Sorumutu Parseiru Dezenvolvimentu Timor-Leste nian (TLDPM)

Sorumutu dahikus Parseiru Dezenvolvimentu Timor-Leste nian, iha ámbitu mandatu Governu Konstitusionál IV, sei hala’o iha loron 15 no 16 fulan Maiu, iha Sentru Konvensaun Dili.

Sorumutu tinan ida ne’e ninia tema “Nasaun ida ne’ebé la’o ba futuru – Entrega Prosesu Governasaun nian, Dezafiu no Oportunidade sira ba Aban-bainrua”.

Sorumutu ne’e nia objetivu atu reflete kona-ba dezafiu sira iha pasadu, realizasaun sira ne’ebé alkansa ona no oportunidade sira ba aban-bainrua, atuhodi trasa diresaun estratéjika komún ida ne’ebé hetan liuhosi reforsu aliñamentu entre parseiru sira, no liuhosi efikásia iha implementasaun programa dezenvolvimentu sira.
Sorumutu ne’e sei prezide hosi Ministru Negósiu Estranjeiru, Zacarias Albano da Costa no Ministra Finansa, Emília Pires, ne’ebé sei halo abertura ofisiál hosi Prezidente Repúblika, Dr. José Ramos-Horta.

Hafoin diskursu-badak rua, hosi reprezentante Sekretáriu Jerál Nasoens Unidas Interinu, Shigeru Mochida no Diretór Banku Mundiál ba Timor-Leste, Luís Constantino, Primeiru-Ministru, Kay Rala Xanana Gusmão, sei halo reflesaun ida kona-ba konstrusaun Estadu Timor-Leste ihaTinan 10 nia laran. Molok sesaun fotográfika ida ho xefe delegasaun sira, Asesór Asuntu Ekonómiku hosi Ministru Kooperasaun Internasionál iha Egipto no Prezidente Grupu Traballu OCDE-CAD kona-ba efikásia Ajuda nian, Talaat Abdel-Malek sei halo mós diskursu.
Sorumutu ne’e iha ninia sesaun sira ne’ebé hakfahek ba loron rua.

Sesaun dahuluk, iha loron 15, relasiona ho“Aprezentasaun Dezafiu Pasadu no Prezente sira nomós realizasaun sira iha tinan 2007-2012”.
Sesaun daruak, iha loron 16, sei aborda kona-ba“Dezafiu Aban-bainrua no Oportunidade sira”.
Molok diskursu maktakak nian, ne’ebé hato’o hosi Primeiru-Ministru, Kay Rala Xanana Gusmão, sei iha serimónia entrega Prosesu Governasaun Governu Konstitusionál IV nian.
url: http://timor-leste.gov.tl?lang=tp&p=6899