Governu Timor-Leste organiza serimónia rituál Simu-Malu hodi komemora Sentenáriu Revolta Dom Boaventura, iha mota Ai-asa, mota Karau Ulun no mota Ermeti iha distritu Manufahi, iha loron 23 fulan Novembru 2012. Objetivu hosi serimónia rituál ne’e atu hametin unidade nasionál hodi hakribi violénsia no hakat ba dezenvolvimentu nasionál.

Serimónia rituál ne’e hala’o dahuluk iha mota Aiasa entre lia-na’in sira hosi distritu Manufahi ho lia-na’in sira hosi distritu Ainaru, Bobonaru no distritu Kovalima. Simu-Malu daruak iha mota Karau-Ulun, entre lia-na’in hosi distritu Manufahi ho lia-na’in hosi distritu Vikeke, Baukau, Manatutu no distritu Lautein, no serimónia Simu-Malu dahikus realiza iha mota Ermeti, entre lia-na’in sira hosi distritu Aileu, Díli, Ermera, Likisá no hosi distritu Oe-Kussi Ambenu.

Vise Primeiru-Ministru, Fernando La Sama de Araújo, husu ba povu Timor-Leste atu soe tiha buat “aat ne’ebe mak uluk Timoroan sira halo ba malu hodi simu fali Matak no Malirin atu harii unidade nasionál hodi hakat ba dezenvolvimentu”.

Marka prezensa iha serimónia rituál Simu-Malu ne’e, Vise Primeiru-Ministru, Fernando La Sama de Araújo, Ministru Administrasaun Estatál, Jorge da Conceição Teme, Ministru Komérsiu, Indústria no Ambiente, António Conceição, Sekretáriu Estadu Dexentralizasaun, Tomás Cabral, Sekretária Estadu Kultura, Maria Isabel de Jesus Ximenes, Administradór distritu sanulu-resin-tolu no lia-na’in sira hosi distritu sanulu-resin-tolu nian.