Governu kontrata empreza hodi halo servisu aprovisionamentu ba infra-estrutura sira
Kontratasaun empreza aprovizionamentu Charles Kendall and Partners (CK&P) nian halo parte husi estratéjia dezenvolvimentu Governu nian hodi afirma ba públiku no komunidade doadór sira, no nia servisu maka’as iha relasaun ba transparánsia no integridade kona-ba gastu públiku sira iha Fundu ba Infra-estrutura nian. Hakarak, mós dezenvolve kapasidade interna aprovisionamentu nian ne’ebé Governu atu implementa.
Atu formaliza kontratu ho empresa CK&P, iha loron 24 fulan Abril tinan 2012, Komisaun Nasionál Aprovizionamentu nian, iha koordenasaun ho Ministériu Finansas, realiza ona serimónia asinatura entre Governu Timor-Leste, ne’ebe reprezenta husi Primeiru-Ministru, Kaya Rala Xanana Gusmão, no Direktór emprenza Charles Kendall and Partners, Johann Tagwerker, iha Ministériu Finansa, ne’ebé mak asiste husi membru Governu, parseiru dezenvolvimentu no media lokál sira.
Primeiru-Ministru, iha nia diskursu, hatete katak “ biban ida ne’e hakat ida importante tebes ba implementasaun Planu Estratéjiku Dezenvolvimentu (PED). PED ne’e fornese vizaun ida ba longu prazu ne’ebé dezenvolve aliserse sira be harii ona to’o oras ne’e. Halo parte ba PED área importante tolu: kapitál sosiál, dezenvolvimentu infra-estrutura no dezenvolvimentu ekonómiku. Timor-Leste presiza atu dezenvolve infra-estrutura bázika la’os de’it atu sustenta ba kresimentu, maibé mós atu kria empregu no apoia dezenvolvimentu iha sektór privadu”. Primeiru-Ministru hatutan tan, katak “ Fundu Infra-Estrutura ne’e kria ona atu nune’e País bele iha forma ida atu hodi fó finansiamentu projektu infra-estrutura sira. Governu kria, mós, Komisaun Nasionál Aprovizionamentu, Ajénsia Nasionál Dezenvolvimentu no Sekretariadu ba Projektu Boot sira atu hodi garante katak buat ne’ebé mak ita harii ne’e ba dunik nesesidade Povu nian”.
Primeiru-Ministru afirma mós katak, iha fiar ba empreza Charles Kendall & Partners sei sai hanesan konselleira diak no apoiu ida diak ba Komisaun Nasionál Aprovizionamentu, ne’ebé sei asegura dezenvolvimentu ba infra-estrutura boot sira ho kualidade ida diak, ba nível finanseiru no jestaun nian, ho modelu transparénsia ne’ebé aas, iha profisionalizmu no integridade.
CK&P iha ekipa espesialista ida ne’ebé boot. Empreza iha experiénsia ho prátika diak iha aprovizionamentu iha nasaun barak, inklui mós paíz sira ne’ebé iha situasaun pós-konflitu. Kompleta ona mós, ho forma pozitiva programa aprovizionamentu iha paíz atus ida resin, ho aprovizionamentu valór aas, iha projetu boot infra-estrutura nian. Projektu programa infra-estrutura kobre área oioin, inklui mós estrada no ponte, portu no aeroportu, saneamentu, abitasaun sosiál, planeamentu urbanu, harii sentru urbanu sira, edifísiu governamentál no munisípiu sira (inklui eskritóriu foun ba Ministériu Finansa no Parlamentu), instalasaun servisu báziku sira (hanesan eskola no ospitál) no instalasaun insdustriál sira, inklui hirak ne’ebé mak presiza atu apoia explorasaun gáz no mina-rai iha Timor-Leste. Projektu hirak ne’e inklui ona iha PED no sei halo avaliasaun no fó prioridade tuir kapasidade projetu finál hodi fó benefísiu ekonómiku hafoin nia remata, nune’e mós impaktu pozitivu ba kustu efetivu durante prosesu planeamentu no konstrusaun, hanesan fó oportunidade ba empregu no promosaun ba benefísiu síviku ne’ebé temi ona iha Objetivu Dezenvolvimentu Miléniu nian.
