Governu lansa produsaun masin Timor-Leste nian

Dom. 09 janeiru 2011, 10:10h
SalTimorInicioProducao_1_10.01.11

Ministériu Turismu, Komérsiu no Indústria (MTKI) lansa primeira produsaun Masin Timor-Leste nian, iha Ma’abat, distritu Manatutu, iha loron 8, fulan Janeiru. Produsaun ne’e halo hosi empreza Belak Salt.

Ministru Turismu, Komérsiu no Indústria subliña importánsia hosi inisiativa ida ne’e, hodi afirma katak  ho inisiativa ida ne’e bele hamenus importasaun masin. Nia hateten tan katak, Manatutu hanesan primeiru distritu ne’ebé harii indústria Masin Timor-Leste nian ho fábrika ida la’ós artezanál, ne’ebé bele sai nu’udar ezemplu ida ba distritu sira seluk. “ Hau husu ba populasaun sira hosi Manatutu atu mantein ho siriedade iha produsaun ne’e. Ho fábrika ida ne’e, iha distritu ida ne’e, ita sei hatudu ba mundu katak, Timor-Leste mós bele hahú buat ruma ne’ebé importante, hahú hosi Manatutu”, subliña Ministru Gil da Costa Alves.

Diretór ba empreza Belak Salt, João Alves, hato’o nia agradesimentu ba apoiu hotu ne’ebé Governu fó ba nia liu hosi MTKI, ne’ebé, ho ida ne’e, sei ajuda atu hamenus importasaun produtu ida ne’e no kria empregu ba timor oan sira.

   Ba leten