Timor-Leste lori ajenda g7+ Ba Fórum Altu Nivel Iha Busan
Delegasaun Timor Leste ne’ebé lidera hosi Ministra Finansas (MF), Emilia Pires, lori ajenda nasaun g7+ nian ba sorumutu altu nivel iha Busan Korea do sul, iha loron, 28 to’o 29 Novembru 2011.
Ajenda ne’ebé mak iha akordu ona entre membru g7+ nian hodi lori ba sorumutu altu nivel, ne’e mak hanesan: espetru frajiilidade, indikadór kona-ba objetivu harii pás no harii estadu, estrutura kona-ba oinsá atu governa g7+, estratéjia komunikasaun, no ikus liu mak kona-ba papel g7+ nian iha forum altu nivel iha Busan.
Nasaun frájil hirak ne’ebe halibur no sai membru iha g7+ hamutuk nain 19, kompostu husi Timor-Leste, Afganistaun, Brundi, Costa du Marfim, Etiopia, Guiné, Guiné-Bissau, Haiti, Illas Salomon, Libéria, Nepal, Papua Nova Guiné, Republika Centrafricaina, Republika Demokratika Congo, Serra Leone, Somália, Sud-Soudan, Tchad, ho Togo.
Durante sorumutu altu nivel ne’e, iha mós aprezentasaun husi Ministra Finansas, Emilia Pires, Ministru Planeamentu no ekonomia Liberia nian, Ministra Finansas Togo no mós Ministru Ekonomia no Finansas South Sudan. Nasaun hirak ne’e fahe sira nia esperiensia husi sira nia rai laran kona-ba frajilidade no mós desenvolvimentu e bareiras sira ne’ebé hasoru.
Hafoin asembleia jeral ne’e, Ministra Finansas, Emilia Pires, ne’ebé mós asume kargu prezidente g7+ halo reuniaun intensivu ho membru no delegasaun sira husi g7+ atu fahe ideia ba malu no informasaun kona-ba rai ida-idak nia progresu no dezafiu iha prosesu harii Nasaun (nation building).
Ministra Finansas, Emilia Pires mós sai nu’udar oradora iha diskusaun kona-ba thematic session ho tema “Frajility, Conflict, and Vulneratibility”. Hamutuk mós ho Vice presidenti ba desizaun politika servisu nasaun Banco Mundial, Joachim von Amsberg, Asistente Administradór ba Ajénsia International Development husi Amérika (USAID), Nancy Lindbrog, no Xefi Sekretariadu Afrika CSO Plataforma no Principal Partnership, Paul Okumu.
