Ministru Negósiu Estranjeiru halo vizita ofisiál ba Japaun

Ses. 09 marsu 2012, 11:54h
MNE_Japao_PORTAL

Ministru Negósiu Estranjeiru, Zacarias Albano da Costa, iha dadeer, loron 7 fulan Marsu ho delegasaun, to’o iha Japaun, ne’ebé simu husi Embaixador Timor-Leste nian iha Japaun, Isilio Coelho.

“Vizita ida ne’e hodi hametin liután relasaun diplomátika no bilaterál entre Timor-Leste no Japaun. Japaun pais ida ne’ebé hori uluk kedas fo suporte maka’as ba Timor-Leste iha área barak, hanesan halo formasaun ba militár Timor-Leste nian. Ha’u nia vizita ne’e marka mós tinan sanulu, Timor-Leste estabelese relasaun diplomátika ho Japaun, no mós atu selebra aniversáriu Restaurasaun Independénsia nian ba dasanulu”.

Iha lokraik, Ministru Negósiu Estranjeiru halo vizita ba Akademia Defeza Nasional Japaun nian. Prezidente Akademia Defeza Nasional, Makoto Lokibi ho ninian Ofisiál sira no boot militár balun simu ho haksolok vizita ida ne’e. Iha okasiaun ida ne’e, Zacarias Albano da Costa hasoru malu mós ho elementu F-FDTL na’in 6 ne’ebé hala’o hela sira nia formasaun iha Akademia ne’e.

“Ha’u kontente mai vizita Akademia ne’e no ha’u iha oportunidade hasoru ho’o membru na’in 6 husi F-FDTL. Ha’u bá vizita sira iha sira nian fatin rasik. Kona-ba sira nia preokupasaun, ha’u sei fo hatene rasik ba Primeiru-Ministru ne’ebé akumula mós pasta Ministro Defeza nian. Iha sira nia preparasaun, aleinde simu treinu militár sira mós aprende lian Japaun nian, no simu formasaun seluk ne’ebé hanesan enjeñaria sivil no ambientál”.

Loron 8, kinta-keira, Ministru Zacarias Albano da Costa sei hahú enkontru ho Embaixadór sira husi Pais ASEAN, tuir mai sei halo mós enkontru ho Vise Prezidente JICA, enkontru ho Reprezentante Federasaun Nasionál, Emprezáriu sira no sei remata ho’o enkontru ho nian homologu, Ministru Negosiu Estranjeiru Japaun nian, Koichiro Gemba.

   Ba leten