Governu Timor-Leste

Hahú ohin inisiativa ida Governu nian ne’ebé promove kultu ba símbolu nasionál sira Timor-Leste nian, liu-liu Bandeira no Inu Nasionál sira.

Bandeira Nasionál no Inu Nasionál reprezenta soberania nasionál, independénsia, unidade no integridade Timor-Leste nian no, sai nu’udar símbolu unifikadór sira Nasaun Timor-Leste nian, tan ne’e, timor oan sira tenke respeita, la haree ba sira nia konviksaun polítika, krensa relijioza no orijen sosiál sira.

Nune’e, funsionáriu públiku sira hotu, no populasaun ne’ebé mak hakarak tuir bele mai asiste serimónia ne’e, iha Instituisaun hotu-hotu Estadu nian no iha estabelesimentu ensinu sira, iha loron 2 fulan Fevereiru, Loron Falintil-FDTL nian; loron 27 fulan Marsu, Loron PNTL nian; loron 20 fulan Agostu, Loron Forsa Armada Libertasaun Nasionál Timor-Leste nian (FALINTIL) no iha primeira segunda-feira kada fulan.

Ohin hahú serimónia solene ne’e, iha Palásiu Governu, ne’ebé prezide husi Vise Primeiru- Ministru, José Luís Guterres, ne’ebé konta ho prezensa husi Sekretáriu Estadu Konsellu Ministru no Sekretáriu Estadu Polítika Enerjétika nian no funsionáriu hotu-hotu husi Palásiu Governu ne’ebé halo formatura, hodi hananu Inu Nasionál Timor-Leste nian.

José Luís Guterres fó hanoin kona-ba importánsia símbolu Nasionál sira no onra no responsabilidade ne’ebé hotu-hotu tenke sente atu serví nafatin Povu, hodi promove nafatin uniaun no integridade mós ba jerasaun sira iha tempu oin mai.