Eletrisidade Timor-Leste (EDTL), iha loron 4 fulan Abril hala’o semináriu ba loron ida nian, kona-ba Reativasaun Pagamentu Enerjia Eletrisidade (RPEE) ba populasaun sub-distritu Lospalos, iha salaun Edukasaun Lospalos Vila.

Iha diskursu Ministru Obras Públikas, Gastão de Sousa hatete, “oras ne’e iha ona realidade eletrisidade bele lakan iha oras 24 nia laran iha populasaun nia uma no fatin balun ne’ebé uluk la lakan maibé oras ne’e bele hetan ona enerjia elétrika”.

“Importante mak agora ita-nia atendementu ba populasaun tenke hadi’a di’ak liután, tanba atu reativa pagamentu EDTL tenke prontu hodi atende nesesidade populasaun nian. No husu ba EDTL atu servisu di’ak liután”, tenik Ministru Gastão de Sousa.

Iha fatin hanesan, Xefe EDTL Lautein, Gil da Silva hatete, distritu Lautein ninia totál kliente ne’ebé agora daudauk rejistu ona iha EDTL distritu Lautein foin suku lima, ne’ebé ho totál kliente rihun ida atus lima maibé sei la to’o de’it iha ne’e, rejistu sei hala’o nafatin to’o kobre fatin hotu populasaun sira nian ne’ebé seidauk hetan eletrisidade ba sira-nia uma.

Aleinde ne’e, reprezentante Admistradór distritu Lautein, José Monteiro hatete, “komunidade iha direitu atu uza sasan ne’ebé Estadu nian, maibé tenke uza ho responsablidade no labele dada eletrisidade ilegál. No Ita  nu’udar komunidade  tenke hatene ita ninia obrigasaun, sasan EDTL nian ba ita atu uza, maibé ita mós iha devér no obrigasaun tenke  tau fali iha fatin.