Maijór-Jenerál F-FDTL foun pose

Seg. 10 outubru 2011, 20:35h
Tomada_Posse_Lere_PORTAL

Prezidente Repúblika José Ramos-Horta, fó pose iha loron 6, fulan Outubru, ba Brigadeiru Jenerál Lere Anan Timur nu’udar Xefe Estadu Maijór-Jenerál Forsa Armada ho postu foun Maijór-Jenerál hodi troka fali Maijór-Jenerál Taur Matan Ruak ne’ebé deside ona fila ba vida sivil, hafoin hato’o nia rezignasaun ofisiál ba nia kargu liubá. Iha serimónia ne’e, Prezidente fó mós ao pose ba komandante nain rua mak Coronel Filomeno Paixão de Jesus hosi kargu Xefe Estadu-Maiór ba Vise Xefe Estadu Maijór-Jenerál Forsa Armada nian ho postu foun Brigadeiru Jenerál, no Coronel Falur Rate Laek ba Xefe Estadu-Maiór Forsa Armada nian.

Prezidente Repúblika, José Ramos-Horta hato’o nia intervensaun iha serimónia fó pose ne’e hateten “ohin ita hotu-hotu  hamutuk iha ne’e sei fó sasin ba mudansa dahuluk ne’ebé importante liu iha istória F-FDTL hafoin restaura tiha ita nia ukun rasik an, tanba Maijór-Jenerál Taur Matan Ruak nia pasajen ba disponibilidade no  vida sivil, sai nu’udar dalan uluk  hosi prosesu ne’ebé, sei lori mudansa neneik hosi jerasaun ne’ebé oras ne’e ka’er  kna’ar  nu’udar ita nia ulun forsa nian. Ita hotu hatene katak troka tiha Maijór-Jenerál Taur Matan Ruak hosi Forsa Defeza, ne’e hanesan dezafiu bo’ot ida, tanba hanesan ema ida ne’ebé mak iha esperiénsia, iha kualidade umanu no profisionalismu hanesan Taur Matan Ruak ne’e labarak”.

Xefe Estadu, mós ko’alia kona-ba dedikasaun, Maijór-Jenerál Lere Anan Timur nian hahú husi tempu gerilla to’o F-FDTL daudauk ne’e, nu’udar kargu ne’ebé merese iha respeitu hosi povu no hanesan dalan ne’ebé Kay Rala Xanana Gusmão tuir tiha ona no tuir mai hatutan hosi Maijór-Jenerál Taur Matan Ruak, bainhira sai xefe F-FDTL nian nu’udar forsa ida imparsiál no merese iha konfiansa hosi ema hotu-hotu iha País ne’e.

Taur Matan Ruak, iha nia diskursu despedida ne’e hateten katak, “Ohin  dala uluk  liu, ita iha previléjiu boot hala’o pasajen ba podér komando F-FDTL nian, iha serimónia Estadu nian ida, atu kumpri Konstituisaun iha dalan ida hakmatek, metin no naturál, ne’e hanesan fatór ida pozitivu atu hatutan tan no sei repete filafali iha loron ikus”.

Iha fatin hanesan Maijór-Jeneral Lere Anan Timur bainhira simu posse hatete katak, ohin ha’u simu responsabilidade foun ida ne’e iha ha’u nia kabas hodi lidera Instituisaun Forsa Defeza Timor-Leste ne’ebé nia pasajen no nia istória únika ,mai hosi ita hotu nia determinasaun,tanba  ita mak harii no hakiak hodi fó reposta ba ita nia povu tomak nia preokupasaun kona-ba koejaun nasionál ,desde uluk kedas to’o ohin loron. Tanba ne’e mak atu garante estabilidade iha nasaun ne’e nia laran la’ós F-FDTL de’it maibé povu no sidadaun tomak nia reponsabilidade, partidu politiku, organizasaun masa no konfisaun relijioza  sira, no bainhira kuandu ita metin ona ema  sei lasobu ita nia nasaun no ita nia unidade”.

Partisipa iha serimónia ne’e Prezidente Repúblika José Ramos-Horta, Primeiru-Ministru Kay-Rala Xanana Gusmão, Prezidente Parlamentu Nasionál, Fernando Lasama De Araujo, Prezidente Tribunal Rekursu Dr.Claúdio Ximenes, Prokuradór Jeral da Repúblika, Ana Pessoa Pinto, Eis Primeiru-Ministru Mari Alkatiri, Eis Prezidente Parlamentu Nasionál, Francisco Guterres Lu-Olo, Membru Governu, membru Parlamentu Nasionál  no Korpu Diplomátika sira.

   Ba leten