Primeiru-Ministru konvida Emprezáriu Indonésia atu investe iha Timor-Leste
Primeiru-Ministru, Kay Rala Xanana Gusmão, konvida kompañia ka emprezáriu sira iha distritu Belu, Provinsia Nusa Tengara Timur ka NTT (Indonézia), atu mai investe iha Timor-Leste. Xefe Governu hateten lia hirak ne’e bainhira hala’o enkontru ho autoridade lokál iha distritu Belu NTT, inklui ho kompañia ka emprezáriu sira iha distritu refere, liu hosi vizita loron ida, iha loron 19 fulan Agostu.
Iha okaziaun ne’e, Administradór distritu Belu, NTT, Joaquin Lopes, konsidera “maski tuir Primeiru-Ministru, Xanana Gusmão, vizita ne’e la’os ofisiál, maibe importante ba Indonézia, espesiál ba Kabupaten Belu, tanba bele hametin tan relasaun di’ak ne’ebé la’o tiha ona iha tempu pasadu.”
Xefe IV Governu Konstitusionál ne’e hatutan tan katak, intensaun hosi Governu Timor-Leste konvida kompañia hosi Belu. Alende mai investe, sira mós bele fó tulun hodi kapasita no hasa’e kbi’it kompañia ka emprezáriu nasionál sira-ne’ebé iha Timor-Leste, no oinsá atu emprezáriu Indonesia mós bele partisipa iha prosesu dezenvolvimentu Timor-Leste nian.
Primeiru-Ministru, Xanana Gusmão, realsa liután, Governu Timor-Leste hala’o dadaun konsulta iha baze kona-ba Planu Estratéjiku Dezenvolvimento Nasionál, tanba ne’e ba futuru sei iha Projetu barak, no hein katak emprezáriu ka kompañia Indonezia nian (Belu NTT) bele partisipa iha tenderizasaun, maibé tenke Preenxe mós ninia kriteriu ne’ebé Timor-Leste iha.
Iha fatin hanesan Xefe Kámara Komérsiu no Indústria Indonézia ka KADIN distritu Belu, NTT, Willy Lay, konsidera “Emprezáriu iha Belu, NTT, prontu atu kontribui ba desenvolvimentu setór privadu no Desenvolvimentu Nasionál Timor Leste nian. Maibé Xefe KADIN ne’e rekoñese katak emprezáriu Indonézia seidauk hatene kona-ba kriteiru ne’ebé kompañia tenke preenxe. Hatán ba kestaun ne’e Xefe Governu husu ba emprezáriu Indonézia nian atu bele husu kriteriu sira ne’e iha Konsulat Timor-Leste nian iha Kupaun, NTT.
Entertantu, hafoin seremonia refere, Primeiru-Ministru, Xanana Gusmão, iha parte lokraik asiste jogu futeból amizade entre ekipa hosi Maliana no Belu, NTT, no iha parte kalan partisipa iha kalan Kulturál nian ka “Malam Pentas Budaya”.
Partisipa iha sorumutu ne’e Administradór Belu NTT, Joaquin Lopes, Komandante DANDIM 1605 J. Hotman Hutahaen, emprezáriu kabupaten Belu, NTT, diretór banku sira (Mandiri, BRI), membru governu Timor-Leste no konvidadu sira seluk.
