Governu Timor-Leste

Iha loron 14 fulan Abril, iha Ministériu Negósiu Estranjeiru, hahú hala’o sorumutu ba dahuluk Komisaun Mista ba Negosiasaun Akordu bilaterál nian ho Santa Sé.

Komisaun Timor-Leste nian kompostu hosi Ministru Negósiu Estranjeiru, Zacarias Albano da Costa, Ministru Edukasaun, João Câncio Freitas, Ministra Justisa, Lúcia Lobato no mós Ministra Solidariedade Sosiál, Domingas Alves.

Komisaun Santa Sé nian kompostu hosi Arsebispu D. Leopoldo Girelli, Núnsiu apostóliku ba Indonézia no Timor-Leste, Bispu Baucau, D. Basílio do Nascimento, Padre Domingos Sequeira, Padre José António no Padre Ilídio.

Sorumutu ida ne’e hanesan eventu ida signifikativu kona-ba relasaun entre Estadu Timor-Leste no Vatikanu. Nune’e mós, hanesan eventu ida ne’ebé hahú ona prosedimentu hodi hetan rekoñesimentu personalidade juridka Santa Sé nian iha  Timor-Leste, no mós regulasaun ba relasaun entre Estadu Timor-Leste no instituisaun Igreja katólika nian, ne’ebé mós presta ona servisu sira relevante ba Timor-Leste.

Timor-Leste, tanba hanesan país Áziatiku ida ho populasaun katólika ne’ebé ho persentajen  aas liu, partisipa iha negosiasaun ida ne’e ho espiritu ida konstrutivu ne’ebé reflete sentimentu maioria sidadaun sira nian, maske nune’e, Timor-Leste sei mantein atu halo tuir nafatin ba prinsipiu konstitusionál Estadu laiku ida nian no defende interese orden jurídiku rai laran.

Iha sorumutu dahuluk ida ne’e, estabelese ona metodolojia negosiasaun nian, esplika pontudevista dahuluk nian hosi sorin ida -idak no tau iha ajenda sorumutu komisaun mista nian tuir mai, ne’ ebé sei hala’o iha fulan Juñu nia rohan, iha Díli.