IV Governu Konstitusionál kontinua ho ninia kompromisu atu fó enerjia eletrisidade ba povu sira, tanba ne’e iha loron 4 fulan Jullu 2012, Sekretáriu Estadu Eletrisidade, Água no Urbanizasaun (SEEAU), Januário Pereira, ofisialmente loke tan Sub-Estasaun elétrika Maliana hodi fornese enerjia eletrisidade ba komunidade sira iha subdistritu Maliana, Distritu Bobonaro.

Sekretáriu Estadu, Januário Pereira haktuir katak dala ida tan ita ativa enerjia elétrika iha subestasaun elétrika Maliana ne’e, atu halo kompletu subestasaun sia ne’ebé tuir planu sei monta iha territóriu laran tomak. Ita inaugura subestasaun Maliana nian ne’e, hodi bele kobre ona kosta sul, falta de’it subestasaun Suai (Covalima) no subestasaun Kassa (Ainaro) nian.

Sekretáriu Estadu haktuir tan katak, eletrisidade hanesan infraestrutura bázika ida ne’ebé fundamentál liu ba infraestrutura bázika sira seluk, tan ne’e ho serimónia ativasaun ba enerjia elétrika iha subestasaun Maliana nian ne’e, bele benifisia ita nia komunidade sira iha Distritu ida ne’e, hodi kria ona indústria kiik oan sira seluk hanesan karpintária, halo bloku, agro-indústria no sira seluk tan.

Administradór Distritu Bobonaro, Domingos Martins, haktuir tan katak durante ne’e mós ha’u hakarak hato’o ba Sekretáriu Estadu katak ami nia koordenasaun ho Polisia Nasionál Timor-Leste no kompañia sira di’ak tebes, ohin realidade hatudu tan katak, iha Timor-Leste, Distritu sia, mak enerjia elétrika lakan ona, durante oras 24 nia laran, tanba ne’e Distritu Bobonaro fó agradesimentu ba Governu ida ne’e.

Aleinde ne’e reprezentante komunidade Distritu Bobonaro informa mós katak, kontente tebe-tebes tanba bele hetan enerjia elétrika durante oras 24 nia laran.