2,246 simu pose ba Funsionáriu Permanente

Kua. 17 agostu 2011, 15:58h
Tomada_Posse_Agosto_PORTAL

Komisaun Funsaun Públika kontinua fó Pose ba funsionáriu temporáriu ba Permanente hamutuk ema nain 2,246, iha loron 9 to’o loron 12 fulan Agostu 2011, iha Distritu, Aileu, Manufahi, Ainaru no Kovalima.

Prezidente Komisaun Funsaun Públika Libório Pereira  iha nia diskursu iha Distritu haat (4) ne’e,husu ba  funsionáriu sira ne’ebé  mak foin hetan posse  katak, ohin iha juramentu ne’e imi funsionáriu sira halo ona juramentu lori imi nia aan tau hanesan kompromisu atu obedese  ba Konstituisaun rai ida ne’e no kumpri mós regra sira administrasaun públika nian, imi nia juramentu ne’e jura atu halo servisu ba nasaun hodi kumpri regra sira tomak rai ida ne’e nian. ezemplu ba funsionáriu sira ne’ebé mak ho nia funsaun hanesan Profesór, enfermeiru, iha área agrikultura nian no balun iha área eletrisidade, iha objetivu ida de’it mak atu manán interese públiku nian, katak tau interese públiku no Estadu aas liu interese individu ka polítiku no prontu atu koloka an iha teritóriu laran tomak no mós obedese ba ita nia Superiór hirárkiku.

Reprezentante Administradór Distritu Aileu Abel da Conceição  hateten ohin loron, Prezidente Komisaun Funsaun Públika ho nia komitiva tomak mai to’o iha Distritu Aileu hodi fó pose ba ita-nia funsionáriu temporáriu sira ho totál atus haat-hitu (407) ne’ebé mak durante tinan barak  sira kontribui ba iha susesu nasaun ida ne’e nian liu-liu iha Distritu Aileu, hodi enkuadra iha kuadru permenente iha Funsaun Públiku nian.

Nune’e mós Administradór Distritu Manufahi, Filomeno Tilman, hateten mós katak, obrigadu ba Prezidente Komisaun Funsaun Públika ho komitiva tomak ne’ebé hakmaan an hodi hiit an mai Distritu Manufahi hodi fó pose ba funsionáriu sira atus lima ualu nulu resin haat( 584).

Administradór Distritu Ainaru Manuel Pereira  informa  katak ohin loron festa iha Distritu Ainaru, ami haksolok tebe-tebes tanba ami nia funsionáriu sira atus lima neennulu mak ohin sira halo sira nia kompromisu onra nian sai nu’udar funsionáriu permanente, ha’u hodi Administradór no emposadu sira nia naran hakarak hato’o obrigadu ba ita boot sira nia pasiénsia atu bele mai hamutuk ho ami iha loron ida ne’e Iha ainaru atu soleniza  no fó liu sentidu ba loron ida ne’e, loron espesiál ba funsionáriu sira iha Distritu Ainaru tanba ho ita boot sira nia prezensa bele sai mós motivasaun ba ami funsionáriu hotu la’ós de’it ba sira ne’ebé permanente ona maibé mós ba maluk sira ne’ebé  ohin sira deklara an liu hosi sira nia kompromisu.

Administradór Distritu Suai Inacio Pires mós hateten ha’u nia lia menon ba emposadu sira atus atus neen sianulu resin lima (695) iha ne’e  katak loron ida ne’e hanesan loron ida ne’ebé  imi hein tinan barak ona atu sai funsionáriu permanente ho serimónia fó posse loron ohin nian, governu rekoñese ona  imi nia servisu durante ne’e.

   Ba leten