Sosializasaun Esbosu Lei Komunikasaun Sosiál
Sekretáriu Estadu Komunikasaun Sosiál, Nélio Isaac Sarmento, partisipa no loke sesaun abertura workshop kona-ba sosializasaun ezbosu Lei Komunikasaun Sosiál ne’ebé organiza hosi Fundasaun Fundu Média (FFM), ho tema ”Prosesu Preparasaun Ba Estabelesimentu Konsellu Imprensa no Sosializasaun Ezbosu Lei Jerál Komunikasaun Sosiál Timor-Leste nian, iha loron 21 to’o 23, fulan Janeiru, tinan 2013, iha Otél Beach Garden, Díli.
Nélio Isaac Sarmento, iha ninia diskursu hateten katak “ko’alia kona-ba konsellu imprensa nu’udar parte ida hosi ezbosu lei komunikasaun sosiál nian, ne’ebé oras ne’e hahú hala’o daudaun sosializasaun. Ha’u kumpriende ita nu’udar Asosiasaun Jornalista, profesionál komunikasaun sosiál, mak na’in ba média sira, hotu-hotu preokupa hela kona-ba oinsá ho konsellu imprensa ne’ebé mak atu mai. Konsellu Imprensa importante, hanesan órgaun independente ida atu proteje, regula no mós eziji responsabilidade profisionál hosi servisu komunikasaun sosiál nian. Iha ezbosu lei komunikasaun sosiál nian hateten ona, bainhira lei ne’e tama iha vigór, tenke estabelese ona Konsellu Imprensa.
“Ha’u hakarak fó hanoin ba Asosiasaun Jornalista sira, mak na’in ba média no profisionál jornalista nian sira, bainhira hakarak atu reprezenta ita nia ema iha Konsellu Imprensa, Asosiasaun hirak ne’e tenke sér lejítimu, nune’e mós na’in ba média sira, sira nia empreza tenke iha lisensa ba negósiu nian, iha estrutura no akontabilidade”.
Diretora Ezekutivu Fundasaun Fundu Média (FFM), Suzana Cardoso hateten katak, “Agora ne’e komunidade média sira presiza iha rekizitu fundamentál sira no hanesan sumbriña ida ne’ebé bele fortifika sira-nia papél nu’udar instrumentu kontrolu sosiál nian. Iha Workshop ne’e, ita nia oradór sira sei fahe sira nia esperiénsia kona-ba oinsá atu estabelese Konsellu Impresa ida iha Timor-Leste ho ninia funsionamentu, aleinde ne’e atu disemina ka sosializa mós ezbosu Lei Jerál ba Komunikasaun Sosiál iha país ida ne’e.”
Marka prezensa iha workshop ne’e, Sekretáriu Estadu ba Komunikasaun Sosiál, Nélio Isaac Sarmento, oradór Internasionál, Bambang Harymurti, nu’udar vise Prezidente Konsellu Imprensa Indonézia, Prezidente Konsellu RTTL Expedito Dias Ximenes, Prezidente AJTL, Tito Freitas Belo, Prezidente Sindikatu Jornál Timor-Leste, Otélio Ote, Diretór no Asessór hosi gabinete SEKOMS, estudante departementu komunikasaun sosiál sira UNTL nian, alunu sira jornál parede São Miguel no jornalista sira.
