SERN simu bolseiru timor-oan sira iha área Jeojolia nian

Ter. 22 marsu 2011, 10:16h
Bolseiru SERN_PORTAL

Sekretáriu Estadu ba Rekursu Naturais, Alfredo Pires, iha sexta-feira semana kotuk halo sorumutu ho finalista bolseiru nain 10 ne’ebé estuda iha Portugal iha área zeolojia ho objetivu atu hatene títulu hosi teze ne’ebé bolseiru sira ne’e atu foti.

“Durante tinan rua sira hotu ona sira nia faze dahuluk estudu ninian iha área zeolojia, remata ona teoria iha Portugal, agora sira komesa tama ba faze daruak nian  atu halo sira nia teze, sira ninia teze ne’e sei bazeia ba zeolojia Timor-Leste nian, ida-idak sei tun ba distritu durante fulan ualu no sei akompaña hosi profesór sira ne’ebé mai hosi Portugál hodi indentifika no halo peskiza ba rikosoin sira ne’ebé Timor-Leste iha”, hateten Alfredo Pires.

Sekretáriu Estadu ne’e hatutan tan katak bolseiru nain sanulu, ne’e kompostu hosi mane nain sia no feto nain ida, sei remata sira ninia estudu no foti sira nia diploma mós  iha Timor-Leste.

Iha fatin hanesan, Dircia da Silva, nu’udar bolseira ida, hateten katak “Ami nia estudu ne’e haree liu ba iha área jeologia Timor-Leste nian, hanesan, fatuk, Mármore, osan-mean no riku soin sira selu tan”.

   Ba leten