Ministériu Justisa, liu hosi Ministru Dionísio Babo, iha segunda-feira, loron 25 fulan Marsu, iha Bairro Pité, Díli, simu fali edifísiu aeroportuáriu ba elikópteru hosi Forsa Estabilizasaun Internasionál (FSI) Austrália nian, ne’ebé durante tinan barak nia laran sira uza hodi halo misaun paz nian iha Timor-Leste.

Ministru Justisa, Dionísio Babo, hateten katak “Propriedade Estadu nian ne’ebé durante ne’e Forsa Estabilizasaun Internasionál uza, ofisialmente entrega ona ba Governu liuhosi Ministériu Justisa, mak hanesan edifísiu aeroportuáriu ba elikópteru ho rai nia luan besik ektare hitu. Propriedade ne’e  hosi parte kotuk nian, rai ektar 1 sei entrega ba Prezidente Repúblika hodi aumenta tan ninia edifísiu, hafoin ektar 6 sei entrega ba Parlamentu Nasionál atu harii edifísiu foun ba Parlamentu Nasionál.

Serimónia ne’e, hetan partisipasaun  hosi  Ministru Justisa, Dionísio Babo, Sekretáriu Estadu Terra no Propriedade, Jaime Xavier, Komandante  Forsa Estabilizasaun  Internasionál, Mick, Xefe Gabinete Ministru Justisa, Mateus Rita, reprezentante hosi Prezidente Repúblika no Ministériu Finansa nian sira.