Ministériu Negósius Estranjeirus simu Embaixadór Repúblika Populár Bangladesh ba Timor-Leste
Ministru Negósius Estranjeirus, Zacarias da Costa, hasoru malu ho Golan Mohammad, Embaixadór Repúblika Populár Bangladesh ba Timor-Leste, ho rezidénsia iha Jakarta.
Embaixadór Golan Mohammad mai iha Díli atu hato’o karta Kredendisiál sira ba Prezidente Repúblika, José Ramos-Horta.
Zacarias da Costa fó boas-vindas ba Golan Mohammad hodi agradese ba apoiu kontínuu ne’ebé Bangladesh fó ba Timor-Leste: “ Hau rekoñese no agradese ba apoiu kontínuu ne’ebé Bangladesh fó ba Timor-Leste. Prezensa forsa iha misaun ONU nian nu’udár ezemplu ida. Ita tenke haree mós área koperasaun sira seluk. Ami hakarak hakle’an liu tan ami nia relasaun iha área sira seluk hanesan mós peska, agrikultura no saúde.”
Golan Mohammad hateten katak Bangladesh hakarak tulun Timor-Leste no nia realsa semellansa entre país rua ne’e: “ Ita iha problema no dezafiu sira hanesan. Hanoin atu tulun iha ne’e no ita bele serbisu hamutuk. “Koalia kona-ba komunidade Bangladesh ne’ebé moris iha Timor-Leste, Embaixadór Repúblika Populár Bangladesh hateten: “Hau iha oportunidade hodi halibur ho ami nia komunidade ne’ebé serbisu iha Timor-Leste no hau nia laran haksolok tebes tamba informasaun ne’ebé mak hau simu pozitiva.”
Ministru Negósius Estranjeirus, Zacarias Albano hetan konvite atu ba vizita Bangladesh iha fulan Fevereiru oin mai.
