Covalima.

Lisensa ne’e fó sai tuir Dekretu-Lei ho No. 5/2011, loron 9 fulan Fevereiru, kona-ba Lisensiamentu Ambientál. Ho ida-ne’e, prosesu Suai Baze Supply  hakat tan ba oin, ne’ebé sei hamosu projetu bo’ot sira hanesan, Baze Supply no Aeroportu. Lisensa ne’e mós sei fó benefísiu ba dezenvolvimentu ekonomia Timor-Leste, liuliu iha área indústria no agrikultura iha Kosta Sul.

Ministru Petróleu no Rekursu Minerál, Alfredo Pires, informa tan “prosesu lisensa ambientál la’o kuaze tinan rua ona. Lisensa ambientál ba projetu bo’ot hanesan SBS ne’e importante, atu proteje ita-nia ambiente no fó konfiansa ba empreza internasionál sira”.