Governu lansa Portál Transparénsia

Kua. 16 marsu 2011, 11:05h
Portal Transparencia_PORTAL

Governu lansa, iha tersa-feira ne’e, loron 15, fulan Marsu, Portál Transparénsia, iha Sentru Konvensaun Díli nian.

Primeiru-Ministru, Kay Rala Xanana Gusmão, afirma katak ida ne’e hanesan medida ida ne’ebé Governu implementa hodi kontribui ba dezenvolvimentu País nian no hodi impede halo korupsaun: “Medida ida importante ne’ebé estabelese padraun globál foun ida ba informasaun sidadaun sira nian, hodi fó dalan foun ba transparénsia, responsabilidade, supervizaun no kontrolu”.

Enderesu  internet nian (www.transparency.gov.tl) sei disponível iha lian tétum, portugês no inglés, no sei fó hatene kontas Estadu Timor-Leste nian, hahú hosi tinan 2002, ba ema ne’ebé hakarak hatene, nu’udar haktuir Ministra Finansa, Emília Pires: “Diretór, Ministru, parseiru, sosiedade sivil sira… bainhira hakarak hatene informasaun kona-ba gastu sira Estadu nian, portál ida ne’e iha hotu kedas. Ida ne’e on line,  iha diretu! Bainhira osan sai, tama iha sistema portál no fó atu iha valór hirak gastu nian atualizadu nafatin. Ne’e informasaun ida ne’ebé kbiit maka’ás tebes”.

Lansamentu ofisiál ne’e halo hosi Primeiru-Ministru, ho prezensa Prezidente Repúblika, membru sira hosi Governu, Diretór Nasionál, parseiru dezenvolvimentu nian, deputadu no konvidadu sira seluk tan mak hanesan Reprezentante Espesiál Sekretáriu-Jerál Nasoen Unidas nian iha Timor-Leste, Ameerah Haq.

   Ba leten